Апэрэ курсым и Мафэ Мыекъопэ къэралыгъо технологическэ университетым игъэкIотыгъэу щыхагъэунэфыкIыгъ. Студентхэр нэIуасэ афэхъугъэх, еджагъэх, акIуачIэ ауплъэкIугъ, а зэкIэри мастер-классмэ ащаушэтыгъэх, ежьмэ апае хэушъхьафыкIыгъэ горэ ары пэпчъ хагъотагъ.

Iофтхьабзэр шIуфэс псалъэкIэ къызэIуахыгъ егъэджэн IофшIэнымкIэ проректорэу Людмила Задорожнаямрэ ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Муратэрэ. Ащ ыуж апэрэ курсым щеджэрэмэ апае МКъТУ-м итворческэ купмэ зыкъашIыгъ, ащ къыкIэлъыкIоу  интерактивнэ площадкэмэ IофшIэныр ащырагъэжьагъ.

«Студенческэ Hub» зыфиIорэр гукъэкIхэмкIэ кIэлакIэмэ къапэгъокIыгъ. Апэрэ курсым щеджэрэмэ ашIагъ зэIукIэхэр зыщызэхащэхэрэр,  студенческэ проектхэр къызэрэхъухэрэр ыкIи креативнэ гукъэкIхэр зыщапсыхьэхэрэр. МКъТУ-м и ГуфакIо гупчэ ныбжьыкIэмэ гуфэкIо энергие къахилъхьагъ. Мыщ гупчэм IофшIэнэу ыгъэцакIэрэр къычIэхьэгъакIэмэ щашIагъ, мастер-классэу «ШIум иIудан» зыфиIорэм Iэпшъэрылъхэр щаблагъэх, университетым игуфакIомэ ягупшысэхэр тхыгъэу къафагъэнагъэх. ГъэсакIомэ якорпус кIэлакIэхэр джэгукIэу  «ФотоКвест: ГъэсакIор къэгъот!» фигъэхьазырыгъэх. Телеграм-каналым ит сурэтхэмкIэ щагум дэт ялэгъухэр къагъотынхэ фэягъэ, упчIэмэ джэуапхэр къаратыжьынхэу щытыгъ, ащ ишIуагъэкIэ ахэр нахь зэпэблагъэ хъугъэх. Процессхэм яфабрикэ къыгъэлъэгъуагъ прикладной егъэджэныр зыфэдэр. ХьакIэмэ алъэгъугъ  производственнэ процессхэр моделирование зэрашIыхэрэр,  сакъыныгъэ производствэр зыфэдэр ашIагъ, джащ фэдэу непэрэ гъэIорышIэным ишIыкIэ-амалхэр.

Научнэ тхылъеджапIэу нэIуасэ зыфэхъугъэхэм къапигъохыгъ къэгъэлъэгъонхэр, тхылъеджэпIэ залыр. Ащ ыуж студентхэр интеллектуальнэ джэгунхэм ахэлэжьагъэх, усэ къеджэнымкIэ зэнэкъокъум ыкIи сурэт зытырахыгъ. МКъТУ-м икультурнэ гупчэ екIурэ зекIо гъогу шъыпкъэу экскурсиер къэлъэгъуагъ. Психологическэ къулыкъум зэIукIэу щашIыгъэм ишIуагъэкIэ, студентмэ ашIэ хъугъэ университетым IэпыIэгъу зыщагъотын алъэкIыщт чIыпIэр зыдэщыIэр.  Студентхэр трансформационнэ джэгукIэу «Сэ — сыстудент» зыфиIорэм хэлэжьагъэх, экспресс-тестированиер акIугъ ыкIи зэгупшысэгъухэр зыхэлажьэхэрэ «Майндфитнес» зыцIэм хэхьагъэх. IэкIыб  стажировкэмэ яамалхэр къыщаIотагъэх  академическэ мобильностым икомандэ. Апэрэ курсым къычIэхьагъэмэ икъоу ашIагъэх университетым ныбджэгъуныгъэ зыдыриIэ апшъэрэ еджапIэхэр, интернациональнэ зэкъошныгъэм иклуб зэрэщыIэр. «НыбжьыкIэ IэпэIасэхэм»  креативнэ студентхэр къаугъоигъэх. Мыщ студентмэ букет цIыкIухэр зэрэуугъоищт шIыкIэр щызэрагъэшIагъ,  туристическэ десэхэмэ акIуачIэхэр ащауплъэкIугъэх, сервировкэм  искусствэ зыщагъэгъозагъ.

Хъооу «Точка кипениер» неущрэм имастерской шъыпкъэ хъугъагъэ. КIэлакIэхэм агъэхьазырын алъэкIыщт проектхэр зэхашIагъэх. Лъэпкъ технологическэ гукъэкIхэр алъэгъугъэх ыкIи пэрытмэ ящыкIэгъэ шэнхэр зэхафыгъэх.  Экспозициеу «Пилот зэрымыс технологиехэр» зыфиIорэм дронхэр чIыопсыр ауплъэкIуным,  экологием, спортым ыкIи мэкъу-мэщым зэрэщагъэфедэрэр щалъэгъугъ. Дзэ егъэджэн гупчэм, Точка кипением ыкIи Студенческэ конструкторскэ бюром зэпхыныгъэу яIэр, зэрэзэдэлажьэхэрэр апэрэ курсым исмэ къафаIотагъ. Интерактивнэ викторинэу «Мэзыр зышIогъэшIэгъонхэр» зыфиIорэм тыкъэзуцухьэрэ дунаир студентмэ зэрашIэрэр щауплъэкIугъ: хэлажьэрэмэ бзыумэ амакъэ зэрагъэшIагъ, чъыгмэ анабжь къызэрашIэщт шIыкIэр аушэтыгъ, джащ фэдэу чIыопсым иIэмэ-псымэхэм Iоф адашIагъ.  

Лабораториеу экологическэ ушэтынхэр зыщашIыхэрэмэ  студентхэр уплъэкIун приборамэ ащыдэлажьагъэх, тыкъэзыуцухьэрэ дунаим изытеткIэ  экспериментхэр ашIыгъэх, уасэ фашIыгъ, сэнэхьатэу  инженер-экологым иIофшIэн куоу хэхьагъэх. Программэу «Предотвращение. Спасение. Помощь!» зыфиIорэм мэшIогъэкIосэ къулыкъум Iоф зэришIэрэр нэрылъэгъу щафэхъугъ. Квизэу щынэгъончъэнымкIэ тамыгъэхэр ашIагъэх, апэрэ IэпыIэгъур ягъэгъотыгъэнымкIэ  тренировкэхэр арагъэшIыгъэх, техникэр къарагъэлъэгъугъ — а зэкIэми амал апэрэ курсым исмэ къаратыгъ къэгъэнэжьакIоу зыщыхъужьынхэу. Едзыгъоу  «Неущрэ мафэр пIэ илъ» зыфиIорэм Адыгеим къыщыкIырэ уц лъэпкъхэу макIэ хъугъэхэм якъэухъумэн щытегущыIагъэх. НыбжьыкIэхэр стол кIыIу джэгунхэм ахэлэжьагъэх, экологическэ викторинэхэр акIугъэх, тхылъ Плъыжьым хэхьагъэ уцмэ нэIуасэ афэхъугъэх. МКъТУ-м иактовэ зал софитмэ янэф зэлъиубытыгъ: модэм истуденческэ театрэу «K’STAR» зыфиIорэм дизайнер хъущтхэм яколлекциехэр къыгъэлъэгъуагъэх — Дунэе зэнэкъокъухэм ащытекIуагъэхэр. НыбжьыкIэмэ алъэгъугъ креативыр искусствэ зэрэхъужьырэр.

Спортыр зикIасэхэм апае  армрестлингымкIэ зэнэкъокъухэр рагъэкIокIыгъэх. Ахэмэ къагъэлъэгъуагъ псауныгъэм икъэухъумэн епхыгъэ Iофхэр зэрэшъхьаIэхэр. Командэу «ГуфэкIо-медикхэм» къагъэхьазырыгъ  мастер-классхэр: апэрэ IэпыIэгъур зэрябгъэкIыщтыр, инъекциехэм ятехникэ ыкIи хирургическэ IуданэкIэ зэрэбдыжьыщтхэр. Ащ фэшъхьафэу студентмэ давлениер, пульсыр ыкIи шъоущыгъур зыфэдизыр ашыщтыгъэ. Проектэу «Спортымрэ псауныгъэмрэ яшъолъыр» зыфиIорэм лъэныкъуабэхэмкIэ амал къаритыгъ  —  стол кIыIу теннисым къыщыублагъэу  кроссфитым, футболым, волейболым ыкIи цигуным анэсыжьэу.

Финансовэ гъэсэныгъэм и Гупчэ ахъщэхэр зэрагъэзекIощт шIыкIэм студентмэ зыщыфагъэсагъ, гъэпцIакIомэ зызэращаухъумэщтыр, унашъохэр зэрашIыщтхэр, нэмыкIхэр къагурыIуагъэх. А чIыпIэр ары цIыфым ифинансовэ амалхэр зыщызэфихьысыжьхэрэр. Проектэу «О уикIогъу» зыфиIорэм ныбжьыкIэхэмэ ащ лъыпытэу къаугупшысыгъэ псалъэхэр къыщыраIотыкIыщтыгъэх. Ежьхэм яшъыпкъэ тетынхэм, яшэн пытэным ащ зыщагъэсагъ.  «Движение Первых» зыфиIорэм хэлэжьагъэмэ ежь аIэхэмкIэ сурэтхэр зыдагъэуцощт рамкэхэр ашIыгъэх. Творческэ процессым хэтхэу университетым фэгъэхьыгъэ шIухьафтын тамыгъэхэр агъэхьазырыгъэх.

Урыс географическэ обществэм и НыбжьыкIэ гупчэ зэгупшысэгъу стдентхэр зэрищэлIагъэх. Мыщ  географием, тарихъым ыкIи экологием щатегущыIагъэх, ныбжьыкIэхэмэ яшъолъыр ыкIи Урысыер шIу алъэгъуным къыфащагъэх.  

Апэрэ курсым и Мафэ Мыекъопэ къэралыгъо технологическэ университетым джащ фэдэу щыкIуагъ, ар зэмылIэужыгъуагъ, гъэшIэгъоныгъэ ыкIи мэфэкI шъыпкъагъ. Нэбгырэ пэпчъ ичIыпIэ къыгъотыгъ: зэгорэм наукэм зыфикъудыигъ, зэгорэм спортым е искусствэм, нэмыкIым гуфакIохэр нахь къыхихыгъэх.

Апэрэ курсым къычIэхьагъэхэр, зэкIэ тигъусагъэхэм тхьашъуегъэпсэу! Дэгъоу шъуеджэнхэу, шъуигукъэкIхэм ыкIи шъуипшъэрылъхэм шъуафэкIонхэу, шъузэрэIыгъхэу, шъузэдеIэхэу щыIэныгъэм шъухэтынхэу тышъуфэлъаIо!