Мыекъопэ къэралыгъо технологическэ университетым темэу «Техническэ сэнэхьатым фэгъэхьазырыгъэнхэмкIэ гъэсэныгъэм имэхьанэ: социогуманитарнэ лъэныкъор» зыфиIорэм щытегущыIагъэх. Я VI-рэ Урысые научнэ-гъэсэныгъэ форумэу «Я XXI-рэ лIэшIэгъум университетскэ гъэсэныгъэм ипшъэрылъыр: профессиональнэ Урысыем инеущ» зыфиIорэм къыдыхэлъытагъэу ар рагъэкIокIыгъ .

Модераторэу ащ хэлэжьагъэр философием ыкIи социологием якафедрэ идоцентэу, психологическэ шIэныгъэхэмкIэ кандидатэу ЛэупэкIэ Фатим. ЗэIукIагъэхэмэ гуманитарнэ дисциплинэмэ ямэхьанэ, ахэр инженерхэм ыкIи техническэ сэнэхьат зэфэшъхьафхэм ягъэхьазырынкIэ мэхьанэу яIэр зыфэдэм атегущыIагъэх, социальнэ пшъэдэкIыжьэу цIыфым ыхьырэр, университетскэ гъэсэныгъэм ишIуагъэу къакIорэр цIыфхэм язэдэгущыIэн культурэ хэлъэу гъэпсыгъэнымкIэ, уасэ зыфашIыхэрэмкIэ ыкIи фэшъхьафхэм ягугъу ашIыгъ.

Модераторым къыхигъэщыгъ, непэрэ дунаеу технологиехэр псынкIэу зыщылъыкIуатэхэрэм, техническэ шIэныгъэхэмэ гуманитарнэ компетенциехэр аголъхэу шIыгъэн фае, джары критическэ гупшысэм хэзгъахъорэр, акъылыр зыгъэIорышIэрэр, унашъохэр шIыгъэнхэмкIэ IэпыIэгъушIу хъурэр.

Зэхахьэм хэлажьэрэмэ зэрэзэдырагъэштагъэу техническэ гъэсэныгъэм игуманитаризацие — ар модэм дэкIонхэм фэшIэп, ар непэрэ уахътэм диштэрэ лIэужхэм ягъэхьазырынкIэ щыIэныгъэм ищыкIэгъэ Iоф, культурнэ ыкIи цIыфыгъэ лъэныкъохэр къыделъытэх.

Джащ фэдэу къыкIагъэтхъыгъ, инженер дэгъур непэ — ар квалифицированнэ профессионал къодыеп, ар апэрэмкIэ цIыфэу обществэм хэзагъэу, дэлажьэу, техническэ унашъохэм къакIэлъыкIощтхэр къызгурыIоу, пшъэдэкIыжьэу ыхьырэр зэхишIэу щыт.

ЗэхэгущыIэжьым зэфэхьысыжьэу фашIыгъэр гъэсэныгъэ процессым гуманитарнэ дисциплинэхэр нахьыбэу хагъэхьанхэр, джащ фэдэу студенческэ гукъэкIхэм ахагъэхъонхэр ыкIи ахэмкIэ социальнэ-гуманитарнэ компетенциехэр нахьыбэу агъэпсынхэр ары.