Мыекъопэ къэралыгъо технологическэ университетым къэралыгъо ыкIи муниципальнэ къулыкъушIэхэм яIэпэIэсэныгъэ зыщыхагъахъорэ Гупчэу хэтым шъолъыр проектэу «Адыгеим и ЛIыхъужъхэр» зыфиIорэм иапэрэ модуль щызэфашIыжьыгъ.

Федеральнэ проектэу «ЛIыхъужъхэм яуахът» зыфиIорэм елъытыгъэу программэр агъэцакIэ, ар Урысые Федерацием и Президентэу Владимир Путиным иунашъокIэ агъэпсыгъ.

ТхьамэфитIум къыкIоцI модулым хэтыгъэхэр лекциехэм ядэIугъэх, мастер-классхэм ыкIи тренингхэу къэралыгъо политикэмрэ непэрэ гъэIорышIэнымрэ афэгъэхьыгъагъэхэм ахэлэжьагъэх. Егъэджэн планым хагъэхьэгъагъэх Урысые къэралыгъо гъэпсыкIэм, хабзэ органхэм ягъэIорышIэн, къэралыгъо къулыкъухэм ыкIи шъолъыр, муниципальнэ IофышIэхэм афэгъэхьыгъэ темэхэр, джащ фэдэу практическэ десэхэу пэрытныгъэм, универсальнэ IэпэIэсэныгъэм атегъэпсыхьагъэхэр. Гъэсэныгъэ процессым хэтыгъэх культурнэ-ушэтын Iофтхьабзэхэр ыкIи патриотическэ акциехэр.

Зэфэхьысыжь аттестациер тестированиемкIэ ыкIи ушэтынхэмкIэ рагъэкIокIыгъэх. Нэбгырэ 18-у Iофтхьабзэм хэлажьэрэмэ ухьазырыныгъэ дэгъу дэдэ къагъэлъэгъуагъ, балл 70-м нахьыбэ къахьыгъэх.

— Программэу «Адыгеим и ЛIыхъужъхэм» хэлажьэрэмэ дэгъу дэдэу къагурыIуагъ егъэджэным ипшъэрылъхэр, яIэпэIэсэныгъэ хагъэхъонэу зэрэщытыр. Нэбгырабэр апэрэу къэралыгъо гъэIорышIэн Iофым хахьэми, ахэмэ пэрытныгъэ шэнхэр, пшъэрылъым фэкIонымкIэ шIыкIэ-амалхэр аIэкIэлъых. ЧIэтIупщыгъом ехъулIэу хабзэ органым хэхьэрэ профессиональнэ IофшIэным ахэр фэхьазырыщтых, — къыхигъэщыгъ Мыекъопэ къэралыгъо технологическэ университетым къэралыгъо ыкIи муниципальнэ къулыкъушIэхэм яIэпэIэсэныгъэ зыщыхагъахъорэ Гупчэу хэтым ипащэу Пафэ Фатимэ.

Къэралыгъо хабзэм ыкIи муниципальнэ учреждениехэм ащакIущт стажировкэхэр ары къыкIэлъыкIорэ едзыгъоу еджакIомэ афэхъущтыр. ЯтIонэрэ егъэджэн модулэу «Экономикэр ыкIи финансхэр» тыгъэгъэзэ мазэм аублэщт.