Мыекъопэ къэралыгъо технологическэ университетым икомандэ наукэмкIэ Къыблэ Урысыем ия XVI-рэ Фестиваль хэлэжьагъ, ар къалэу Ростов-на-Дону щыкIуагъ.

МКъТУ-м икъутамэу поселкэу Яблоновскэм щыIэм чIыдэгъэ IофымкIэ ыкIи чIыгу гъэпсынымкIэ икафедрэ идоцентэу Дмитрий Бебко япащэу студентхэу Кирилл Цветноим ыкIи Ярослав Богровым лъэныкъоу «Энергетика» зыфиIорэмкIэ проект къагъэлъэгъуагъ, ар темэу «Инновационный способ очистки нефти и нефтепродуктов от серы» зыфиIорэм телъытагъэу гъэпсыгъэ. Лъэныкъоу «Медицина» зыфиIорэм хэлэжьагъэх гъомлэпхъэ производствэм иIэмэ-псымэхэмкIэ машинэхэм ыкIи технологиехэм якафедрэ икIэлэегъаджэу Нарэк Навасардяныр, ащ ыгъэсэрэ студентхэу Андрей Белоусовыр ыкIи Михаил Кучерявцэр, ахэмэ проектэу «Адыгэ Республикэм къыщыкIыхэрэр агъэфедэхэзэ Iэзэгъу шъонхм ыкIи шъонхэр зыхэт псыхэм ярецептурэ ыкIи ятехнологиехэр къэугупшысыгъэнхэр» зыфиIорэр къагъэлъэгъуагъ.

Фестивалым хэлажьэрэмэ проектхэр ашIогъэшIэгъоныгъэх, ахэмэ яшIуагъэкIэ технологиехэр арахьылIэшъугъэх ыкIи органолептическэ амалхэу озоннымрэ шъонхэмрэ яIэхэр зэрагъэфедэхэрэр къагъэлъэгъошъугъэх. Фэшъхьаф лъэныкъохэмкIэ зыкъэзгъэлъэгъогъэ ныбжьыкIэхэмэ адэлэжьагъэх, яопытхэмкIэ зэхъожьыгъэх, ащ хэтыгъэх водороднэ энергетикэм, радиоактивнэ элементхэм Iоф зэрадашIэхэрэр, джащ фэдэу пилот зэрымыс быбырэ аппаратхэр зэрагъэIорышIэхэрэр.

Къыблэ федеральнэ университетым иректорат, ежь ышъхьэкIэ ректорэу Инна Шевченкэм проектхэм лъэшэу анаIэ къатыридзагъ.

Фестивалым иIофшIэгъу программэ лъэныкъуиплIэу гощыгъагъэ:

— Наукэр | НыбжьыкIэхэр — Урысые еджапIэу «Импульс», ныбжьыкIэхэр наукэм зэрэхэщагъэхэм фэгъэхьыгъэ зэхэгущыIэгъу;

— Наукэр | Гъусэгъур — Эксперт пэрытмэ япсалъэхэр ыкIи проектнэ сессиеу эндаумент-фондым игъэпсын фэгъэхьыгъагъэр;

— Наукэр | Обществэр — Форумэу «Къулыкъу ахьызэ егъэджэгъэнхэр», Кирилл Тремасовым илекциеу Урысыем и Банк иахъщэ-кредитнэ политикэ къизыIотыкIыгъэр, Къыблэ федеральнэ университетым ипрезидент илекциеу урысые наукэм игъэхъагъэхэм къатегущыIагъэр;

— Наукэр | Гъэсэныгъэр — Сэнэхьат хэхыным фэгъэхьыгъэ Iофтхьабзэхэр, Iэнэ хъураехэр ыкIи интерактивнэ джэгукIэхэр.

Фестивалым хэлэжьэгъэ студентмэ яшIэныгъэхэр, япрофессиональнэ компетенциехэм хэхъоныгъэ афашIыгъ, проектхэмкIэ лъэтегъэуцохэр агъэпытагъэх, хэгъэгум инаучнэ гупчэмэ къарыкIыгъэмэ яIэпэIэсэныгъэкIэ адэгощагъэх.