Мыекъопэ къэралыгъо технологическэ университетым лъэныкъоу «МэшIо щынэгъончъэныр» зыфиIорэм щеджэхэрэр апэрэ IэпыIэгъур ягъэкIыгъэнымкIэ шъолъыр зэнэкъокъум хэлэжьагъэх ыкIи ятIонэрэ чIыпIэр къыдахыгъ.

КIэлэцIыкIухэм ыкIи ныбжьыкIэхэм я Урысые общественнэ-къэралыгъо движениеу «Апэрэхэм я Движение» зыфиIорэр ары чемпионатыр зэхэзыщагъэр, ар федеральнэ проектэу «Тызэгъус» зыфиIоу лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм къыдыхэлъытагъ. Зэнэкъокъухэм япшъэрылъыр — апэрэ IэпыIэгъур ягъэкIыгъэныр ныбжьыкIэхэм ягъэшIэгъэныр ыкIи шъолъырым икомандэ анахь дэгъухэр къыхэгъэщыгъэнхэр.

Командэу «ВСКС» зыцIэм хэхьагъэх Екатерина Кореевар, Денис Пахарчукыр, Кристина Функ, Александр Сюрис ыкIи Азим Агаевыр, зэнэкъокъум дэгъоу университетыр ахэмэ къыщагъэлъэгъуагъ.

Чемпионатым идесэхэр едзыгъуитIоу гощыгъагъэх. Апэрэ едзыгъом нэбгырищмэ апэрэ IэпыIэгъур арагъэкIыгъ, ахэмэ къяузыгъагъэхэр:

— Жьы къэщапIэ шъхьагъмэ жьыр апхырымыкIы хъумэ;

— мэхыгъэм ижьыкъащэ зызэпыурэм;

— уIагъэм шъом щымыщ горэ хэлъы хъумэ.

ЯтIонэрэ едзыгъом нэбгыриплIымэ IэпыIэгъу арагъэкIыгъ:

— мэхыгъэу, ау жьы къыщэу;

— пэм лъы къечъымэ;

— Iэ уIагъэм лъэшэу лъыр къечъымэ;

— къыкIэщтагъэмэ е мэгъымэ.

ХьыкумышIэмэ командэм къышIыгъэ десэхэм якъиныгъохэмкIэ уасэ афашIыщтыгъэ, IэпыIэгъур ягъэкIыгъэнымкIэ алгоритмэхэр зэрашIэхэрэр, экстреннэ къулыкъумэ къызэряджэхэрэ шIыкIэхэр къыдалъытэщтыгъэх, психологическэу узыр къызэузыгъэмэ зэрадэзекIохэрэми алъыплъагъэх. Десэ къэшIыгъо пэпчъ такъикъи 7 аратыщтыгъэ.

МКъТУ-м икомандэ шапхъэ лъагэм зэрэтетыр къэнэфагъ, практическэ IофшIэнхэр дэгъоу ыгъэцэкIагъэх, команднэ IофшIэнми осэшхо къыфашIыгъ, зызэфахьысыжьхэм ятIонэрэ чIыпIэр къыдихыгъ.