Мыекъопэ къэралыгъо технологическэ университетым и «Точка кипение» Iоф щешIэ Урысые гъэсэныгъэ акциеу «ИТ-диктантым». Iофтхьабзэр очнэ-шапхъэм илъэу рагъэкIокIы, Адыгэ Республикэм щырагъаджэхэрэр хэлажьэх.

Акцием изэхэщакIохэр: Мыекъопэ къэралыгъо технологическэ университетыр, гъэсэныгъэмрэ шIэныгъэмрэкIэ Адыгэ Республикэм и Министерствэ, Республиканскэ естественнэ-хьисап еджапIэу цифрэ хэхъоныгъэмкIэ, зэпхыныгъэхэмкIэ ыкIи коммуникацие жъугъэхэмкIэ Урысые Федерацием и Министерствэ хахьэрэр.

Непэрэ мафэм ехъулIэу акцием хэлэжьэнхэу заявкэ 1130-рэ МКъТУ-м истудентхэмрэ кIэлэегъаджэхэмрэ къатыгъ. Зэгъэпшэнхэр пшIынэу хъумэ, гъэрекIо акцием хэлэжьагъэр нэбгырэ 800 зэрэхъущтыгъэр.

Iофтхьабзэм хэлажьэрэмэ тестовэ десэ зэмылIэужыгъохэр акIущтых: компьютерым Iоф дэпшIэнымкIэ ублэпIэ шIэныгъэхэм къащыублагъэу интернет-ресурсхэм ахэшIыкIыгъэным ыкIи непэрэ технологическэ лъэныкъохэм — блокчейным, искусственнэ интеллектым, киберщынэгъончъэным анэсыжьэу. Десэхэм ягъэцэкIэн пае зы сыхьат къатырэр. ЗэкIэ хэлажьэрэмэ нэужым сертификатхэр аратыщтых, ахэмэ балл пчъагъэу къахьыгъэхэр арытхэгъэщтых.

Акциер онлайн шIыкIэм тетэу Iоныгъом и 12-13-м рагъэкIокIы. Фаер зэкIэ ащ хэлэжьэн алъэкIыщт — кIэлэеджакIохэр ыкIи студентхэр, джащ фэдэу  нахьыжъхэр. Ащ пае сайтым зыщябгъэтхын фае, Iофтхьабзэм инэкIубгъо зытетым ухэхьани, кнопкэу «Трансляцием уеплъыщт» зыфиIорэм утеIункIэнэу щыт. ИТ-сэнэхьатхэм 2023-2025-рэ илъэсхэм хэхъоныгъэ ягъэшIыгъэным ипрограммэ къыдыхэлъытагъ.

Мыекъопэ къэралыгъо технологическэ университетым и «Точка кипение» акцием лъэтегъэуцо щыфашIыгъ, ар зезыщагъэхэр: РЕМШ-м цифровизацие гъэсэныгъэмкIэ и Гупчэ ипащэу Елена Пономаренкэм, МКъТУ-м информационнэ щынэгъончъэнымкIэ ыкIи прикладной хьисапымкIэ икафедрэ икIэлэегъаджэу Павел Винограденкэм, цифровизацие гъэсэныгъэмкIэ АР-м и Гупчэ иметодистэу Алина Вержбицкаяр ыкIи МКъТУ-м и «Точка кипение» ипрограммнэ пащэу Светлана Новиковар. Лъэтегъэуцом хэлэжьагъэх Евгений Шварцым ыцIэ зыхьырэ Мыекъопэ гимназиеу №5-м иапшъэрэ классмэ ащеджэхэрэр.

Урысыем ипрограммистхэм я Мафэу илъэс къэс я 256-рэ мафэм  хэгъэунэфыкIырэм акциер епхыгъагъ,

«ИТ-диктантым» ишIуагъэкIэ информационнэ технологиехэр арагъашIэх, цифрэм имэхьанэ цIыфмэ зэхарагъэшIыкIы, ИТ-сэнэхьатхэм якъыхэхыным фащэх.