Адыгэ Республикэр зызэхащагъэр илъэс 35-рэ зэрэхъугъэм фэгъэхьыгъэ мэфэкI зэхахьэ шъолъырым щыкIуагъ. АР-м и Къэралыгъо филармоние щыкIогъэ зэхахьэм Адыгеим и ЛIышъхьэу КъумпIыл Мурат зиIофшIэнкIэ гъэхъагъэ зиIэхэм къэралыгъо тынхэр щаритыжьыгъэх.

ХагъэунэфыкIыгъэхэм ащыщых медицинэм, гъэсэныгъэм, промышленностым, шIэныгъэм, культурэм ыкIи социальнэ лъэныкъом ялIыкIо пэрытхэр. Ахэм ащыщ медицинэ шIэныгъэхэмкIэ докторэу, МКъТУ-м икафедрэ ипрофессорэу Семенова Жаннэ Борис ыпхъур. Ащ «Адыгэ Республикэм изаслуженнэ врач» зыфиIорэ щытхъуцIэр къылэжьыгъ.

Нейрохирургием, кIэлэегъэджэ ыкIи гъэсэныгъэ IофышIэным алъэныкъокIэ ащ гъэхъэгъэшхоу иIэхэм, джащ фэдэу 2022-рэ илъэсым зэхащэгъэ «Врачхэм я Хасэ» иIофшIэн иIахьышIу зэрэхэлъым КъумпIыл Мурат осэшIу афишIыгъ. Джырэ уахътэм мыщ специалист 250-м ехъу хахьэ, ахэр Москва, Санкт-Петербург, Краснодар, Волгоград, Ессентуки ыкIи IэкIыб къэралхэм ащыIэ клиникэхэм яврач пэрытых. Организациемрэ Мыекъопэ къэралыгъо технологическэ университетымрэ зэпхыныгъэ яIэу зэдэлажьэх. Жанна Семёновар кIэлэцIыкIу хирургием ылъэныкъокIэ специалист шъхьаIэхэм ащыщ, Москва псауныгъэр къэухъумэгъэнымкIэ и Департамент иштат хэмыт нейрохирург шъхьаI. КIэлэцIыкIу нейрохирургхэм яобществэ ипрезидент, научнэ публикацие 200-м ехъумэ яавтор, истатьяхэр IэкIыб къэралхэм къащадагъэкIырэ журналхэм къадэхьагъэх, тын лъапIэхэр къыфагъэшъошагъэх. Джащ фэдэу Лъэпкъ премиеу «Призвание» зыфиIорэм илауреат, проф. В.В. Лебедевым имедалэу «За заслуги в неотложной нейрохирургии» зыфиIорэр къыфагъэшъошагъ.

Мыщ иIофшIэн МКъТУ-м епхыгъ, къэралыгъом иклиникэ пэрытхэм тистудентхэм практикэр ащакIун амал ареты, ащ ишIуагъэкIэ тапэкIэ врач хъущтхэм шIэныгъэу аIэкIэлъхэм ахагъахъо, ыпэкIэ лъэкIуатэх.

Жаннэ Борис ыпхъу тыфэгушIо къытефэрэ тынэу къыфагъэшъошагъэмкIэ, мыщ фэдэ шIэныгъэлэжьхэр ыкIи врачхэр МКъТУ-м икомандэ зэрэхэтхэм тырэгушхо!