Илъэс къэс рагъэкIокIырэ научнэ семинарэу «ЧIыопс ыкIи антропогеннэ вибрациехэр шъолъырым иэкологие ыкIи ищынэгъончъагъэ зэрепхыгъэхэр» зыфиIорэр хабзэ зэрэхъугъэу Мыекъопэ къэралыгъо технологическэ университетым щыкIуагъ, ар «Точка кипением» иплощадкэ щызэхащагъ, научнэ-гъэсэныгъэ консорциумэу «Вернадскэр — Адыгэ Республикэр» зыфиIоу 2023-2025-рэ илъэсхэм ателъытагъэм къыдыхэлъытагъэу рагъэкIокIыгъ.

Семинарым кIэлэегъаджэхэр, студентхэр ыкIи научнэ сообществэм ялIыкIохэр зэрипхыгъэх. ШIуфэс псалъэкIэ къэзэрэугъоигъэхэм закъыфагъэзагъ инженернэ факультетым идеканэу, техническэ шIэныгъэхэмкIэ кандидатэу Мэрэтыкъо Муратрэ экономикэ шIэныгъэхэмкIэ докторэу Беданэкъо Муратрэ.

Экспертэу къырагъэблэгъагъэмэ ядокладхэм ядэIугъэх:

— физикэ-хьисап шIэныгъэхэмкIэ кандидатэу, М.В. Ломоносовым ыцIэ зыхьырэ МКъУ-м ифизическэ факультет ЧIыгумкIэ физикэм икафедрэ идоцентэу Алексей Марченковым Мыекъуапэ дэт унэхэм охътабэ хъугъэу зэралъыплъагъэр, ахэр мэсысхэмэ ары идоклад зыфэгъэхьыгъагъэр;

— биологическэ шIэныгъэхэмкIэ кандидатэу, доцентэу, АКъУ-м иинтеллектуальнэ геоинформационнэ технологиехэм я Гупчэ ипащэу Татьяна Варшанинам къыIотагъ зэпымыорэ къалъытэрэ тектоническэ лъэныкъохэу шъолъырым иIэхэм яметодикэкIэ Iоф зэрашIэрэр;

— техническэ шIэныгъэхэмкIэ кандидатэу, АКъУ-м илабораторие ипащэу Семён Теплоуховым къышIыгъ докладэу  «Разработка интеллектуальной информационно-аналитической системы оценки решений в возобновляемой энергетике» зыфиIорэр.

Семинарым хэлэжьагъэмэ зэкIэмэ къыхагъэщыгъ мы Iофтхьабзэм шIуагъэ къызэритырэр, ушэтынхэр зэрэлъагъэкIотэщтхэр, ахэмэ апкъ къикIэу шъолъырым экологическэ ыкIи инженернэ щынэгъончъагъэр щагъэпсын зэралъэкIыщтыр.

Шъугу къэдгъэкIыжьын, щылэ мазэм 2023-рэ илъэсым торжественнэ шIыкIэм тетэу меморандумым кIэтхагъэх, ащ елъытыгъэу научнэ-гъэсэныгъэ консорциумэу «Вернадскэр — Адыгэ Республикэр» щыIэ хъугъэ. Программэу «Вернадскэр» МКъУ-м 2030-рэ илъэсым нэс хэхъоныгъэ егъэшIыгъэнымкIэ и ПрограммэкIэ ыпэ рагъэшъыхэрэмэ ащыщ. Ащ ипшъэрылъыр — социальнэ-экономическэ ыкIи инновационнэ хэхъоныгъэхэр Урысыем ишъолъырхэм ащышIыгъэнхэр, кадровэ ыкIи научнэ лъэныкъохэр ащыгъэпсыгъэнхэр ары. Гъогу картэу консорциумым иIэм хэхьагъэх Адыгеим иапшъэрэ еджапIэмэ япроектхэр МКъУ-м игъусэхэу, ахэмэ къызэлъаубытых лъэныкъохэу геофизикэр, геоэкологиер, ЧIыгум ифизикэ, биотехнологиехэр, чIыопсыр тэрэзэу гъэфедэгъэныр ыкIи биологическэ зэфэмыдэныгъэр къэухъумэгъэныр.