Мыекъопэ къэралыгъо технологическэ университетым едзыгъоу «Диагностика и планирование» зыфиIорэр щырагъэжьагъ, ар федеральнэ проектэу «IофшIэным шIуагъэ къегъэтыгъэныр» зыфиIорэм къыдыхэлъытагъэу щыт. Университетым иплощадкэ щыкIорэ IофшIэным лъэплъэх компетенциехэм я Отраслевой гупчэ испециалистхэр.

Мы едзыгъоу зыхэтхэм университетым иупчIэ шъхьаIэхэм япроцесс картирование щашIы. АуплъэкIурэр — студентхэр зэраштагъэхэмрэ ыкIи зэрэчIагъэкIыгъэхэмрэкIэ приказхэр, Урысыем ыкIи IэкIыбым къарыкIыгъэ студентхэм хъарзынэщым къыхэхыгъэ справкэхэм ягъэхьазырын, стипендием фэгъэхьыгъэ справкэмэ ятын.

Компетенциехэм я Отраслевой гупчэ испециалистхэмрэ МКъТУ-м иIофышIэхэмрэ документхэм ягъэхьазырын зыщыкIорэ чIыпIэмэ зэдэгущыIэгъухэр ащашIых, процессыр зэрэкIорэм лъэплъэх. Документмэ гъогоу къакIурэр зыфэдэр зэрагъашIэ, IофшIакIохэр а Iофтхьабзэм зэрэхэщагъэхэр зэхафы, Iэмэ-псымэхэу къыхагъэлажьэхэрэри ауплъэкIу. Анахьэу анаIэ зытырагъэтырэр Iофыгъо зэжъухэм якъыхэгъэщын ары, процессхэм якъычIэнэн ыкIи кIэшIыкIыжьыным. Ахэмэ яшIуагъэкIэ IофшIэным шIуагъэ къытэу гъэпсыгъэнымкIэ щыкIагъэу фэхъухэрэр алъэгъущтых, ахэмэ ядэгъэзыжьынкIэ унэшъо гъэнэфагъэхэр ашIыщтых.

Картированием зэфэхьысыжьэу фэхъурэм елъытыгъэу рабочэ купмэ зэхэсыгъохэр зэхащэщтых, ахэмэ процессхэр нахьышIу шIыгъэнымкIэ проектэу агъэхьазырыгъэхэр къащагъэлъэгъощтых. ЗызэхэгущыIэжьхэрэ ужым Мыекъопэ къэралыгъо технологическэ университетым иIофышIэхэмрэ компетенциехэм я Отраслевой гупчэ испециалистхэмрэ оптимизациер нахьышIоу регъэкIокIыгъэнымкIэ лъэныкъохэр къагъэнэфэщтых. Анахьэу анаIэ зытырадзэщтыр структурнэ подразделениехэр зэрэзэдэлэжьыхэрэр ары, джащ фэдэу заявкэхэр нахь псынкIэу агъэцэкIэнхэм пае цифрэ инструментхэр зэрагъэфедэхэрэм.

Чъэпыогъум и 13-м ыкIи и 14-м рабочэ купмэ яIофшIэн лъагъэкIотэщт, ежь-ежьырэу Iофтхьабзэмэ яплан зэхагъэуцощт, ар административнэ процедурэхэр нахьышIу шIыгъэнхэм атегъэпсыхьэгъэщт.

Едзыгъом икIэухым МКъТУ-м иректорэу Къуижъ Саидэ IукIэщтых, проектым ипащэ, джащыгъум университетым ипроцессхэм нахь шIуагъэ къатэу шIыгъэнымкIэ планэу агъэнэфагъэр къагъэлъэгъощт.

Наукэмрэ апшъэрэ гъэсэныгъэмрэкIэ УФ-м и Министерствэ яIэпыIэгъоу мы проектыр агъэцакIэ, гъэIорышIэным, цифрэ документ гъэзекIоным ыкIи студентхэмрэ кIэлэегъаджэхэмрэ нахь зэгурыIохэу зэдэлэжьэнхэм афытегъэпсыхьагъэу щыт.