Лъэпкъ проектэу «ШIуагъэ къэзытырэ ыкIи зэнэкъокъур зылъэпсэ экономикэр» зыфиIорэм ифедеральнэ проектэу «IофшIэным къыкIакIорэр» зыцIэм ипрактик анахь дэгъухэм ягъэфедэн епхыгъэ IофшIэныр Мыекъопэ къэралыгъо технологическэ университетым щырагъэжьагъ.

Шъугу къэдгъэкIыжьын, «коробочнэ унашъохэм» ягъэцэкIэн зыщызэхащэщт Урысыем иапшъэрэ еджэпIитфымэ МКъТУ-р ахэфагъ. Iофтхьабзэм зэфэхьысыжьэу фэхъухэрэр нэужым УФ-м гъэсэныгъэмрэ шIэныгъэмрэкIэ и Министерствэ епхыгъэ университетхэм ащагъэфедэщтых.

ФГАНУ-у «Социоцентр» зыфиIорэм илIыкIо купэу Руслан Долженкэр зипащэр тишъолъыр зыщэIэм а IофшIэныр рагъэжьэнэу зэдаштагъ. Iофтхьабзэм хэлэжьагъэх МКъТУ-м иректорэу Къуижъ Саидэ, ФГАНУ-у «Социоцентр» зыфиIорэм ианалитик-методологэу Евгений Ваховскэр, университетым ипроректорхэр, подразделениехэм япащэхэр, кIэлэегъаджэхэр ыкIи проектнэ командхэр.

Апэрэ мафэм ипрограммэ къыдыхэлъытэгъагъэх проектым икъызэIухын ыкIи пшъэрылъэу агъэцэкIэщтхэр зыщагъэнэфэгъэ апэрэ зэхэсыгъор. ЗэдэгущыIэгъум илъэхъан мы лъэныкъомкIэ МКъТУ-м опытэу IэкIэлъым мэхьанэшхо зэриIэр ащ хэлэжьагъэхэм хагъэунэфыкIыгъ, ащкIэ зишIуагъэ къэкIуагъэхэр проектэу «Бережливый вуз — МГТУ» ыкIи гупчэу «Фабрика процессов» зыфиIохэрэм ягъэцэкIэн ары. АхэмкIэ гъэхъагъэу щыIэхэм яшIуагъэкIэ федеральнэ проектым ипилотнэ площадкэу университетыр къыхахыгъ.

Нэужым IофшIэгъу программэм къыдыхэлъытагъэу командэм тренингэу «Основы картирования процессов университета» зыфиIорэр ыкIугъ. Студенхэм апае мастер-классэу «Тренды и вызовы современного мира», практическэ тренингэу «Решение проблем и устранение потерь в процессах» ыкIи «Реинжиниринг процессов университета на основе данных» зыфиIохэрэр рагъэкIокIыщтых. ТапэкIэ гухэлъэу яIэхэр кIэухым агъэнэфэщтых.