Модулэу «Проектнэ ыкIи проектнэ-ушэтын IофшIэнэу рагъаджэхэрэмэ апае зэхащэрэр» зыфиIорэм игъэцэкIэн къыдыхэлъытагъэу дисциплинэу «Псэуалъэмэ яархитектурэр» зыфиIорэм щыIэ студентхэр лъэныкъоу «ПсэолъэшIыным» фырагъаджэх. Ахэмэ япащэр техническэ шIэныгъэхэмкIэ кандидатэу Щыщэ Рит ары, егъэджэн-ушэтын экскурсие нэжъ-Iужъхэр ыкIи сэкъатныгъэ зиIэхэр зыщаIыгъ унэ-интернатым щакIугъ.

Iофтхьабзэр джащ фэдэу зэхащэ «Къулыкъу ахьызэ егъэджэгъэнхэр» зыфиIорэ гъэсэныгъэ лъэныкъор къыдалъытэзэ, ащ къыкIегъэтхъы практикэ-ориентированэ екIолIакIэ ащ зэрэфашIырэр, социальнэ объект шъыпкъэхэр зэрагъэфедэхэрэр.

Унэ-интернатыр мы илъэсым ибэдзэогъу мазэ атIупщыгъ, тиреспубликэкIи хэгъэгумкIи зыфэдэ къэмыхъугъэ объектэу ар щыт, непэрэ екIолIакIэр рахьылIэзэ проектыр ашIыгъагъ, ащ елъытыгъэу Iэрыфэгъоу цIыфхэмкIэ агъэпсыгъ, социальнэ лъэныкъохэр зэкIэ къыщыдалъытагъэх.

Унэр зэрэгъэпсыгъэм узеплъырэм къэлъагъо ар инклюзивнэу зэрэщытыр: коммуникациехэм пэрыохъу ямыIэу шIыгъэх, санитарнэ чIыпIэхэр сэкъатныгъэ зиIэхэм афытегъэпсыхьагъэх, зыщыпсэущт унэхэм непэрэ инженернэ системэхэр афыхашIыхьагъэх, ахэр щынэгъончъых ыкIи псэупIэшIух.

Экскурсием хэлэжьэгъэ студентмэ объектым ифункциональнэ-планировочнэ структурэмкIэ зэфэхьысыжьхэр ашIыгъэх, иинженернэ-техническэ системэхэм защагъэгъозагъ. Унэ-интернатым ипащэхэми иIофышIэхэми ягуапэ хъугъэ мыщ фэдэ экскурсиекIэ къазэрэфэкIуагъэхэр ыкIи яIофшIакIэрэ унэм изытетрэ зыфэдэхэр къаIотагъэх.

Рагъаджэхэрэми къыхагъэщыгъ экскурсием ишIуагъэкIэ социальнэ объектхэм япроектирование ылъэныкъокIэ шIэныгъэхэр зэрэзэрагъэгъотыгъэр, нэжъ-Iужъмэ занкIэу адэIэпыIэщт Iэмэ-псымэу щагъэфедэхэрэр зэрэзэрагъэшIагъэр.

Неущрэ инженерхэмкIэ а шIэныгъэу агъотыгъэхэм мэхьанэшхо яIэу щыт, пшъэдэкIыжьэу ахьырэм игъэпытэнкIи къашъхьэпэщт.