Непэ Мыекъопэ къэралыгъо технологическэ университетым шIуагъэ къэзытырэ джэгукIэмэ я Урысые марафон иапэрэ мафэ щыкIуагъ — акцие гъэшIэгъонэу урысые гъэсэныгъэ видеоджэгукIэхэр къэгъэлъэгъогъэнхэм фытегъэпсыхьагъэр, ахэмэ амалэу къатырэр гупшысэнымкIэ, джащ фэдэу инженернэ гупшысэнымкIэ, еджэпIэ предметхэр нахь псынкIэу зэгъэшIэгъэнхэмкIэ, технологиехэр къызфагъэфедэнхэмкIэ Iофыгъо дэгъу.

Марафоныр Лъэпкъ технологическэ гукъэкIхэм я Кружковэ движение ыкIи Лъэпкъ киберфизическэ платформэу «Берлога» зыфиIорэмэ зэхащагъ, яIэпыIэгъугъэхэр «Точка кипением» хиубытэхэрэр, стратегическэ гукъэкIхэмкIэ Агентствэр, платформэу НТИ ыкIи Leader-ID. Ащ щэлажьэх «Точка кипением» ихъоу хиубытэхэу хэгъэгум ичIыпIабэхэм ащыIэхэр.

Мазэм къыкIоцI Урысыем иплощадкэ 50-мэ очнэ ыкIи онлайн-Iофтхьабзэхэр ащэкIох: мастер-классхэр, гъэсэныгъэ джэгукIэхэм яплейтестхэр, программированиемкIэ турнир цIыкIухэр, кIэлэеджакIомэ, ны-тымэ ыкIи кIэлэегъаджэмэ апае  лекциехэр.

Непэ МКъТУ-м и «Точка кипение» Кощхьаблэ районым ит  гимназиеу №5-м ыкIи лицееу №8-м якIэлэеджакIохэр нэIуасэ щыфэхъугъэх джэгукIэхэу НКФП «Берлога» зыфиIорэм, демо-урокым хэлэжьагъэх, ащ дронхэр программирование зэрэпшIыщтхэр щызэрагъэшIагъ, шIу зыгу илъ мышъэмэ ядунай щызэнэкъокъугъэх. Марафоныр чъэпыогъум ыкIэ нэс рагъэкIокIыщт, кIэлэеджакIохэр а уахътэм къыкIоцI проектыбэхэм ахэлэжьэщтых, ежьхэми къаугупшысыщтых.

МаркетингымкIэ, сервисымкIэ ыкIи туризмэмкIэ кафедрэм идоцентэу, программнэ пащэу Светлана Новиковамрэ информационнэ щынэгъончъэнымкIэ ыкIи прикладной информатикэмкIэ кафедрэм ипащэу Цундышк Вячеславрэ десэхэр арагъэшIыгъэх.

— ШIуагъэ къэзытырэ джэгукIэхэр непэ — джэгукIэ индустрием ыпэ щырагъэшъырэмэ ащыщ, джащ фэдэу гъэсэныгъэр, — къыхигъэщыгъ Лъэпкъ технологическэ гукъэкIхэм я Кружковэ движение ипрезидентэу Алексей Федосеевым. — Марафоным ишIуагъэкIэ кIэлэеджакIохэр, ахэмэ яянэ-ятэхэр непэрэ уахътэм диштэрэ урысые гъэсэныгъэ джэгукIэхэм ахэтэщэх, нэIуасэ афэтэшIых, амалэу къапкъырыкIырэр зэхятэгъашIэ.

Марафоным изэфэхьысыжьхэр Баркемпе 20.35 «Технологическая революция для нового качества жизни человека» зыфиIорэм къыщашIыщтых, ар шэкIогъум  и 7-8-м Санкт-Петербург щыкIощт.

ШIуагъэ къэзытырэ джэгукIэмэ ямарафон — интерактивнэ егъэджэным ухэхьанымкIэ амалышIу, шIыкIэ-амалхэр ыкIи технологиехэр зэбгъэшIэнхэмкIэ, гъусэгъухэр, гупшысэгъухэр бгъотынхэмкIэ Iофтхьабзэ дэгъу.