Мыекъопэ къэралыгъо технологическэ университетым шIэныгъэлэжьхэм ясовет зэхэсыгъо иIагъ, ащ тхьаматагъор щызэрихьагъ ректорэу Къуижъ Саидэ.

Повесткэ шъхьаIэм тегущыIэнхэм ыпэкIэ зидунай зыхъожьыгъэ Акатов Валерий Владимир ыкъом зы такъикъэ фэшъыгъуагъэх — биологие шIэныгъэхэмкIэ докторым, профессорым, Адыгэ Республикэм изаслуженнэ экологым, экологием ыкIи тыкъэзыуцухьэрэ дунаим якафедрэ инаучнэ IофышIэ шъхьаIэу щытыгъэм.

Ащ ыуж повесткэм ит упчIэхэм ятегущыIэн фежьагъэх.

Университетым иректорэу Къуижъ Саидэ шIэныгъэлэжьхэм ясовет хэтхэр щигъэгъозагъэх апшъэрэ гъэсэныгъэм имоделыкIэ  — ащ иIофшIэн иIофыгъо шъхьаIэхэм ыкIи кадрэхэм ягъэхьазырынкIэ екIолIакIэхэу кIэу къыхахыгъэхэм, шъолъырым иэкономикэ ищыкIагъэхэр къыдалъытэхэзэ егъэджэнхэр зэрэзэхащэн фаехэм. Ащ джащ фэдэу къыхигъэщыгъ: «Непэрэ экономикэм псынкIэ дэдэу технологическэ зэхъокIныгъэхэр фэхъух, IофшIэным ибэдзэр ищыкIагъэхэм къапкъырэкIы. Профессиональнэ гъэсэныгъэм исистемэ ащ елъытыгъэу гъэпсыгъэн фае. Кадрэхэм ягъэхьазырынкIэ а Iофыгъохэм апэ ишъырэ екIолIакIэхэр щыгъэфедэгъэнхэр пшъэрылъхэм ащыщ, непэрэ егъэджэн системэу щыIэр ыуж къенэ, зэхъокIныгъэхэм адиштэжьырэп. Джащ пае профессиональнэ сообществэр къежэ апшъэрэ гъэсэныгъэм исистемакIэ нахь псынкIэу тытехьаным, 2036-рэ илъэсым нэсэу агъэнэфэгъэ гъэсэныгъэ Стратегиер гъэцэкIэгъэным».
УпчIэу «2025-рэ илъэсым апшъэрэ ыкIи гурыт профессиональнэ гъэсэныгъэ программэхэмкIэ еджэнэу аштагъэхэр» зыфиIорэмкIэ къэгущыIагъ приёмнэ комиссием пшъэдэкIыжь зыхьырэ исекретарэу Бэрзэдж Розэ.

2025-рэ илъэсым университетым студентхэр къычIэхьагъэх бакалавриатым илъэныкъо 32-кIэ, специалитетым исэнэхьатхэмкIэ лъэныкъуи 8, магистратурэмкIэ 19, ординатурэмкIэ 7 ыкIи аспирантурэм инаучнэ сэнэхьатхэмкIэ 13. Гурыт профессиональнэ гъэсэныгъэм ипрограммэкIэ сэнэхьат 21-м афытегъэпсыхьэгъэщтхэр аштагъэх ыкIи 1 сэнэхьатымкIэ. Гъэсэныгъэ программэхэу аушъомбгъугъэхэри къыраIотыкIыгъэх, лъэныкъуакIэу къызэIуахыгъэхэр: «Автомобильнэ гъогухэр» (бакалавриатыр) зыфиIорэр, «Искусственнэ интеллектыр финансовэ-экономическэ системэхэм ахэтэу» (магистратурэр) ыкIи магистерскэ программэу «Прикладная юриспруденция» зыфиIорэр. Аспирантурэ научнэ сэнэхьатыкIэ хагъэхьагъ: 3.3.3 Патологическэ физиологиер. МКъТУ-м икъутамэу поселкэу Яблоновскэм дэтым мыгъэ апэрэу гурыт профессиональнэ гъэсэныгъэ программэмкIэ сэнэхьатыкIэхэр хагъэхьагъэх: «Строительство и эксплуатация зданий и сооружений» зыфиIорэр ыкIи бакалаврэ программэмкIэ «ПсэолъэшIыныр» (лъэныкъор «Промышленнэ ыкIи гражданскэ псэолъэшIыныр»). 2025-рэ илъэсым иприемнэ компание къыгъэлъэгъуагъ университетым хэхъоныгъэхэр зэришIыхэрэр, иегъэджэн программэ зызэригъэушъомбгъурэр, МКъТУ-м апшъэрэ ыкIи гурыт профессиональнэ гъэсэныгъэм чIыпIэ дэгъу зэрэщиубытырэр.

Егъэджэн-методическэ гъэIорышIапIэм ипащэу, экономикэ шIэныгъэхэмкIэ кандидатэу, доцентэу Наталья Чудесовам гъэмэфэ зачетнэ-экзаменационнэ сессием зэфэхьысыжьхэр къыфишIыгъэх. Сессиер дэгъоу зэхэщэгъагъ, студентмэ янахьыбэрэмэ шIэныгъэ дэгъухэр къагъэлъэгъуагъэх, ар гъэсэныгъэ процессым шIуагъэ къызэритырэм ыкIи профессорскэ-кIэлэегъэджэ купым яIофшIэн къаушыхьаты. Сессием иедзыгъо пэпчъ цифрэ технологиехэр ащагъэфедагъэх: электроннэ ведомостьхэр системэу «IС: Университет» зыфиIорэм щагъэпсыгъ, ащ хэукъоныгъэхэм ащиухъумагъэх. Гъэсэныгъэм идэгъугъэ уасэ фэзышIырэ непэрэ шапхъэхэр ренэу рахьылIэщтыгъэх: тестированиер, федеральнэ гъэсэныгъэ платформэхэм онлайн-курсхэр ащакIугъэх, проектхэр къаухъумагъэх. 2025-рэ илъэсым чIэтIупщыгъо квалификационнэ IофшIэгъэ 31-рэ къаухъумагъ шапхъэу «Стартапыр дипломым фэдэу» зыфиIорэм илъэу, ащ профессиональнэ сообществэм илIыкIохэр хэлэжьагъэх. Ащ ыуж Наталья Николай ыпхъум къыIотагъ АР-м ыцIэкIэ агъэнэфэгъэ стипендиехэр ятыгъэнхэмкIэ кандидатурэхэр зэрагъэнафэрэ шIыкIэр. Спискэм хэхьагъэх университетым иIофхэм чанэу ахэлажьэхэрэр, къалэ, шъолъыр ыкIи урысые Iофтхьабзэхэм дэгъоу закъыщызгъэлъэгъуагъэхэр, дэгъу дэдэу еджэхэрэр ыкIи МКъТУ-м ищыIэкIэ-псэукIэ ренэу зиIахь хэзылъхьэхэрэр.

Профориентационнэ IофшIэныр университетым зэрэщызэхэщагъэм къытегущыIагъ апшъэрэ еджапIэм чIэхьащтхэр зыгъэхьазырхэрэ Гупчэм ипащэу Олег Франко. Ащ къызэриIуагъэмкIэ, Iофтхьабзэмэ нэбгырэ мин 12 ахэлэжьагъ, ыпэрэ илъэсым ар бэкIэ нахьыб. Уасэу къэтхэжьыгъэмэ къыфашIыгъэр гурытымкIэ зэрэхъурэр балли 4,88-рэ, 5-м щыщэу. Технологическэ академие ЦIыкIум ипроектхэм, профильнэ классхэм, олимпиадэхэм ыкIи зэнэкъокъухэм хэхъоныгъэ зэрашIыхэрэр къыхагъэщыгъ, ахэм яшIуагъэкIэ абитуриентхэм япчъагъи хэхъо, университетым ныбджэгъугъэу дыриIэр мэпытэ. Джырэблагъэ ашIэщтхэм, Iофтхьабзэу зэхащэщтхэм ягугъу къашIыгъ, пшъэрылъхэр рахъухьагъэх, ахэмэ зэу ащыщ шъолъырым игъэсэныгъэ организациехэм адэлэжьэгъэныр.

МКъТУ-м хэхьэрэ Дзэ егъэджэн гупчэм ипащэу, полковникэу Нурлан Самадьяновым идоклад къыщыриIотыкIыгъ гупчэм зэрэчIахьэхэрэм зэхъокIныгъэхэр зэрэфэхъугъэхэр, УФ-м ухъумэгъэнымкIэ и Министерствэ иунашъо ыкIи нормативнэ актхэм ялъытыгъэу гъэсэныгъэ процессыр зэрэгъэпсыгъэр. Зэхэсыгъом джащ фэдэу щыхэплъагъэх Дзэ егъэджэн гупчэм кIэлэегъаджэу Александр Махнёвыр Iугъэхьэгъэным. Шъэфэу амакъэ затым ыуж кандидатурэм зэрэдырагъэштагъэр къэлъэгъуагъ.

Зэхэсыгъом икIэухым ныбжьыкIэ политикэмкIэ ыкIи гъэсэкIо IофшIэнымкIэ МКъТУ-м ипроректорэу БрантIэ Муратэ университетым щеджэрэ студентмэ ыпкIэу къатырэр къегъэIыхыгъэным фэгъэхьыгъэ доклад къышIыгъ.

ШIэныгъэлэжьхэм ясовет хэлэжьагъэмэ къаIэтыгъэ упчIэхэу повесткэм хэтыгъэхэр зэкIэ зэхафыгъэх, ахэмкIэ унашъо гъэнэфагъэхэр ашIыгъэх.