Ассоциациеу «Урысыем имедицинскэ ыкIи ифармацевтическэ апшъэрэ еджапIэхэм яректорхэм я Совет» зыфиIорэм изэIукIэ щыкIуагъ, ар Санкт-Петербургскэ къэралыгъо педиатрическэ медицинскэ университетыр илъэси 100 ыкIи университетскэ Клиникэр илъэси 120-рэ зэрэхъухэрэм япэгъокIэу зэхащагъ.

Псауныгъэм икъэухъумэн системэ ыкIи хэгъэгум имедицинскэ гъэсэныгъэ ялIыкIохэр Iофтхьабзэм хэлэжьагъэх ыкIи докладхэр къыщашIыгъэх: псауныгъэр ухъумэгъэнымкIэ УФ-м и Министрэу Михаил Мурашко; Санкт-Петербургскэ къэралыгъо педиатрическэ медицинскэ университетым, Курскэ къэралыгъо медицинскэ университетым, Воронежскэ къэралыгъо медицинскэ университетэу Н.Н. Бурденкэм ыцIэ зыхьырэм и Гупчэ; Россотрудничествэм; Сеченовскэ университетым ялIыкIохэр.

Ассоциациеу «Урысыем имедицинскэ ыкIи ифармацевтическэ апшъэрэ еджапIэхэм яректорхэм я Совет» зыфиIорэм къызэрэригъэблэгъагъэм тетэу зэIукIэм иIофшIэн хэлэжьагъ Мыекъопэ къэралыгъо технологическэ университетым иректорэу, экономикэ шIэныгъэхэмкIэ докторэу, профессорэу Къуижъ Саидэ. Шъугу къэдгъэкIыжьын, мэкъуогъу мазэм 2024-рэ илъэсым къыщыублагъэу МКъТУ-р чанэу Ассоциациеу «Урысыем имедицинскэ ыкIи ифармацевтическэ апшъэрэ еджапIэхэм яректорхэм я Совет»  хэт, иIофхэм ахэлажьэ. Саидэ Казбек ыпхъур къызэгущыIэм, Санкт-Петербургскэ къэралыгъо педиатрическэ медицинскэ университетыр илъэси 100 ыкIи университетскэ Клиникэр илъэси I120-рэ зэрэхъухэрэм апае афэгушIуагъ, Адыгеим и ЛIышъхьэу КъумпIыл Муратэ ишIуфэс псалъэ зэрыт тхылъыр ыкIи шIухьафтыныр аритыгъэх.

Iофтхьабзэм иповесткэ зыщытегущыIагъэхэм ащыщ Урысыем имедицинскэ гъэсэныгъэ хэхъоныгъэхэр егъэшIыгъэнхэм япхыгъэ упчIэхэр. Специалистхэм апэрэ ыкIи апэрэ хэушъхьафыкIыгъэ специализированнэ аккредитацие 2025-рэ илъэсым зэракIурэ шIыкIэм игугъу щашIыгъ ыкIи 2025-рэ илъэсым чIэхьэгъу кампаниеу иIагъэм зэфэхьысыжьхэр фашIыгъэх. Шъхьафэу анаIэ тырадзагъ студенческэ медицинскэ отрядхэм яIофшIэн: IофшIэгъу семестрэм фэгъэхьыгъэ докладхэр къашIыгъэх, Къэралыгъо Думэм псауныгъэм икъэухъуэмнкIэ икомитет и Рэзэныгъэ тхылъхэмкIэ медицинскэ отрядмэ япащэ анахь дэгъухэр хагъэунэфыкIыгъэх.

Зэхэсыгъом щыхэплъагъэх урысые медицинскэ гъэсэныгъэр IэкIыб хэгъэгухэм зэращылъагъэкIотэщтым, джащ фэдэу апшъэрэ еджапIэхэр Россотрудничествэм зэрэдэлэжьэщтхэм. ЗэIукIэм къыдыхэлъытагъэу Ассоциациемрэ СНГ-м иIофхэмкIэ Федеральным агентствэмрэ зэзэгъыныгъэу зэрэзэдэлэжьэщтхэм зэдыкIэтхагъэх, ащ тилъэпкъэгъухэм адэлэжьэгъэнымкIэ, джащ фэдэу дунэе гуманитарнэ зэдэлэжьэныгъэр къыделъытэх. Ащ фэшъхьафэу медицинскэ ыкIи фармацевтическэ университетхэм яректорхэр Ассоциацием хагъэхьащтхэм атегущыIагъэх, 2025-2026-рэ еджэгъу илъэсым Iоф зэрашIэщт планыр зэхагъэуцуагъ.

МКъТУ-р Санкт-Петербургскэ къэралыгъо педиатрическэ медицинскэ университетым зэрэдэлажьэрэм ылъэныкъокIэ хэхъоныгъэхэр зэрашIыхэрэр Iофыгъо шъхьаIэу тиуниверситекIэ щытыгъ. Шъугу къэдгъэкIыжьын, 2024-рэ илъэсым Мыекъопэ къэралыгъо технологическэ университетым зэдэлэжьэнымкIэ щэгъогогъоу зэхэт зэзэгъыныгъэм адыкIэтхагъ СПбГПМУ-м ыкIи псауныгъэр къэухъумэгъэнымкIэ Адыгэ Республикэм и Министерствэрэ.

Документым къыделъытэ шъолъырым пае кадрэхэм ягъэхьазырын, Педиатрическэ университетым инаучнэ-кIэлэегъэджэ куп МКъТУ-м и Медицинскэ институт игъэсэныгъэ процесс къещэлIэгъэнхэр ыкIи къыхэгъэлэжьэгъэнхэр, джащ фэдэу студентмэ практикэр СПбГПМУ-м щахьыныр. Мыгъэрэ зэIукIэм МКъТУ-м иректорэу Къуижъ Саидэрэ СПбГПМУ-м иректорэу Дмитрий Ивановымрэ зэдэлэжьэныгъэр гъэпытэгъэным иIофхэр лъыгъэкIотэгъэнхэм зэрэфэхьазырхэр къыраIотыкIыгъэх.

Мыекъопэ къэралыгъо технологическэ университетыр афэгушIо Санкт-Петербургскэ къэралыгъо педиатрическэ медицинскэ университетыр илъэси 100 ыкIи университетскэ Клиникэр илъэси 120-рэ зэрэхъухэрэм афэшI! Мы мэфэкI мафэхэм къагъэлъагъо тарихъышхо апшъэрэ еджапIэмэ зэряIэр, джащ фэдэу хэгъэгум псауныгъэр щыухъумэгъэным исистемэ гъэпытэгъэным пае IэпэIэсэныгъэшхо зыхэлъ специалистхэр зэригъэхьазырхэрэр. Тэ тыгу къыддеIэу тафэлъаIо университетми клиникэми гъэхъэгъакIэхэр ашIынхэу, сэнаущыгъэ зыхэлъ студентхэм ащымыкIэнхэу. КъыкIэлъыкIорэ илъэсипшI пэпчъ урысые ыкIи дунэе медицинскэ сообществэм хэхъоныгъэшIухэр щишIынхэу фэтэIо!