Мыекъопэ къэралыгъо технологическэ университетыр хэгъэгум иапшъэрэ еджэпIэ 300-у Урысые программэу «Альфа-Будущее. Гранты» зыфиIорэм хэлэжьагъэхэм ащыщ. Зэнэкъокъур зыфытегъэпсыхьагъэр кIэлэегъаджэхэу инновационнэ гъэсэныгъэ практикхэр зиIофшIэн хэзгъахьэхэрэр ары, непэрэ академическэ екIолIакIэр зыгъэфедэхэу зисэнэхьаткIэ гъэхъагъэхэр зиIэхэр.

Университетым иедзыгъо рагъэкIокIы зэхъум, МКъТУ-м икIэлэегъаджэмэ атыгъэ заявкэу плIы комиссиер зыхэплъагъэр. Шэпхъэ гъэнэфагъэу программэу «Альфа-Будущее. Гранты» зыфиIорэм ыкIи Положениеу «Альфа-Будущее. Гранты преподавателям» зыцIэм апылъым ялъытыгъэу ащ хэфэщтхэр къыхахыгъэх.

Материалэу аIэкIэлъхэм уасэу афашIыгъэм елъытыгъэу текIоныгъэр къызфагъэшъошагъэр стандартизациемкIэ, метрологиемкIэ ыкIи товарнэ экспертизэмкIэ МКъТУ-м  икафедрэ идоцентэу КIэдэкIое Нафсэт.

Нафсэт Заурэ ыпхъур дунае ыкIи урысые зэнэкъокъухэм ащытекIуагъэхэм ягъэсакIу, профессиональнэ творческэ Iофтхьабзэмэ осэшIэу ыкIи экспертэу бэрэ ахэлажьэ, рэзэныгъэ ыкIи щытхъу тхылъхэмкIэ гъогогъу пчъагъэрэ къыхагъэщыгъ, ахэмэ ащыщых гъэсэныгъэмрэ шIэныгъэмрэкIэ Урысые Федерацием къыфигъэшъошагъэри. Ар япащэу ушэтынэу «Исследование народного костюма с целью создания ресурсосберегающих технологий проектирования современной одежды» зыфиIорэр рагъэкIокIы. Джащ фэдэу рейтинг ин зиIэ научнэ журналхэм ащ истатьяхэр къадэхьэх. Зэнэкъокъум икомиссие хигъэунэфыкIыгъ КIэдэкIое Нафсэт IофшIэнышхо урысые ыкIи шъолъыр культурнэ хэхъоныгъэм ылъэныкъокIэ зэригъэцакIэрэр.

ЗэкIэ программэм хэлажьэрэмэ тафэраз, Нафсэт Заур ыпхъум тыфэгушIо къытефэрэ текIоныгъэр къызэрэдихыгъэм фэшI! ТапэкIэ джыри профессиональнэ ыкIи творческэ гъэхъагъэхэр ышIынхэу тыфэлъаIо!