Мыекъопэ къэралыгъо технологическэ университетым обществэу «ШIэныгъэм» программэу «ЛIыхъужъхэм яуахътэ» хэлажьэрэмэ апае гъэсэныгъэ Iофтхьабзэ зэхищагъ, ащ хэлэжьагъэх студентхэмрэ кIэлэегъаджэхэмрэ. Экспертэу зэIукIэм хэлэжьагъ Олег Лебедевыр. Проектэу «ШIэныгъэр. Къэралыгъор ыкIи ШIэныгъэр. Лекториер» зыфиIорэм къыдыхэлъытагъэу зэхахьэр рагъэкIокIыгъ.

Программэу «ЛIыхъужъхэм яуахътэ» елъытыгъэу Олег Валерий ыкъом лекциеу «Урысыер непэрэ дунаим хэтэу» зыцIэр зэрищагъ. Урысые Федерацием иIэкIыб политикэ, дунаим изытет, хэхъоныгъэу щашIыхэрэр, дунэе зэфыщытыкIэхэу лъэныкъуабэ къызэдэзыубытыхэрэр зэIукIэм темэ шъхьаIэхэу къыщаIэтыгъэх.  

Университетым щылажьэхэрэмэ экспертым анаIэ тыраригъэдзагъ тайм-менеджментым. Уахътэр зэрагъэIорышIэрэм, федэ къытэу анахь шъхьаIэ Iофыгъохэм адэлэжьэгъэным ягугъу ашIыгъ, джащ фэдэу Эйзенхауэр ишIыкIэ — пшъэрылъхэр гощыгъэнхэм, анахь шъхьаIэхэр ыпэ игъэшъыгъэнхэм атегущыIагъэх. Iофхэр мафэм зэратебгощэщтхэр, пшъэрылъхэр зэрэхэбгъэунэфыкIыщтхэр зещакIом къыIотагъэх.

— СэркIэ,  пшъэрылъхэм ягъэнэфэнкIэ унэе хэушъхьафыкIыгъэ биоритмэхэр гъэфедэгъэнхэм мэхьанэ иIэу щыт, сиамалхэр згъэфедэнхэм — мэкъэ зэфэшъхьафхэр, образхэр ыкIи пкъыгъохэр, зэкIэ IофшIэным псынкIэу сыхэзыщэхэрэр ыкIи сыкъыхэзгъанэхэрэр. Iофыбэ зыщыIэ уахътэм ыкIи пшъэрылъыбэ зыщыуиIэм арэущтэу упсэуным ишIуагъэ къэкIо, — къыкIигъэтхъыгъ Олег Валерий ыкъом.

Экспертым студентмэ къафиIотагъ профессиональнэ хэхъоныгъэ зэрэпшIышъущтыр, гъэхъагъэмэ апае шIыкIэ-амалэу ищыкIагъэхэр. Анахьэу ынаIэ зытыридзагъэр унэе брендым игъэнэфэн  — хэхыгъэ образэу цIыфыр нэкъокъуалэмэ къахэзыгъэщырэр, ренэу IэпэIэсэныгъэм хэгъэхъэгъоныр.

ЗэIукIэм зэфэхьысыжь зыфашIым ыуж, ащ хэлажьэрэмэ упчIэхэр атынхэ алъэкIыгъ, чIыпIэу зытегущыIэхэрэмэ ялъытыгъэу хэкIыпIэхэр къызэдагъотыгъэх.