Мыекъопэ къэралыгъо технологическэ университетым иIофышIэхэм лъэшэу агу къеуагъ ыкIи къаIопщы биологие шIэныгъэхэмкIэ докторэу, профессорэу, Адыгэ Республикэм изаслуженнэ экологэу, экологием ыкIи тыкъэзыуцухьэрэ дунаим якафедрэ инаучнэ IофышIэ пэрытэу Акатов Валерий Владимир ыкъом идунай зэрихъожьыгъэр.

1996-рэ илъэсым къыщыублагъэу 2009-рэ илъэсым нэс Валерий Владимир ыкъом экологиемрэ заповеднэ Iофымрэ якафедрэ ипэщагъ, МКъТУ-м иэкологическэ факультет хэхъоныгъэхэр егъэшIыгъэнхэм иIахьышхо хилъхьагъ. Ащ инаучнэ IофшIагъэхэм лъэныкъуабэ зэлъаубытыщтыгъэ: къэкIырэ сообществэмэ яструктурнэ-функциональнэ организациехэр зэгъэшIэгъэнхэм къащегъэжьагъэу биозэмылIэужыныгъэм икъэухъумэн ыкIи чIыопс резерватхэм алъапсэ гъэпсыгъэнымкIэ научнэ екIолIакIэхэр къэгъотыгъэнхэм анэсыжьэу.

Илъэс пчъагъэхэм къакIоцI ушэтын Iофэу ыгъэцэкIагъэхэмкIэ научнэ IофшIэгъэ 140-м ехъу къыхиутыгъ, ащ хэтыгъэх зэхэт монографиеу 7 ыкIи статья пшIы пчъагъэу тикъэралыгъо ыкIи IэкIыб хэгъэгухэм яжурналхэм къадэхьагъэхэр, индексэу яIагъэхэр Web of Science ыкIи Scopus. Аспирант нэбгыри 5-у диссертациехэр къэзыухъумагъэмэ янаучнэ пащэу щытыгъ.

Валерий Владимир ыкъор дунае ыкIи урысые научнэ проект инмэ ахэлажьэщтыгъэ, зэлъашIэрэ фондмэ, организациемэ Iоф адишIагъ, Адыгэ РеспубликэмкIэ ыкIи Краснодар краимкIэ Тхылъ плъыжьым дагъэхьащтхэм якъэугъоин чанэу хэлэжьагъ.

Ащ игъэхъагъэхэр цIэ лъапIэхэмкIэ ыкIи бгъэхалъхьэхэмкIэ къыхагъэщыгъэх, ахэмэ ащыщых гъэсэныгъэмрэ шIэныгъэмрэкIэ УФ-м ыкIи АР-м я Министерствэхэм, МКъТУ-м я Щытхъу тхылъхэр, цIэ лъапIэу «Адыгэ Республикэм изаслуженнэ эколог» зыфиIорэр къыфагъэшъошэгъагъ.

ИIофшIэгъухэмкIэ, студентхэмкIэ ыкIи иныбджэгъухэмкIэ Валерий Владимир ыкъор егъашIэм щысэтехыпIэу, наукэм, университетым, тыкъэзыуцухьэрэ дунаим афэшъыпкъэ цIыфэу къэнэжьыщт.

Акатов Валерий Владимир ыкъор тыщэIэфэ тыгу илъыщт, Тхьэм джэнэт лъапIэр къырет.