Мыекъопэ къэралыгъо технологическэ университетыр Урысые студенческэ лигэм дронхэмкIэ 2.0 зэнэкъокъум иплощадкэ хъугъэ — проектышхом, студентхэр зэзыпхырэм, пилот зэрымыс технологиехэм ядунай хэщагъэхэм.

Финалым изэхэщакIохэр МКъТУ-м хэхьэрэ Дзэ егъэджэн гупчэр, МКъТУ-м и «Точка кипение» ыкIи Студенческэ конструкторскэ бюрор, дронхэм язэпэгъэчъэнкIэ Адыгэ Республикэм и Федерацие ыкIи Урысые Федерацием спортымкIэ и Министерствэ яIэпыIэгъу.

Шъугу къэдгъэкIыжьын, 2025-рэ илъэсым ишышъхьэIу мазэ МКъТУ-р Урысыем иапшъэрэ еджэпIэ анахь дэгъу 20-мэ ахэфагъ — дронхэм язэпэгъэчъэнкIэ Студенческэ лигэм и гупчэ Iэмэ-псымакIэхэмкIэ ыгъэсэнхэу амал ыгъотыгъ: зэрагъэсэщт дронхэр, гъэIорышIэн пультхэр, VR-шлемхэр ыкIи симуляторэу «Квадросимыр». Проектым ишIуагъэкIэ студентмэ ыпкIэ хэмылъэу пилотирование программэр акIун алъэкIы, пилот зэрымыс системэхэр агъэзекIонхэмкIэ шIэныгъэхэр агъоты. Мы IофшIэныр федеральнэ проектэу «Кадры для БАС» зыфиIорэм щыщ Iахьэу щыт, специалистхэу высокотехнологичнэ отраслым щылэжьэщтхэм ягъэхьазырын фытегъэпсыхьагъ — пилот зэрымыс авиационнэ системэхэм.

Iофтхьабзэ зэкIэлъыкIохэр МКъТУ-м шышъхьэIум и 26-м къыщегъэжьагъэу едзыгъо-едзыгъоу щырагъэкIокIых, ащ хэхьэх: онлайн-егъэджэнхэу дронхэм язэпэгъэчъэнкIэ Федерацием и Платформэ; симуляторхэмкIэ ыкIи дрон шъыпкъэхэмкIэ студентмэ тренировкэхэр ягъэшIыгъэнхэр. Проектым иедзыгъо къыхэхыгъэнхэм шъолъырым истудент 1000-м ехъу хэлэжьагъ, ахэмэ пилот зэрымыс авиационнэ системэхэр ашIогъэшIэгъоныгъэх.

Финалым иторжественнэ зэхахьэ хэлэжьагъэх гъэсэныгъэмрэ шIэныгъэмрэкIэ Адыгэ Республикэм и Министерствэ, МКъТУ-м хэхьэрэ Дзэ егъэджэн гупчэ, Студенческэ конструкторскэ бюром ялIыкIохэр, джащ фэдэу студентхэр, курсантхэр ыкIи Урысые дзэ-патриотическэ движениеу «Юнармия» зыфиIорэм хэтхэр.

Финалым ипрограммэ Iофтхьабзэу хэхьагъэхэр:

— дронхэм якъэгъэлъэгъонэу МКъТУ-м хэхьэрэ Дзэ егъэджэн гупчэ икурсантхэм къагъэхьазырыгъэр;

— дронхэм язэпэгъэчъэнкIэ Адыгэ Республикэм и Федерацие къыгъэхьазырыгъэ къэшIыгъохэр;

— дронхэм япилотированиекIэ зэнэкъокъухэр;

—симуляторхэмкIэ къызэпэчъэнхэм ямастер-классхэр, виртуальнэ быбынхэмкIэ загъэсэнхэр;

— экскурсиеу МКъТУ-м и Дзэ егъэджэн гупчэ щакIущтыр, ащ хьакIэхэр нэIуасэ щафашIыщтых гъэсэныгъэ амалыкIэхэм, непэрэ тренажерхэм.

Зэнэкъокъум изэфэхьысыжькIэ ыкIи текIоныгъэ къыдэзыхыгъэхэр къыхэгъэщыгъэнхэмкIэ Iофтхьабзэр аухыгъ:

а I-рэ чIыпIэр — Сергей Шередько (экономикэм ыкIи юриспруденцием яинформационнэ системэхэм яфакультет)

я 2-рэ чIыпIэр — Ростислав Стельниковыр — (МКъТУ-м и Политехническэ колледж)

я 3-рэ чIыпIэр — Никита Вакулиныр — (лечебнэ факультет)

Джы ныбжьыкIэхэр гранд-финалэу Москва щыкIощтым хэлэжьэщтых.

Урысые студенческэ лигэм дронхэмкIэ 2.0 зэнэкъокъум ифинал Адыгэ Республикэм мэхьанэшхо зиIэ хъугъэ-шIагъэ щыхъугъ, пилот зэрымыс авиационнэ системэхэр гъэIорышIэгъэнхэм зыфагъэсэнхэмкIэ амалышIугъ, техническэ сэнэхьатхэм студентхэр фищагъэх.