Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ ректорэу Къуижъ Саидэ. Советым иIофшIэн хэлэжьагъ МКъТУ-м ипрезидентэу ТхьакIущынэ Аслъан.

Хабзэ зэрэхъугъэу повесткэм тегущыIэнхэм ыпэкIэ зимэфэкI мафэхэу профессорскэ-кIэлэегъэджэ купым хэтхэр къыхагъэщыгъэх, афэгушIуагъэх. Ащ ыуж апшъэрэ еджапIэм иупчIэ шъхьаIэмэ атегущыIагъэх.

Зэхафыгъэ Iофыгъохэм апшъэрэ чIыпIэр ащиубытыгъ профессорскэ-кIэлэегъэджэ купым хэтыщтхэм яхэдзын. Макъэу атыгъэхэмкIэ инженернэ факультетым идеканэу хадзыгъ Мэрэтыкъо Мурат, дунэе гъэсэныгъэмкIэ факультетым идекан хъугъэр Елена Базалинар ары. Джащ фэдэу кафедрэхэу университетым иехэм ыкIи ащ икъутамэхэм якафедрэхэм япащэхэр агъэнэфагъэх. Профессорскэ-кIэлэегъэджэ купым изэнэкъокъу елъытыгъэу дунэе гъэсэныгъэмкIэ факультетым щылэжьэщт кIэлэегъаджэхэри къыхахыгъэх, джащ фэдэу МКъТУ-м хэхьэрэ Дзэ егъэджэн гупчэм икIэлэегъаджэхэри аштагъэх. Университетым иподразделениехэу стратегическэ мэхьанэ зиIэхэр ащ фэдэ кадрэ зэхъокIыныгъэхэм агъэпытэх.

ШIэныгъэлэжьхэм ясовет иегъэджэн комиссие изэфэхьысыжьхэр къыгъэлъэгъуагъэх егъэджэн IофшIэнымкIэ проректорэу Людмила Задорожнаям. Комиссием илъэныкъо шъхьаIищ идоклад ащ къыщыхигъэщыгъэх. Зы лъэныкъор чIыпIэ нормативнэ базэр федеральнэ хэбзэгъэуцугъэ базэм ыкIи федеральнэ къэралыгъо гъэсэныгъэ шапхъэхэм адиштэу гъэпсыгъэныр. Мы лъэныкъомкIэ IофшIэнхэр агъэцэкIагъэх, ащ елъытыгъэу апшъэрэ еджапIэм иегъэджэн IофшIэн къэзыгъэпсырэ документхэр агъэкIэжьыгъэх. ЯтIонэрэ лъэныкъом пшъэрылъ-зэхэщэн Iофыгъохэр къыделъытэх, ащ фэшI шIэныгъэлэжьхэм ясовет изэхэсыгъо документхэу университетым истратегие къэзыгъэпсыхэрэр къыхалъхьагъэх: апшъэрэ еджапIэм Iоф зэришIэщтыр гъэнэфэгъэныр, гъэсэныгъэ программэхэр штэгъэнхэр ыкIи гъэлэжьэгъэнхэр, 2030-рэ илъэсым нэс лэжьэщт цифрэ трансформацием Iоф дэшIэгъэныр ыкIи нэмыкIхэр. Ящэнэрэ лъэныкъор зыфэгъэхьыгъэр егъэджэн-методическэ процессэу гъэсэныгъэ программэхэмкIэ аштагъэр гъэкIэжьыгъэныр ары, специалистхэм яIэпэIэсэныгъэ къэIэтыгъэнымкIэ ар IофыгъошIоу щыт.

Ащ къыкIэлъыкIоу къэгущыIагъ научнэ комиссием итхьаматэу, научнэ IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковар. БлэкIыгъэ еджэгъу илъэсым ащ зэфэхьысыжь къыфишIыгъ: научнэ-ушэтэкIо ыкIи инновационнэ IофшIэныр агъэлъэшыгъ, нормативнэ базэр агъэкIэжьыгъ, университетым хэхъоныгъэхэр егъэшIыгъэнхэмкIэ Программэр агъэцэкIагъ, джащ фэдэу Федеральнэ инновационнэ площадкэмэ ахэлэжьагъэх. Анахьэу анаIэ зытырагъэтыгъэ лъэныкъохэр — мэкъу-мэщ технологиехэр ыкIи экологиер.

ГъэсэкIо IофшIэнымкIэ доклад къышIыгъ ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Муратэ. Ащ къыхигъэщыгъ, университетым игъорыгъоу зэIукIэхэр ухъумэкIо органхэм ялIыкIохэм щадашIых, студенческэ советмэ зэдэлэжьэныгъэ пытэ адыряI. Программэу «Развивайся, создавай, совершенствуйся!» зыфиIорэм елъытыгъэу гукъэкIхэр атIупщыгъэх: пилот зэрымыс системэхэм афэгъэхьыгъэ форумыр, студенческэ стартапхэу «ИнноВекторым» иакселератор, гуфакIохэм ягъэхьазырын программэу «По зову сердца» зыцIэр ыкIи пэрытныгъэр къэзгъэлъагъорэ проектхэр. А лъэныкъохэм творческэ ыкIи социальнэ пшъэдэкIыжь зыхэлъхэм ягъэхьазырын щадэлажьэх.

ШIэныгъэлэжьхэм ясовет исекретарэу Цуамыкъо Сусаннэ шIэныгъэлэжьхэм ясовет IофшIэнэу 2025-2026-рэ еджэгъу илъэсхэм ателъытагъэу агъэцэкIэщтыр къыгъэнэфагъ. Университетым хэхъоныгъэ езыгъэшIырэ документхэр ыпэ рагъэшъых: егъэджэн процессыр гъэкIэжьыгъэныр, научнэ-ушэтэкIо базэр гъэпытэгъэныр, дунэе зэпхыныгъэхэм зягъэушъомбгъугъэныр, материальнэ-техническэ инфраструктуракIэр гъэпсыгъэныр, джащ фэдэу кадровэ ыкIи финансовэ политикэр зэтегъэпсыхьэгъэныр.

Университетым иматериальнэ-техническэ базэ еджэгъу илъэсыкIэм зэрэфэхьазырымкIэ доклад къышIыгъ административнэ-хъызмэт IофшIэнымкIэ проректорэу Пэрэныкъо Аслъанэ. Ащ къызэриIуагъэмкIэ гъэцэкIэжьын дэгъухэр рагъэкIокIыгъэх, инженернэ системэхэр агъэкIэжьыгъэх, антитеррористическэ, мэшIогъэкIуасэ ыкIи санитарнэ щынэгъончъэным фэгъэхьыгъэ лъэныкъохэр гъэтэрэзыгъэх.

Плановэ гъэIорышIэным ипащэу Екатерина Мельниковам университетым ифинансовэ-экономическэ лъэныкъо 2024-рэ илъэсым зыфэдагъэм зэфэхьысыжьхэр къыфишIыгъэх. Ащ къызэригъэлъэгъуагъэмкIэ МКъТУ-м хэхъоныгъэхэр ешIых: гъэсэныгъэ IофшIэным хэхъуагъ, бюджетым хэмыт мылъкоу къыфакIорэр нахьыбэ хъугъэ, финансовэ менеджментым ишапхъэхэр зыпкъ итых. .

УпчIэу «О внесении изменений в Положение о порядке планирования и распределения учебной нагрузки» зыфиIорэмкIэ къэгущыIагъ Инна Бочкаревар, егъэджэн процессым изэхэщэн имэхьанэ елъытыгъэу зэгъэзэфэжьыгъэн фаехэр къыхигъэщыгъэх.