Къэралыгъо десэмэ ягъэцэкIэн къыдыхэлъытагъэу Мыекъопэ къэралыгъо технологическэ университетым иIофышIэмэ стажировкэ Беларусым наукэмкIэ и Лъэпкъ академие, къалэу Минскэ щакIугъ.

IофшIэным ипшъэрылъыр — цIыф куп зэфэшъхьафхэм ателъытэгъэ шхыныгъохэмкIэ пшъэрылъэу щыIэхэм научнэ ушэтынхэр яхьылIэгъэнхэр, технологиякIэхэр ыкIи проектыкIэхэр зэхэгъэуцогъэнхэр.

Генеральнэ пащэр — экономикэ шIэныгъэхэмкIэ кандидатэу, доцентэу Алексей Мелещеня. НПЦ-м хахьэхэрэр — IофышIэ 153-рэ, ахэмэ ащыщых наукэхэмкIэ кандидатхэу 23-рэ, докторхэу 2, НАН Беларусым иакадемикэу 1.

Программэм илъэныкъуиплIыкIэ стажировкэр акIугъ гъомлэпхъэ технологиехэмкIэ ыкIи шхыныгъохэм ягъэхьазырынкIэ кафедрэм ипащэу Хъоткъо Зурет («Физикэ-химическэ шIыкIэхэу гъомлапхъэмэ ядэгъугъэрэ ящынэгъончъагъэрэ зэралъыплъэхэрэр: теоретическэ лъапсэхэр ыкIи практическэ екIолIакIэхэр»), доцентэу Блэгъожъ Асет («Органолептическэ (сенсорнэ) зэфэхьысыжьэу гъомлапхъэр зыхашIыкIырэмэ ыкIи шхыныгъохэмрэ афашIыхэрэр, зэралъыплъэхэрэр»), кIэлэегъэджэ шъхьаIэу Татьяна Белявцевар («Гъомлапхъэмэ яэлементнэ зытет») ыкIи шIэныгъэлэжь-IофышIэу Кудайнет Саидэ («Микробиологическэ лъыплъэнэу гъомлэпхъэ промышленностым рахьылIэрэр»).

Стажировкэм къыдыхэлъытагъэу МКъТУ-м иIофышIэмэ гъомлэпхъэшI предприятиитIумэ ащыIагъэх ыкIи отраслевой научнэ-ушэтэкIо институтитIу къаплъыхьагъ:

— Кондитерскэ фабрикэу «Коммунарка», ар кондитерскэ гъомлапхъэхэр къыдэзыгъэкIырэ хъызмэтшIэпIэ инэу Республикэу Беларусым ит, лIэужыбэмэ зэлъашIэ. Илъэсишъэм къыкIоцI фабрикэм къыщыдагъэкIырэ IэшIу-IушIухэмкIэ цIыфхэр егъэразэх: хабзэ хъугъэ пралиновэ конфетмэ къащегъэжьагъэу зэлъашIэрэ IэшIу-IушIухэу желем, нугим, суфлем ахэшIыкIыгъэхэр, карамельхэр, шоколадхэр. Ащ дэжьым ахэр зыхашIыкIыхэрэр натуральнэ продуктых. Фабрикэр зыфытегъэпсыхьагъэр шоколадхэм, конфетхэм, ирисхэм, какао-продуктхэм якъыдэгъэкIын ары. Предприятиер непэрэ уахътэм диштэрэ технологичнэ шэпхъэ инхэмкIэ, автоматизированнэ Iэмэ-псымэхэмкIэ зэтырагъэуцуагъ. Мыщ къыщашIырэ ассортиментым продукцие зэфэшъхьаф 300-м ехъу хахьэ.

— ОАО «Кондитерскэ фабрикэу «Слодыч» зыцIэр анахь кондитерскэ хъызмэтшIапIэ инэу Республикэу Беларусым ит, кIуачIэ зиIэ зэлъашIэрэ брендэу щыт, иассортименти зиушъомбгъугъ. Фабрикэм продукцие зэфэшъхьафэу 100-м ехъу къыдегъэкIы, ащ хэхьэх печенье зэмылIэужыгъохэр: шъоущыгъыр къызэбэкIыхэрэр, сдобнэхэр, глазированнэхэр, диабетическэхэр ыкIи крекерхэр. Сатыу маркэу «Слодыч» зыцIэр Беларусым щыпсэурэ процент 90-мэ зэлъашIэ.

— РУП «Лы-гъэщ промышленностым иинститут», пэрыт отраслевой научнэ-ушэтэкIо организациеу щыт. Ащ Республикэу Беларусым илы-гъэщ отраслэм научнэ екIолIакIэ фешIы. Институтым иIофшIэн зыфэгъэзагъэр лы ыкIи гъэщ промышленностым хэхъоныгъэ егъэшIыгъэным дэлэжьэгъэныр ары, ащ пае технологическэ процессхэр агъэкIэжьых, продукциякIэхэм якъыдэгъэкIын Iоф дашIэ.

— Къэралыгъо научнэ учреждениеу «Институт микробиологии Национальной академии наук Беларуси» зыфиIорэр Беларусым наукэмкIэ и Лъэпкъ академие хэхьэ, джащ фэдэу ар епхыгъ биологие шIэныгъэхэмкIэ и Отделение, хэтых къэралыгъо   научнэ-производственнэ объединениеу «Химический синтез и биотехнологии» зыфиIорэм. Институтым иIофшIэн зыфэгъэзэгъэ лъэныкъохэр — ушэтынхэр микробиологием ыкIи биотехнологием ащышIыгъэнхэр. Апэрэ пшъэрылъхэр: зэгъэшIэгъэныр биозэмылIэужыгъоныгъэр, физиологиер, биохимиер ыкIи микроорганизмэмэ ягенетикэ; нэмыкIхэр.

Стажировкэм изэфэхьысыжьхэмкIэ тапэкIэ IофшIэнхэр зэрагъэпсыщтхэр рахъухьагъэх, зэрэзэдэлэжьэщтхэмкIэ зэзэгъыныгъэмэ акIэтхагъэх.

МКъТУ-р лъэшэу афэраз Беларусым наукэмкIэ и Лъэпкъ академие ипащэ ыкIи иIофышIэ куп ащ фэдэ амалышIу къызэраритыгъэм фэшI.