Мы мафэхэм Москва Дунэе форумэу «Пилиот зимыIэ системэхэр: неущрэ мафэм итехнологиехэр» зыфиIорэр щыкIуагъ. Мыекъопэ къэралыгъо технологическэ университетым икомандэу форумым хэлажьэрэм ипащэр маркетингымкIэ, сервисымкIэ ыкIи туризмэмкIэ кафедрэм идоцентэу, «Точка кипением» ипрограммнэ пащэу Светлана Новиковар ары.

Форумым къеблэгъэгъэ къэралыгъо IофышIэхэр, зэлъашIэрэ шIэныгъэлэжьхэр, апшъэрэ еджапIэхэм ыкIи технологическэ компаниехэм ялIыкIохэр отраслым хэхъоныгъэ егъэшIыгъэным фэгъэхьыгъэ зэхэсыгъо-зэхэгущыIэжьым хэлэжьагъэх. Анахьэу зытегущыIагъэхэр пилот зэрымыс транспортнэ ыкIи сервиснэ системэхэр къэугупшысыгъэнхэр ыкIи гъэлэжьэгъэнхэр, ахэмэ ящынэгъончъагъэ, япхыгъэ хэбзэгъэуцугъэхэр гъэпсыгъэнхэр, ары. Джащ фэдэу дунэе зэфыщытыкIэ-зэдэлэжьэныгъэу ЕвразЭС, БРИКС ыкIи ШОС адыряIэхэм зырагъэушъомбгъунхэр ягухэлъ.

Урысые Федерацием и Президентэу Владимир Путиным форумым хэлажьэрэмэ закъызыфегъазэм къыхигъэщыгъ, непэрэ уахътэм диштэрэ пилот зэрымыс технологиехэр сферэ зэфэшъхьафхэм ащагъэфедэнхэу зэрэщытыр: мэкъу-мэщым къыщегъэжьагъэу энергетикэм, псэолъэшIыным ыкIи къэлэ хъызмэтым анэсыжьэу.

Технопаркэу «Сколковэм» щыкIогъэ къэгъэлъэгъоныр бэмэ ашIогъэшIэгъоныгъ, ащ щалъэгъугъэх автономнэ мэшIокухэр, комбайнэхэр, дронхэр, роботизированнэ комплексхэр ыкIи нэмыкI инновационнэ пкъыгъохэу экономикэм хэхъоныгъэ езыгъэшIыхэрэр.

КъычIахьэрэмэ апае  экспонат 700-м ехъу агъэхьазырыгъ, компание 100-м ехъу хэлажьэ, ахэр мыщ фэдэ лъэныкъохэмкIэ мэлажьэх: мэкъу-мэщыр ыкIи мэз хъызмэтыр, псэолъэшIыныр, чIыдэгъэ-энергетическэ комплексыр, щынэгъончъэныр, сатыур, транспортыр ыкIи къэлэ хъызмэтыр.

Экспозициер IахьитIоу гощыгъэ: сценарнэр — Технопаркэу «Сколковэм» ыкIи стендовэр —  бизнес-гупчэу «Амальтеям» ащыIэх.

Мыщ фэдэ Iофтхьабзэу мэхьанэшхо зэратырэм МКъТУ-р зэрэхэлажьэрэм джыри зэ къегъэлъагъо тиуниверситет инновациехэм зэрадэлажьэрэр, апэрэхэм ащыщыным зэрэфэбанэрэр, технологиякIэхэм зэрадыригъаштэрэр ыкIи неущрэ мафэм игъэпсын чанэу зэрэпылъыр.