Мыекъопэ къэралыгъо технологическэ университетым ипрофессорскэ-кIэлэегъэджэ куп адыгэ къуаем ия XIV-рэ Фестиваль чанэу хэлэжьагъэх.

Зэнэкъокъухэм уасэ афэзышIыщт осэшIхэм ахэхьагъ гъомлэпхъэ технологиехэм ыкIи шхыныгъохэм ягъэхьазырын икафедрэ идоцентэу Светлана Некрасовар.

Фестивалыр илъэс 14 хъугъэу зэхащэ, Адыгэ Республикэм еплъыкIэу къыфыряIэр нахьышIу шIыгъэным фэIорышIэ, культурнэ ыкIи лъэпкъ кIэнымкIэ зэрэбаир ащ къыщагъэлъагъо.

Общественнэ движениеу «Адыгэ Хасэм-Черкесскэ парламентым» итхьаматэу ЛIымыщэкъо Рамазан япащэу осэшIхэм ахэхьагъэх туризмэмкIэ ыкIи курортхэмкIэ АР-м и Комитет, мэкъу-мэщымкIэ ыкIи культурэмкIэ министерствэхэм, Адыгэ Республикэм щыпсэурэ бзылъфыгъэхэм я Союз, общественнэ организациехэм ялIыкIохэр, джащ фэдэу адыгэ къуае къэзышIыхэрэр, Мыекъуапэ иресторанхэмрэ икафехэмрэ ащылажьэхэрэр. 

Зэнэкъокъухэр мыщ фэдэ лъэныкъохэмкIэ захащагъэх:

— адыгэ къуаер нахь дэгъоу изыхырэр;

— адыгэ къуаер зыдэлъ хьалыжъор нахь дэгъоу къэзыгъэхьазырырэр;

— лъэпкъ хабзэмэ адиштэу зищагу нахьышIоу зыгъэпсыгъэр;

— ямышIыкIэу зищагу зэтезыгъэпсыхьагъэр.

Апэрэ мафэр щагухэр лъэпкъ нэшанэхэм адиштэу зэрагъэпсыгъэхэм афэгъэхьыгъагъ, ахэмэ мастер-классхэр лъэпкъ-художественнэ Iэмэ-псымэхэр  ыкIи декоративнэ искусствэр къэзыгъэлъагъохэрэр ащырагъэкIокIыгъэх. Лъэныкъоу «Анахь ямышIыкIэ щагур» зыфиIорэмкIэ анаIэ зытырадзэщтыгъэр муниципалитетэу къагъэлъагъорэр къызэрэхагъэщырэр ары, творческэ купмэ ар къыкIагъэтхъыжьыщтыгъэ. ЯтIонэрэ мафэм къуаер изыхырэ IэпэIасэхэм ыкIи адыгэ къуае дэлъэу хьалыжъо зыгъажъэрэмэ уасэ афашIыгъ. ОсэшIмэ зэфэхьысыжьхъэр ашIыгъэх ыкIи анахь дэгъухэр къыхагъэщыгъэх.

Адыгэ къуаем ия XIV-рэ Фестиваль гъэшIэгъонэу ыкIи игъэкIотыгъэу рагъэкIокIыгъ. Шъолъырым къеблэгъагъэмэ зэкIэмэ ащ гухахъо щагъотыгъэу зэхэщакIохэр мэгугъэх.