Мыекъопэ къэралыгъо технологическэ университетым икоординационнэ-методическэ купэу информационнэ щынэгъончъэным специалистхэр фэзгъэхьазырырэмэ зэхэсыгъо щыряIагъ.

Iофтхьабзэм Урысыем и ФСТЭК, Къыблэм иапшъэрэ еджапIэхэм, Къыблэ ыкIи Темыр-Кавказскэ федеральнэ шъолъырхэм яхэбзэ органхэм ялIыкIохэр зэрищэлIагъэх. Зэхэсыгъом иIофшIэн хэлэжьагъэх МКъТУ-м иректорэу Къуижъ Саидэрэ армием игенералэу С. М. Штеменкэм ыцIэ зыхьырэ Краснодарскэ апшъэрэ дзэ училищэм ипащэу, генерал-майорэу Игорь Шпырнямрэ.

ЗэIукIэм ипшъэрылъ шъхьаIэр — непэрэ мафэм къыздихьырэ киберщынагъомэ апэшIуекIон зылъэкIыщт специалистхэм ягъэхьазырынкIэ шIыкIэхэм зэдяусэнхэр ары. Отраслыр кадрэхэм ащымыкIэнхэм пае пшъэрылъэу апашъхьэ къиуцуагъэхэм атегущыIагъэх, целевой егъэджэным пылъ шапхъэхэм ахэплъэжьынхэр, студентхэр зэраштэхэрэ шIыкIэм, кIэлэегъаджэхэм яIэпэIэсэныгъэ мы лъэныкъомкIэ хэгъэхъогъэныр ыкIи практикэ-ориентированнэ егъэджэным киберполигоныр щыгъэфедэгъэныр.

Программэм къыдыхэлъытагъэу Къыблэ федеральнэ университетым, Донской къэралыгъо техническэ университетым, Адыгэ къэралыгъо университетым ялIыкIомэ докладхэр къашIыгъэх, джащ фэдэу Iэнэ хъураем Адыгэ Республикэм, Къалмыкъым, Къырым, Краснодар краим, Астраханскэ ыкIи Волгоградскэ хэкухэм, Ростов хэкум ыкIи къалэу Севастополь ащыщхэр зыхэлэжьагъэхэр рагъэкIокIыгъ. Шъолъыр пэпчъ кадрэхэм ягъэхьазырынкIэ ыкIи информационнэ щынэгъончъэнымкIэ опытэу аIэкIэлъыр къаIотагъ.

Координационнэ-методическэ купым итхьаматэу, Урысыем и ФСТЭК и ГъэIорышIапIэ ипащэ игуадзэу Надежда Шевцовам зэфэхьысыжь зэхэсыгъом къыфишIыгъ.

МКъТУ-р зэкIэ зэIукIэм хэлэжьагъэхэм, къыщыгущыIагъэхэм афэраз. Зэхэт IофшIэным ишIуагъэкIэ IэпэIэсэныгъэшхо зыхэлъ специалистхэр агъэхьазырынхэ алъэкIыщт, хэгъэгум ицифрэ системэ къэзгъэгъунэщтхэр.