Непэ Мыекъопэ къэралыгъо технологическэ университетым Урысые зэнэкъокъоу «ШIэныгъэр.Лекторыр» зыфиIорэм ишъолъыр едзыгъо щаухыгъ, ащ хэлэжьагъэмэ аудиторие зэфэшъхьафмэ лекциемэ къащеджагъэх, обществэу «ШIэныгъэм» иматериалхэр агъэфедагъэх. Джащ тетэу экспертнэ советым ыпашъхьэкIи къэгущыIагъэх.

Зэнэкъокъум амал къытыгъ зэсагъэхэ профессиональнэ IофшIэным шъхьадэкIынхэу, лекционнэ материал хьазырхэмкIэ цIыфхэм апашъхьэ къэгущыIэнхэм зыфагъэIорышIагъ, гъэсакIомэ яроль ауплъэкIугъ.

Шъолъыр едзыгъом Адыгэ Республикэм илIыкIо нэбгыриплI хэлэжьагъ, ахэмэ гъэсэныгъэ организациемэ яIофышIэхэр ахэтыгъэх. Зэнэкъокъум къыдыхэлъытагъэу зигугъу къэтшIырэмэ лекцие 12 къащатыгъ еджапIэхэм, кIэлэцIыкIу гъэсэныгъэ лагерым, «Адыгеим иныбжьыкIэхэр» зыфиIорэ организацием ыкIи общественнэ IэпыIэгъум иштабым. Зэнэкъокъум хэлэжьагъэмэ профессиональнэ шIэныгъэхэр къагъэлъэгъуагъэх, аудиторием зэрэдэлэжьэшъухэрэр нафэ хъугъэ.

Лъэныкъоу «Карьера и саморазвитие» зыфиIорэмкIэ лекцие къатыгъ еджапIэу №16-м гъэсэныгъэмкIэ пащэм игуадзэу Людмила Шевляковар ыкIи предпринимателэу Елена Лаврентьевар; номинациеу «Культурэр ыкIи искусствэр» — искусствэхэмкIэ Адыгэ республиканскэ колледжэу У.Х. Тхьабысымэм ыцIэ зыхьырэм икIэлэегъаджэу Сихъу Анастасия; номинациеу «Урысыем илъэпкъхэм языкIныгъ» зыфиIорэр къыгъэлъэгъуагъ социальнэ медиахэу «Москва Медиа» зыфиIорэм и Департамент социальнэ хъытыухэм адэлэжьэгъэнымкIэ иотдел ипащэу Адам Шухарт.

ЗэIукIэ-лекциехэр кIэлэеджакIохэми ны-тыхэми, студентхэми, Iоф зышIэрэ ныбжьыкIэхэми, къэралыгъо къулыкъушIэхэми апае рагъэкIокIыгъэх. ЗэкIэмкIи ахэмэ нэбгырэ 300-м ехъу ядэIугъ. ЗэIукIэхэм тарихъым, лъэпкъ культурэм ыкIи искусствэм, бзэм икъэухъумэн афэгъэхьыгъэ темэхэр къащаIэтыгъэх.

Ащ къыкIэлъыкIоу экспертмэ уасэ къафашIыгъ хэлажьэрэмэ ялекторскэ компетенциехэр зыфэдэхэм, материалхэм якъэтынкIэ хэушъхьафыкIыгъэ технологиехэр ыкIи шIыкIэхэр зэрагъэфедагъэхэм. ОсэшIмэ ахэтыгъэх МКъТУ-м ипрофессорскэ-кIэлэегъэджэ куп щыщхэр ыкIи обществэу «ШIэныгъэм» илекторхэр, зиопыт кIэлэегъэджэ IофшIэнымкIэ зэзгъэуIугъэхэу, профессиональнэ хэхъоныгъэ зышIыгъахэхэр.

— ЯтIонэрэу мы зэнэкъокъоу «ШIэныгъэр. Лекторыр» зыфиIорэм сыхэлажьэ. Мы илъэсым трекэу «Урысыем илъэпкъхэм языкIныгъ» зыфиIорэр къыхэсхыгъ ыкIи лъэпкъ зэфэшъхьафхэу зэгъунэгъоу Мыекъуапэ щыпсэухэрэмэ язэфыщытыкIэшIу фэгъэхьыгъэ лекциер къэстыгъ. Мы къалэр — культурэ ыкIи дин зэфэшъхьафхэм зы жабзэ къызщызэдагъотырэ чIыпI, ахэр къэлэ проектхэмкIэ, зэхэгущыIэжь IофтхьабзэхэмкIэ гъэпытэжьыгъэх. Сафэраз обществэу «ШIэныгъэм» ыкIи икъутамэу Адыгеим щыIэм зэнэкъокъур дэгъу дэдэу зэрэзахащагъэм, экспертхэми хэлажьэхэрэми шапхъэ лъагэ зэрафагъэуцугъэм афэшI. Джарэущтэу гъэсэныгъэ сообществэ анахь дэгъухэр хэгъэгум къыщэхъух — къыддэгощагъ Адам Шухарт.

Зэнэкъокъум ифинал ихьагъэхэмэ яспискэ чъэпыогъум ыкIэхэм анэс сайтым къыщыхаутыщт. ШэкIогъу мазэм лектор анахь лъэшхэр Москва кIощтых, мэфищэ къэтыщтых. ТекIоныгъэр ащ къыщыдэзыхырэ нэбгирэшъэмэ яшъолъырхэм лекциехэр къащатынымкIэ обществэу «ШIэныгъэм» якъутамэу ащыIэхэм зэзэгъыныгъэ ащыдашIынэу фитныгъэ яIэщт, фэшъхьаф шIухьафтынхэри къаратыщтых.