Мыекъопэ къэралыгъо технологическэ университетым «МэшIо щынэгъончъэныр» зыфиIорэ сэнэхьатым щыфеджэхэрэ Павел Каревыр ыкIи Вероника Коробко къэгъэнэжьакIохэм я Урысые студенческэ корпус ифинал егъэджэнхэм ахэлажьэх.

Iофтхьабзэм нэбгырэ 200 фэдиз къыугъоигъ, ахэр Урысыем ичIыпIабэхэм къарыкIыгъэх, команднэ IофшIэныр, зэдеIэжьыгъэныр, ошIэ-дэмышIэу зекIошъунхэм зафагъэсагъ.

Учениехэм едзыгъо хьылъэ 16 хахьэщтыгъэ, ахэмэ техногеннэ ыкIи чIыопс ошIэ-дэмышIэ Iофхэм ауж узэрэзекIощтхэр къащыдалъытэгъагъэх. Едзыгъохэр хъугъэ шъыпкъэмэ атехыгъэхэу щытыгъ:

— чIыдагъэу икIутыгъэр IухыжьыгъэнымкIэ мэзитф опытэу Анапэ гуфакIомэ щызэрагъэгъотыгъэр агъэфедэ;

— гуманитарнэ IэпыIэгъум игъэхьазырынкIэ Ростов-на-Дону ыкIи Белгород зэрэкIогъагъэхэр ящыс;

— машIор гъэкIосэгъэнымкIэ Забайкальскэ краим операциеу щыкIуагъэм иопыт еплъыгъэх, 2025-рэ илъэсым гуфакIомэ мэзэу къызкIэнэгъэ гектар мин 39-рэ агъэкIосагъ.

—  Илъэситфым къыкIоцI слетым нэбгырэ мин1,4-рэ хэлэжьагъ, ахэмэ зэкIэмэ машIор гъэкIосэгъэнымкIэ опыт яIэу щыт. Мы Iофтхьабзэр мэхьанэшхо зиIэу илъэс къэс зэхащэ, фэдэ Iофыгъомэ зафэзгъэхьазырырэмэ апай. — къыхигъэщыгъ ВСКС-м ипащэу Евгений Козеевым.

Iофтхьабзэм хэлэжьагъэмэ яIэпэIэсэныгъэ хагъэхъуагъ, апэрэ IэпыIэгъур зэрябгъэкIыщтыр, альпинизмэ Iофыр, псым къыщыбгъэнэжьынхэр зэрэпшIыщтхэр зэрагъэшIагъ, Iэмэ-псымэхэр IофшIэнымкIэ агъэфедагъэх. ТапэкIэ гуманитарнэ Iофтхьабзэу зэрахьащтхэмкIэ шIэныгъэу мыщ щызэрагъэгъотыгъэхэр къашъхьапэщтых.

КъэгъэнэжьакIохэм я Урысые студенческэ корпус (ВСКС) — анахь студенческэ гуфэкIо организацие инхэм ащыщ, Урысыем хъугъэ-шIагъэу щыхъухэрэм ядэгъэзыжьынкIэ къашъхьапэ. Организациер мэлылъфэгъум и 22-м 2001-рэ илъэсым зэхащагъ, студент чан миным ехъу хэлажьэ, ахэр апэрэу IэпыIэгъу къыпфэхъущтхэр ары.