Непэ Мыекъопэ къэралыгъо технологическэ университетым торжественнэ шIыкIэм тетэу хэушъхьафыкIыгъэ дзэ операцием хэлэжьагъэмэ япрофессиональнэ гъэхьазырын фэгъэхьыгъэ шъолъыр программэу «Къэралыгъо ыкIи муниципальнэ гъэIорышIэныр. Адыгеим и ЛIыхъужъхэр» зыфиIорэр къызэIуахыгъ.

Проектыр федеральнэ программэу «ЛIыхъужъмэ яуахът» зыфиIорэм къыдыхэлъытагъэу агъэцакIэ, ар Урысые Федерацием и Президентэу Владимир Путиным иунашъокIэ атIупщыгъ.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, Адыгэ Республикэм и Къэралыгъо Совет-Хасэм и Тхьаматэ игуадзэу Цэй Эдуард, Мыекъопэ къэралыгъо технологическэ университетым иректорэу Къуижъ Саид,  РАНХиГС-м и Къыблэ-Урысые институт гъэIорышIэн къутамэ ипащэ игуадзэу Алексей Барановыр, Урысыем иапшъэрэ еджапIэмэ яспикерхэр, программэм хэтыщтхэр.

Къэралыгъо хабзэм иорганхэм ыкIи муниципалитетхэм яIэпэчIэгъэнэ кадрэхэм ягъэнэфэн программэр фытегъэпсыхьагъ, джащ фэдэу хэушъхьафыкIыгъэ дзэ операцием хэлэжьагъэхэр ыкIи ветеранхэр пащэ IэнатIэхэм афэгъэхьазырыгъэнхэм.  Ахэр зыщагъэхьазырыщт чIыпIэу къафыхахыгъэр МКъТУ-р ары, мыщ къэралыгъо ыкIи муниципальнэ къулыкъушIэхэм яIэпэIэсэныгъэ зыщыхагъахъорэ Гупчэр щэлажьэ. Гъэсэныгъэ программэр университетым ыгъэхьазырыгъ, ащ гъусэгъоу иIагъэр РАНХиГС-р ары. МКъТУ-м ыцIэкIэ кураторэу проектым хэлажьэ научнэ IофшIэнымIкэ ыкIи инновационнэ хэхъоныгъэмкIэ проректорэу Татьяна Овсянниковар.

Программэм хэтыщтхэр едзыгъо-едзыгъоу зэтеутыгъагъэх: платформэу АНО «Урысыер — амалыбэхэм яхэгъэгу» зыфиIорэм апэ защарагъэтхыгъ (заявкэ 147-рэ къаIукIагъ), пэIудзыгъэ тестированиемкIэ фондэу «Хэгъэгум иухъумакIохэм» хихыгъэх, джащ фэдэу экспертнэ комиссим зэдэгущыIэгъоу адашIыгъэхэмкIи аштагъэх. Кандидатмэ ахэтыгъэхэр — хэушъхьафыкIыгъэ дзэ операцием иветеран 26-рэ. Зэфэхьысыжьхэм къызэрагъэлъэгъуагъэмкIэ, рагъэджэнхэу нэбгырэ 18 къыхахыгъ, къэралыгъо бгъэхалъхьэ 34-рэ зиIэхэри  ахэмэ ахэтых.

— ХэушъхьафыкIыгъэ дзэ операцием хэлажьэхэрэм, ветеранхэм ыкIи яунагъохэм анаIэ республикэм лъэшэу зэращытедгъэтырэр къыхэзгъэщынэу сыфай. ТидзэкIолIмэ ятыл зэрэпытэр зэхашIэным пае, тэ  тфэлъэкIыщтыр тэшIэ, ягупсэмэ ящыкIагъэр зэкIэ зэрядгъэгъотыщтым ренэу тыпылъ. Дзэ пшъэрылъхэр агъэцэкIэнхэмкIэ ащ фэдэ Iофтхьабзэмэ мэхьанэшхо яIэу щыт. Тидзэхэу республикэм щагъэхьазырхэрэми IэпыIэгъу тафэхъу, сыд фэдэрэ лъэныкъокIи тишIуагъэ ятэгъэкIы, дзэкIолIхэу тимамырныгъэ къэзыухъумэхэрэмэ язытет дэгъуным, зыми щымыкIэнхэм пае республикэм Iофтхьабзэ зэхэтхэр щагъэцакIэх,  — къыхигъэщыгъ Адыгеим и ЛIышъхьэ.

Апэрэ гъэсэныгъэ модулыр непэ атIупщыгъ. Программэм хэхьэх лекциехэр, мастер-классхэр ыкIи къэралыгъо политикэмрэ непэрэ къэралыгъо гъэIорышIэнымрэ афэгъэхьыгъэ тренингхэр. Расписанием хэтхэр — темэхэу урысые къэралыгъо гъэпсыкIэм, хэбзэ органхэм ясистемэ, къэралыгъо къулыкъум, шъолъыр ыкIи муниципальнэ гъэIорышIэным афэгъэхьыгъэхэр, джащ фэдэу IэпэIэсэныгъэм ыпшъэ кIорэ амалхэр ыкIи пащэ шэнхэр зэгъэгъотыгъэнхэмкIэ тренингхэр. Культурнэ-гъэсэныгъэ Iофтхьабзэхэр ыкIи патриотическэ акциехэр егъэджэн процессым къебэкIыщтых.

ЗэкIэмкIи гъэсэныгъэ программэр академическэ сыхьат 523-рэ къыхеубытэ. Егъэджэнхэр илъэсым къыкIоцI кIощтых ыкIи стажировкэхэу къэралыгъо ыкIи муниципальнэ органхэм ащакIущтхэмкIэ аухыщт. Университетым инаучнэ сообществэ щыщхэр ыкIи республикэм ихабзэ хэтхэр ахэм ягъэсакIохэу щытыщтых.

Проектэу «Адыгеим и ЛIыхъужъхэр» гъэIорышIэ-лIэужыкIэхэм ягъэхьазырынкIэ зы амалышIоу хъущт, хэгъэгум ыкIи шъолъырым хэхъоныгъэ ягъэшIыгъэным ахэр фэIорышIэщтых.