Мыекъопэ къэралыгъо технологическэ университетым сэнаущыгъэ зыхэлъ кIэлэцIыкIухэр къызщыхагъэщыхэрэ ыкIи зыщадэлажьэхэрэ Шъолъыр гупчэу «Полярис-Адыгея» зыфиIорэм ибжыхьэ проектнэ сменэ щырагъэжьагъ. Проектым иIофшIэн Адыгэ Республикэм имуниципалитетмэ къарыкIыгъэ кIэлэеджакIохэр хэлажьэх.

Программэм игъэцэкIэн къыдыхэлъытагъэу лабораториеу «Биотехнологии» зыфиIорэр кIэлэеджакIохэу Мыекъуапэ, Тэхъутэмыкъуае, Теуцожь, Кощхьаблэ, Джаджэ ыкIи Шэуджэн районхэм ащыщхэм зэрагъэлъэгъугъ. Къыхэгъэщыгъэн фае, Кушъхьэ Динарэрэ Хъуажъ Русетэрэ проектнэ еджапIэу «Биотехнологии» зыфиIорэм фэгъэзагъэм ятIонэрэу хэлэжьах. Ащ пэщэныгъэ дызэрехьэ гъомлэпхъэ технологиехэмкIэ ыкIи шхыныгъохэм ягъэхьазырынкIэ кафедрэм ипащэу Хъоткъо Зурет. ГъэсакIохэу мы илъэсым Iофтхьабзэм фэхъугъэхэр  кафедрэм идоцентэу Блэгъожъ Асет, икIэлэегъэджэ шъхьаIэу Татьяна Белявцевар ыкIи шIэныгъэлэжь-IофышIэу Кудайнет Саид.

Лабораторием иIофшIэн хэлажьэрэмэ проектэу зэхагъэуцохэрэр зыфэгъэхьыгъэхэр пектин зыхэлъ шъонхэр, джащ фэдэу нэгум тыралъхьэрэ пектин зыхэлъ пленкэхэр ыкIи нэмыкIхэр гъэфедэгъэнхэр ары.  

Площадкэу «Пилот зэрымыс транспортыр» зыфиIорэм, ащ пэщэныгъэ дызэрехьэ  информационнэ щынэгъончъэнымкIэ ыкIи  прикладной информатикэмкIэ кафедрэм ипащэу Цундышк Вячеслав, кIэлэеджакIомэ щызэрагъапшэ ыкIи щызэрагъашIэ пилот зэрымыс аппаратхэр зэрэбыбыхэрэ шIыкIэхэр, гражданскэ ыкIи дзэ объектхэм якъэухъумэн ахэмкIэ зэрэзэтегъэпсыхьагъэр.

 Джырэ уахътэм кIэлэеджакIомэ зэрагъашIэ робототехническэ системэхэр моделирование зэрашIыхэрэ  Gazebo ыкIи пилот зэрымыс аппаратхэу быбыхэрэмэ  япрограммирование зыфэдэр.

Лабораториеу «Агротехнологии» зыфиорэм щеджэхэрэр ушэтын проектиплIымэ ахэплъагъэх:

— апэрэр зыфэгъэхьыгъагъэр: «Разработка технологии выращивания жимолости съедобной в условиях Республики Адыгея» (гъэсакIор — мэкъу-мэщ продукцием икъыдэгъэкIын итехнологиехэм якафедрэ ипащэу, мэкъу-мэщ шIэныгъэхэмкIэ докторэу, доцентэу Мамсыр Нурбый);  

— ятIонэрэр зыфэгъэхьыгъагъэр: «Исследование плесени на различных сортах хлеба и способы борьбы с ней» (гъэсакIор — мэкъу-мэщ продукцием икъыдэгъэкIын итехнологиехэм якафедрэ идоцентэу, биологие шIэныгъэхэмкIэ кандидатэу Шъао Жанна);  

— ящэнэрэр зыфэгъэхьыгъагъэр: «Современные агротехнологии в возделывании физалиса ягодного: повышение продуктивности и качества плодов» (гъэсакIор — мэкъу-мэщ продукцием икъыдэгъэкIын итехнологиехэм якафедрэ идоцентэу, мэкъу-мэщ шIэныгъэхэмкIэ кандидатэу Дэгужъые  Зар);

— яплIэнэрэр зыфэгъэхьыгъагъэр: «Разработка прикормок для рыбной ловли с использованием эфирных масел» (гъэсакIохэр — мэкъу-мэщ продукцием икъыдэгъэкIын итехнологиехэм якафедрэ идоцентэу, мэкъу-мэщ шIэныгъэхэмкIэ кандидатэу Мария Галичева ыкIи биологие шIэныгъэхэмкIэ кандидатэу Владимир Косаревыр).

ТапэкIэ проектнэ сменэм иIофшIэн лъагъэкIотэщт, ащ ушэтын проектыкIэхэр хагъэхьащтых.