Мыекъопэ къэралыгъо технологическэ университетым дунэе гъэсэныгъэмкIэ ифакультет идеканэу Елена Базалинар Дунэе гъэсэныгъэ къэгъэлъэгъонэу «Урысыем ущеджэныр игъу» зыфиIорэм хэлэжьагъ, ар Зэхэт Республикэу Танзанием (КъокIыпIэ Африкэм) щыкIуагъ.

Iофтхьабзэм колледжхэм ыкIи еджапIэхэм ащеджэрэ нэбгырэ 500 фэдиз зэхиугъоягъ, ахэр урысые апшъэрэ еджапIэхэм ащеджэ зышIоигъохэр ары.  Елена Базалинам танзанийцэмэ къафиIотагъ Мыекъопэ къэралыгъо технологическэ университетым изытет, урысые гъэсэныгъэр зэбгъэгъотыным мэхьанэу иIэр, нэмыкIхэм апэ зэришъырэр, егъэджэн программэхэр, сэнэхьатэу къыхахырэмкIэ апэ зэрэрагъэхъушъущт лъэныкъохэр.   

Неущрэ абитуриентхэм медицинскэм ыкIи инженернэм фэгъэзагъэхэр ары ашIогъэшIэгъоныгъэхэр  — лъэныкъохэу МКъТУ-р зыщылъэшхэр.

Танзанием щыкIогъэ къэгъэлъэгъоным еплъыгъэмэ Урысыем ыкIи Адыгэ Республикэм афэгъэхьыгъэ къэбархэм ащыгъозэшъугъэх, занкIэу ахэмэ ягугъу афашIыгъ, тикъэралыгъуи тигъэсэныгъэ системи нахь благъэ афэхъугъэх, IэкIыб студентмэ амалэу щагъотыхэрэри ашIагъэх.   

Танзаниер непэ — зыпкъитыныгъэ ыкIи экономическэ хэхъоныгъэ зышIырэ шъолъырэу КъокIыпIэ Африкэм ит. Урысыем щеджэ зышIоигъохэм япчъагъэ ащ щыхэхъо: 2025-рэ илъэсым  квотнэ чIыпIэу  танзанийскэ студентмэ аратырэм хагъэхъуагъ,  90-м икIыхи 150-м нагъэсыгъ.

Елена Николай ыпхъум нэмыкI урысые кIэлэегъаджэхэр игъусэхэу еджапIэхэм,  гимназиехэм ыкIи колледжхэм ащыIагъ, ахэр къалэхэу  Моши ыкIи Аруша (районыр Килиманджаро) адэтых. Къыхэгъэщыгъэн фае, ахэмэ яеджапIэхэм мобильнэ телефонхэр чIарагъахьэхэрэп, ащ къыхэкIэу кIэлэеджакIохэр нахь къэдаIох, къафаIотагъэм ядэIугъэх, къашъхьэпэщт къэбархэр атхыгъэх.

Елена Николай ыпхъум игъэкIотыгъэу Урысые гъэсэныгъэм къыщытегущыIагъ, студенческэ щыIакIэр, дунэе программэхэр зыфэдэхэр къафиIотагъэх, упчIабэу къыратыгъэмэ джэуапхэр аритыжьыгъэх. Ащ фэшъхьафэу, Африканскэ колледжэу чIыопсым икъэухъумэн фэгъэзагъэм иректор зэдэгущыIэгъу дыриIагъ, туризмэм ылъэныкъокIэ проектэу зэдагъэпсыщтхэм, мэз Iофым,  техносфернэ щынэгъончъагъэм ягугъу ашIыгъ.

Мыекъопэ къэралыгъо технологическэ университетыр мыщ фэдэ Iофтхьабзэхэм зэрахэлажьэрэм ишIуагъэкIэ IэкIыб гъэсэныгъэ университетхэм зэпхыныгъэу адыряIэхэр мэпытэх, дунаим щыпсэурэ сэнаущыгъэ зыхэлъ студентхэр апшъэрэ еджапIэм къырещалIэх.