Мыекъопэ къэралыгъо технологическэ университетым имагистранткэу Елизавета Текучевар инновациехэм хэхъоныгъэ ягъэш1ыгъэным фэгъэхьыгъэ Фондым изэнэкъокъу хэлэжьагъ ыкIи текIоныгъэр къыщыдихыгъ, ар лъэпкъ проектэу «Эффект къэзытырэ экономикэр» зыфиIорэм елъытыгъэу агъэцакIэ.

Елизаветэ сомэ миллионэу къыратыщтыр иунэе бизнес-проектэу «Разработка технологии производства индивидуального рациона питания функционального назначения для военнослужащих» зыфиIорэм пэIуигъэхьанэу фитныгъэ иI.

Проектым ипащэр техническэ шIэныгъэхэмкIэ кандидатэу, гъомлэпхъэ технологиехэм ыкIи шхыныгъохэм ягъэхьазырын фэгъэзэгъэ кафедрэм идоцентэу Едыдж Саид ары. Кафедрэм научнэ пэщэныгъэр дызэрехьэ техническэ шIэныгъэхэмкIэ докторэу Хъоткъо Зурет.

Елизаветэ лъэныкъоу «Н5. Биотехнологии» зыфиIорэм хэлэжьагъ. Къэралыгъом ыпашъхьэкIэ щыт пшъэрылъмэ ащ имэхьанэ къагъэлъагъо: 

— Гъомлэпхъэ щынэгъончъагъэр гъэпсыгъэныр, функциональнэ мэхьанэ зиIэ продуктхэм якъыдэгъэкIын дыхэтэу;

— Дзэм къулыкъу щызыхьырэмэ апкъышъолкIэ къякIущт гъомлапхъэхэр игъом ягъэолIэгъэныр.

Непэрэ уахътэм къулыкъу зыхьырэ дзэкIолIмэ физическэ ухьазырыныгъэ дэгъу къагъэлъэгъон фае, ащ пае гъомлапхъэхэр агъэхьазырыхэ зыхъукIэ зэхъокIыныгъэу хъугъэхэр, джащ фэдэу псым зэрэщыкIэхэрэри, е ом изытети къыдалъытэн фае.   Технологиеу агъэпсырэр зыфытегъэпсыхьагъэр шхыныгъомэ яфункциональнэ зэмылIэужыныгъ ары, ащ белокэу, витаминэу, минералэу ыкIи энергетическэ уасэ зиIэхэу хэлъхэр ары.

ТапэкIэ агъэхьазырыщтхэм ахагъэхьащтых хабзэ хъугъэ шхыныгъохэм афэшъхьафэу пхъэшъхьэ-мышъхьэхэр, маткIо лъэпкъхэр, джащ фэдэу щэм хэшIыкIыгъэхэр, пцэжъыехэр ыкIи IэшIу-IушIухэр. Ащ фэдэ екIолIакIэм псауныгъэр нахь къызэтыригъэнэщт ыкIи пкъышъолым кIуачIэр хэмыкIэу къулыкъу ригъахьыщт.

Апэрэ курсым къыщыублагъэу Елизаветэ проектнэ IофшIэным чанэу пылъыгъ, университетым щызэхащэрэ Iофтхьабзэмэ, анахьэу акселерационнэ программэхэм ахэлажьэщтыгъэ. Илъэсищ хъугъэшъ ар акселераторэу «ИнноВектор» зыфиIорэм хэлажьэ, ащ хьалыгъу гъэжъэным фэгъэхьыгъэ проектхэр къыщигъэлъэгъогъагъэх.

Университетым ипащэхэр, профессорскэ-кIэлэегъэджэ купыр Елизаветэ, ащ инаучнэ пащэхэу Едыдж Саидэрэ Хъоткъо Зуретрэ афэгушIох текIоныгъэ къызэрэдахыгъэм фэшI.

Ащ фэдэ гъэхъагъэм джыри зэ къеушыхьаты МКъТУ-м студентхэр дэгъу дэдэу зэрэщырагъаджэхэрэр, научнэ лъэкIхэр университетым зэриIэхэр, гъомлэпхъэ технологиехэм ыкIи шхыныгъохэм ягъэхьазырын фэгъэзэгъэ кафедрэм чанэу Iоф зэришIэрэр, инновационнэ лъэныкъом зэрэдэлажьэхэрэр. Елизаветэ инаучнэ лъэубэкъушIу ар хъунэу, тапэкIэ джыри гъэхъэгъабэ къыдэхъунэу, МКъТУ-р  нахь лъэгэпIэ инхэм анэсынэу афэтэIо.