Профессорэу, врач-онкологэу, медицинэ шIэныгъэхэмкIэ докторэу, Мыекъопэ къэралыгъо технологическэ университетым и Медицинскэ институт икIэлэегъаджэу ПщыхьакIэ Ахьмэдхъан егъэджэн процессым къыдыхэлъытагъэу лечебнэ факультетым истудентмэ лекцие къафеджагъ, джащ фэдэу зэхэгущыIэжь площадкэр зэрищагъ. Десэхэм ащыщыгъ — лекциеу: «Мочекаменная болезнь» зыфиIорэр.

Iофтхьабзэм хэлэжьэгъэ студентхэр сымаджэхэм яIэзэгъэнымкIэ екIолIакIэу щыIэхэм профессорым щигъэгъозагъэх. Анахь Iофыгъо шъхьаIэхэм ар къащыуцугъ: узыр пэшIорыгъэшъэу къызэрэпшIэщтыр, ныбжь зэфэшъхьаф зиIэхэм яузхэр къазэрэхэщыхэрэрэ ыкIи ахэм ягъэхъужьынкIэ зэрэзэтеутыгъэхэр. Ахьмэдхъан Мухаммед ыкъом анахьэу ынаIэ зытыридзагъэр непэрэ уахътэм агъэфедэрэ шIыкIэхэу ыкIи лабораторнэ диагностикэу мыжъохэр зихъуакIэхэкIэ къызэрэпшIэхэрэр, методхэу инвазивнэ хирургическэ ыкIи эндоскопическэ екIолIакIэу, сымаджэмкIэ щынэгъончъэ хъухэрэр къэзыгъэпсыхэрэр ары.

ЗэхэгущыIэжь площадкэр мыщ фэдэ упчIэмкIэ аублагъ: «ЦIыфым ищыIэныгъэ зэпхыгъэ унашъор сыдэущтэу пшIыщта?» зыфиIорэмкIэ — ащкIэ профессорым студентхэм врачмэ пшъэдэкIыжьэу ахьырэм иинагъэ къафыхигъэщыгъ. Опытэу ежь IэкIэлъымкIэ ар къадэгощагъ ыкIи хэукъоныгъэм къыкIэлъыкIон ылъэкIыщт тхьамыкIагъоми ышъхьэ къырихыгъ, унашъоу ашIырэ пэпчъ цIыфым ищыIэныгъэ лъигъэкIотэным зэрэфытегъэпсыхьэгъэн фаер къыриIотыкIыгъ.

Студентхэр чанэу зэхэгущыIэжьхэм ахэлэжьагъэх: упчIэхэр атыгъэх, клиническэ хъугъэ-шIагъэхэр зэфахьысыжьыгъэх, диагностикэм инепэрэ шIыкIэхэр зэхафыгъэх, цIыфым ипкъышъол хирургическэу зыхаIэхэрэм ыуж зэрэхъурэри зэхафыгъ. Ахьмэдхъан Мухаммед ыкъом къыIуагъ медицинэм хэхъоныгъэхэр щыпшIынхэм пае команднэ IофшIэн зэрищыкIагъэр, специалист зэфэшъхьафхэм яшIэныгъэхэр зэхэлъхэмэ зэрэнахьышIур.

Анахьэу студентмэ клиническэ хъугъэ-шIагъэхэу профессорым къыгъэлъэгъуагъэхэр ашIогъэшIэгъоныгъ. Хъугъэ шъыпкъэу къатыгъэ пэпчъ узым ихъишъэ къодыягъэп, ар опытэу ыкIи шIэныгъэу врачым IэкIэлъым къыпкъырыкIыщтыгъ, сымаджэм инеущрэ мафэ зэрихъокIыщтыгъ.