Мыекъопэ къэралыгъо технологическэ университетым и Медицинскэ институт истудентиблымэ егъэджэн практикэр гражданскэ авиацием иклиническэ сымэджэщ Гупчэ щахьыгъ.

Медицинэ шIэныгъэхэмкIэ докторэу, урологэу ыкIи онкологэу, гражданскэ авиацием иклиническэ сымэджэщ Гупчэ имедицинэ Iахь иврач шъхьаIэ игуадзэу, МКъТУ-м илечебнэ факультет икафедрэ ипащэу ПщыхьакIэ Ахьмэд ары практикэм ипэщагъэр.

Мы едзыгъом пшъэрылъ шъхьаIэу иIагъэр студентхэр медицинскэ учреждением инепэрэ зытет нэIуасэ фэшIыгъэнхэр ыкIи практическэ IэпэIэсэныгъэ ягъэгъотыгъэныр ары. Профильнэ отделениемэ яIофшIэн зэрэзэхэщагъэм студентхэр лъыплъагъэх, клиническэ къекIокIынхэм ахэлэжьагъэх, непэрэ мафэм сымаджэхэр зэрагъэхъужьыхэрэ шIыкIэхэу агъэфедэхэрэмэ защагъэгъозагъ.

Хэгъэгум исымэджэщ гупчэмэ ащыщ практикэр ащахьыныр зэхэт IофшIэнэу МКъТУ-рэ Шъолъыр общественнэ организациеу «Врачхэм я Хасэрэ» рагъэкIокIырэм ыпкъ къикIыгъ. Мы илъэсым игъэтхэпэ мазэ гражданскэ авиацием иклиническэ сымэджэщ Гупчэрэ Мыекъопэ къэралыгъо технологическэ университетымрэ зэзэгъыныгъэм зэдыкIэтхагъэх, научнэ-гъэсэныгъэ ыкIи медицинскэ амалэу шъолъырым иIэм хэхъоныгъэхэр егъэшIыгъэнхэр ары зэзэгъыныгъэм иапэрэ пшъэрылъыр. Врачхэм я Хасэ итхьаматэу, медицинэ шIэныгъэхэмкIэ докторэу, кIэлэцIыкIу хирургием ыкIи травмотологием и НИИ ыкIи псауныгъэр къэухъумэгъэнымкIэ Москва и Департамент штатым хэмыт инейрохирургэу Жанна Семёновам практикэр студентмэ ахьынымкIэ ишIогъэшхо къыгъэкIуагъ. 

Хэгъэгум имедицинскэ учреждение пэрытым опытэу къыщагъотыгъэр студентхэм япрофессиональнэ ухьазырныгъэкIэ амалышIоу щыт.