Непэ Мыекъопэ къэралыгъо технологическэ университетым а I-рэ Урысые мэкъу-мэщ Iэпэрытхыр щыкIуагъ, ар мэкъу-мэщым ыкIи къыдагъэкIыжьрэ промышленностым иIофышIэхэм я Мафэ фэгъэхьыгъагъ.

Урысые мэкъу-мэщ Iэпэрытхыр — ар проектышху, Урысые Федерацием исубъектхэр зэкIэ, къэралыгъо хабзэм иорганхэр, гъэсэныгъэ организациехэр, компание ыкIи предприятие инхэр зэрепхых. Федеральнэ партийнэ проектэу «Урысые къуадж» зыфиIорэм къыдыхэлъытагъэу ыкIи мэкъу-мэщымкIэ УФ-м и Министерствэ яIэпыIэгъоу Iофтхьабзэр рагъэкIокIы.

МКъТУ-м Iэпэрытхыр щытхыгъэнымкIэ зещакIоу фэхъугъэр мэкъу-мэщ продукцием икъыдэгъэкIын технологиехэм якафедрэ ипащэу, мэкъу-мэщ шIэныгъэхэмкIэ докторэу, Адыгэ Республикэм и шъолъыр гъэцэкIэкIо комитет хэтэу Мамсыр Нурбый.

Iофтхьабзэм хэлэжьэнэу къырагъэблэгъагъэхэр плIэу гощыгъагъэх:

— сабыйхэу илъэс 12-м нахь макIэ зыныбжьхэр;

— ныбжьыкIэхэу илъэс 12-м къыщегъэжьагъэу 18-м нэс зыныбжьхэр;

— АПК-м щылэжьэнымкIэ опыт зимыIэ нахьыжъхэр;

— Отраслым щылэжьэнымкIэ опыт зиIэхэр ыкIи ащ фытегъэпсыхьагъэу еджэгъэ нахьыжъхэр.

Iэпэрытхым хэлажьэхэрэмэ упчIэ 30-мэ джэуап къаратыжьынэу щытыгъ. Ахэр мэкъу-мэщым, гъомлэпхъэ щынэгъончъагъэм, АПК-м икъэралыгъо тарихъ афэгъэхьыгъагъэх. МКъТУ-м иплощадкэ очнэ шIыкIэм тетэу нэбгырэ 359-мэ яшIэныгъэхэр щаушэтыгъэх. Ахэмэ ащыщыгъэх университетым, ащ икъутамэ ыкIи колледжым ястудентхэр, профессорскэ-кIэлэегъэджэ купыр ыкIи нэмыкIхэр.

Проектыр зыфытегъэпсыхьагъэр мэкъу-мэщым фэгъэхьыгъэ сэнэхьатхэр ягъэшIэгъэнхэр, непэрэ агропромышленнэ комплексым изытет щыгъэгъозэгъэнхэр ары. Мэкъу-мэщ Iэпэрытхыр гъэ къэс арагъэтхызэ ашIыщт, зэрэ Урысыеу зэрипхыщт.

Зэфэхьысыжьхэр чъэпыогъум и 13-м ыуж къыхаутыщтых. ЗэкIэ хэлэжьагъэмэ сертификатхэр аратыщтых.