Мыекъопэ къэралыгъо технологическэ университетым къэралыгъо ыкIи муниципальнэ къулыкъушIэхэм якомпетенциехэм хэхъоныгъэ ягъэшIыгъэнымкIэ и Гупчэ къэралыгъо ыкIи муниципальнэ къулыкъушIэхэм яIэпэIэсэныгъэ хэгъэхъогъэным фэгъэхьыгъэ курсхэр щырагъэжьагъэх.

Iофтхьабзэм хэлажьэрэмэ шIуфэс къарихыгъ зэзэгъыныгъэ системэр зэгъэзэфэгъэнымкIэ Адыгэ Республикэм и Комитет итхьаматэ игуадзэу Сэмэгу Адамэ.

Курсым ипрограммэ къыделъытэ зэзэгъыныгъэ системэм инормативнэ-правовой базэ нахь куоу зэгъэшIэгъэныр, щэфыным епхыгъэ Iофтхьабзэхэр хабзэм диштэу зэрэбгъэзекIощтхэр, непэрэ мафэм диштэрэ практикэхэр зэгъэшIэгъэнхэр ыкIи нэмыкIыбэхэр.

Анахьэу анаIэ зытырадзэрэр административнэ хэбзэукъоныгъэхэм афэгъэхьыгъэ зэхъокIныгъэу Урысые Федерацием и Кодекс хэхъухьагъэхэр ары, ахэр гъэтхапэм и 1-м 2025-рэ илъэсым къыдэкIыгъэх. IофыгъуакIэм хэукъоныгъэу хашIыхьэхэрэмэ нахь чанэу зэралъыплъэщтхэ лъэныкъохэр ыгъэлъэшыгъэх, тазырхэм ахагъэхъуагъ, хэукъоныгъэу хашIыхьагъэм ихьылъагъэ елъытыгъэу мысагъэу афалъэгъущтыри нахь агъэхьылъэ. Адыгэ Республикэр адрэ шъолъырхэм афэдэу фай къэралыгъо Iофхэу щэфэным епхыгъэхэр зэIухыгъэхэу, ушъэфыгъэ ахэмылъэу щигъэтынхэм.

Спикерэу семинарым къыщыгущыIагъ экономикэ шIэныгъэхэмкIэ кандидатэу, доцентэу, юристэу, Къыблэ Федеральнэ университетым иэкономическэ факультет профессиональнэ гъэсэныгъэ тедзэм и Гупчэу иIэм ипащэу, инновациехэм ыкIи экономическэ технологиехэм я Фондэу «Содействие — XXI век» зыфиIорэм иучредителэу, сертифицированнэ кIэлэегъаджэу Гуцелюк Елена Федор ыпхъур.

МэфиплIым къыкIоцI Iофтхьабзэм хэлажьэхэрэмэ гъэсэныгъэ программэ игъэкIотыгъэр акIущт, ащ хэтых лекциехэр, практическэ десэхэр, зэзэгъыныгъэ системэм епхыгъэ зэхэгущыIэжьхэр.