Мыекъопэ къэралыгъо технологическэ университетым маркетингымкIэ, сервисымкIэ ыкIи туризмэмкIэ кафедрэм идоцентэу, «Точка кипением» ипрограммнэ пащэу Светлана Новиковам Урысые Федерацием иупчIэжьэгъоу, форумэу «ЦIыф лъэшхэр лъэхъанэ лъэшым пае» зыфиIорэм изэхэщакIоу Антон Кобяковым ирэзэныгъэ тхылъ къыIукIагъ. Светлана Новиковам IофшIэнышхо зэришIагъэм, лъэпкъ премиеу «Хэгъэгур зэблэзыхъурэр цIыфхэр ары» зыфиIоу я V-рэ Форумэу «ЦIыф лъэшхэр лъэхъанэ лъэшым пае» зыфиIорэм чанэу зэрэхэлэжьагъэм афэшI къыхагъэщыгъ.

— Шъо — зэхъокIыныгъэшIухэр лъызгъэкIуатэхэрэр, цIыфхэу зигукъэкIхэр хэгъэгум илъ щыIэкIэ-псэукIэм занкIэу езыпхыхэрэр, шъуащыщ пэпчъ — пшъэдэкIыжьым, IэпэIэсэныгъэм, шъушIэрэмэ шIошъхъуныгъэу афышъуиIэм шъурящыс, нахьышIум дунаир фэшъогъазэ. Лъэпкъ премиеу АСИ «Хэгъэгур зэблэзыхъурэр цIыфхэр ары» зыфиIорэр УФ-м и Президент иунашъо елъытыгъэу рагъэкIокIы, Фондэу Росконгрессыр игъус, иIэпыIэгъухэр ВЭБ.РФ, Хэгъэгур къэухъумэгъэнымкIэ Урысыем и Министерствэ, фондэу «Хэгъэгум иухъумакIохэр» ыкIи Урысыем культурэмкIэ и Министерствэ. Непэ тэ пшъэрылъэу тиIэр гугъуемылIыныгъэ зиIэ цIыфхэу Iофхэм чанэу ахэлажьэхэрэр — мафэ къэс зиIофшIэнкIэ обществэм хэхъоныгъэ егъэшIыгъэным зиIахьышхо хэзылъхьэхэрэм, гъэсэныгъэр, экологиер лъызгъэкIуатэхэрэр  къыхэдгъэщынхэр ары. Джащ фэдэу предпринимательствэр ыкIи технологическэ суверенитетэу хэгъэгум иIэр зыгъэпсыхэрэр. Шъо шъуипроектхэм ыкIи шъуигукъэкIхэм Урысыем итеплъэ заблахъу, ар неущрэ мафэм нахь фытегъэпсыхьагъэ мэхъу.

Мы премиер лъэубэкъу шIагъоу тапэкIэ хэхъоныгъэ шъозгъэшIыщтхэм ащыщэу шъуфэрэхъу, гукъэкIыкIэхэм шъуаферэщ, хэгъэгум къышъхьэпэщт IофыгъуакIэхэм шъуатырерэгъэпсыхь, — къыщеIо рэзэныгъэ тхылъым.

Светланэ Константин ыпхъум тыфэгушIо итекIоныгъэкIэ! ТапэкIэ джыри иIэпэIэсэныгъэ хигъэхъонэу, гъэхъэгъакIэхэр ышIынхэу тыфэлъаIо!