Адыгэ Республикэм имэз хъызмэт еджапIэхэм я I-рэ зэфэс Мыекъопэ къэралыгъо технологическэ университетым иIофышIэхэр, кIэлэеджакIохэр, хэбзэ органхэм ялIыкIохэр, мэз отраслым испециалистхэр зэрипхыгъэх — мэзхэм я ГъэIорышIапIэ ыкIи «Адыгэ мэз-мэшIогъэкIосэ ухъумакIохэр».

МКъТУ-м ландшафтнэ архитектурэмкIэ ыкIи мэз IофымкIэ икафедрэ хэхьэрэ профессорскэ-кIэлэегъэджэ купыр осэшIэу Iофтхьабзэм хэлэжьагъ: кафедрэм ипащэу Наталья Трушевар, доцентхэу Уджыхъу Мигрета ыкIи Ольга Резчиковар (Шапошниковым ыцIэ зыхьырэ ФГБУ КГПБЗ-м инаучнэ IофышIэ шъхьаI).

Iофтхьабзэм ипэублэм АР-м и Къэралыгъо Совет-Хасэ итхьаматэу Владимир Нарожнэмрэ гъэсэныгъэмрэ шIэныгъэмрэкIэ АР-м и Министрэу Евгений Лебедевымрэ шIуфэс псалъэхэр къашIыгъэх. МКъТУ-м иректорэу Къуижъ Саидэ ыцIэкIэ къэгущыIагъ экологическэ факультетым идеканэу Галина Коноваловар. Зэфэсым хэлажьэрэмэ апашъхьэкIэ джащ фэдэу къэгущыIагъэх АР-м мэзхэмкIэ и ГъэIорышIапIэ ипащэу Былымыхьэ Рэщыдэ, мэз хъызмэтым хэтхэм я Обществэ итхьаматэу, мэкъу-мэщ шIэныгъэхэмкIэ кандидатэу Хьатикъуае Мэджыдэ. Ахэмэ ягущыIэхэм къащыхагъэщыгъ экологическэ пIуныгъэм мэхьанэу иIэр, пшъэдэкIыжь ахьызэ къыткIэхъухьэрэ лIэужхэр пIугъэнхэ зэрэфаер.

Iофтхьабзэр рагъэкIокIыгъ Зэзэгъыныгъэу Мыекъопэ къэралыгъо технологическэ университетым ландшафтнэ архитектурэмкIэ ыкIи мэз IофымкIэ икафедрэ, АР-м мэзхэмкIэ и ГъэIорышIапIэ ыкIи  «Адыгэ мэз-мэшIогъэкIосэ ухъумакIохэм» зэдыряIэм къыдыхэлъытагъэу.

Апэрэ мафэм Iофтхьабзэм республикэм ит мэз еджэпIий къыщагъэлъэгъуагъ, отраслым ипрактическэ IофшIэн зыфэдэр зэрагъэшIагъ. ащ ыуж 2024-2025-рэ илъэсхэм мэз хъызмэтым епхыгъэ IофшIэнэу агъэцэкIагъэм зэфэхьысыжьхэр къыфашIыгъэх, лекциеу «Объекты лесного семеноводства, лесные культуры» зыфиIорэм едэIугъэх, машIор мэзым зэрэщагъэкIосэжьырэм лъыплъагъэх. Ар мэз научнэ-гъэсэныгъэ экологическэ стационарым зэшIуихыгъ.

ЯтIонэрэ мафэм мэз-зыгъэпсэфыпIэ чIыпэу «Мэздахэм»  практическэ десэхэм ягъэцэкIэн щылъагъэкIотагъ. Проектэу «Тызэгъусэхэу мэзыр къэтыухъумэщт» зыфиIорэм къытырэ десэхэр агъэцэкIагъэх, викторинэу «Знатоки леса» зыфиIорэм хэлэжьагъэх, ар МКъТУ-р ары зэхэзыщагъэр, чъыгхэр агъэтIысхьагъэх. Зэфэсым изэфэхьысыжьэу бгъэхалъхьэхэр ыкIи шIухьафтынхэр аратыгъэх.