Мы мафэхэм Мыекъопэ къэралыгъо технологическэ университетым къэралыгъо ыкIи муниципальнэ къулыкъушIэхэр зыщырагъаджэхэрэ Гупчэу иIэм тедзэ программэу «Командэм шIуагъэ къытэу узэрэщылэжьэщтыр. Аудиторием Iоф зэрэдэпшIэщтыр ыкIи цIыфмэ апашъхьэ укъызэрэщыгущыIэщтыр» зыфиIорэмкIэ егъэджэнхэр щырагъэжьагъэх.

Шъолъырым игъэIорышIэпIэ Гупчэ ипащэу Къоджэшъао Казбек илекциекIэ программэр къызэIуахыгъ. Ащ игъэкIотыгъэу къэралыгъо хабзэм иIофшIэн медиа-лъэныкъом зэрэщыгъэпсыгъэр къыIотагъ, информационнэ хъоум къэралыгъо структурэхэр зэрэхэщагъэхэм ягугъу къышIыгъ.

Десэхэр лъигъэкIотагъ шъолъырым игъэIорышIэпIэ Гупчэ испециалист шъхьаIэу Лариса Берчуг. Ащ илекциехэм темэу яIагъэр: «Госпаблики как инструмент информирования и оптимизации работы в социальных сетях». Къэралыгъо пабликмэ ямэхьанэ, официальнэ сообществэмэ язытет, къэралыгъо хабзэм цыхьэу цIыфмэ къыфашIырэм, непэрэ екIолIакIэу щыIэхэр социальнэ хъытыухэм зэращагъэфедэхэрэр ащ къыIотагъэх.

Непэрэ гъэсэныгъэ программэр зыфытегъэпсыхьагъэр нэбгырэ пэпчъ ыкIи командэхэм хэхъоныгъэхэр ягъэшIыгъэнхэр ары. АНО «Платформа НТИ» зыфиIорэм и «Точка кипение» иотдел ипащэ игуадзэу Антон Артамкиным едзыгъуитIу зэрищагъ:

— «Эффект къытэу командэм узэрэхэзэгъэщтым ылъапсэр», ар шIуагъэ хэлъэу рабочэ процессхэр регъэкIокIыгъэнхэм фэгъэхьыгъ, пэрытым имэхьанэ, командэм чIыпIэу щиубытрэр;

— «ЦIыфмэ апашъхьэ укъэгущыIэным иискусствэ», ащ къыдыхэлъытагъэу еджакIомэ практическэ джэнджэшхэр агъотыгъэх, гумэкIым узэрэтекIощтым, аудиторием ынаIэ зэрэпIыгъыщтым фэгъэхьыгъ.

Программэр лъэшэу ашIогъэшIэгъон хъугъэ, профессиональнэ IофшIэнымкIэ къазэрэшъхьэпэщтым щэч хэлъэп.