Къэралыгъо фондэу «Хэгъэгум иухъумакIохэр» зыфиIорэр ыкIи обществэу «ШIэныгъэм» Урысые акциеу «Хэгъэгум къулыкъу фэсэхьы» зыфиIорэм шъолъырыр чанэу хэлажьэ. Ащ къыдыхэлъытагъэу тиреспубликэ ащыIокIэх хэушъхьафыкIыгъэ дзэ операцием хэлажьэхэрэм ыкIи иветеранхэм, яхэгъэгу шIу алъэгъоу ныбжьыкIэхэр зэрапIущтхэм а Iофтхьабзэхэр афэIорышIэх.

Ошъогу-десантнэ дзэхэм ямафэ фэгъэхьыгъэ Iофтхьабзэр джащ фэдэ тематическэ патриотическэ зэIукIэу хъугъэ. Запасым щыIэ подполковникэу, хэушъхьафыкIыгъэ дзэ операцием я 20-рэ гуфэкIо отрядэу «Барсым» хэтэу хэлэжьагъэу, ЛIыхъужъныгъэм иорден къызфагъэшъошагъэу Андрей Васнецовыр Донецкэ народнэ республикэм икIэлэеджакIохэм аIукIагъ, гущыIэгъу афэхъугъ. КIэлакIэхэр гъэсэныгъэ-туристическэ программэу «Университетскэ сменэхэр» зыфиIорэм елъытыгъэу Адыгеим къэкIуагъэхэу щыIэх.

Гъэмэфэ каникулхэр ныбжьыкIэмэ Мыекъопэ къэралыгъо технологическэ университетым щагъакIо, ащ гъэсэныгъэ, культурнэ-зыгъэпсэфыгъо ыкIи туристическэ программэхэр ащакIух.

Iофтхьабзэр мэз-зыгъэпсэфыпIэ паркэу Мэздахэм щызэхащагъ, ащ кIэлэеджакIохэр нахь гупсэфэу Iофтхьабзэм щыхэлэжьагъэх, ветераным упчIэ гъэшIэгъонхэр щыратыгъэх.

Андрей Владимир ыкъор игукъэкIыжьхэмкIэ къадэгощагъ, хэушъхьафыкIыгъэ дзэ операцием имэхьанэ, патриотизмэр къызэрэбгурыIощтыр, пшъэдэкIыжьэу ахьырэр зыфэдэр, нэмыкI лъэныкъуабэхэу хэгъэгум икъэухъумэн фэгъэхьыгъэхэр къафиIотагъэх.

ХэушъхьафыкIыгъэ дзэ операцием Андрей Васнецовыр снайпер-разведчикэу хэтыгъ, ащ ыуж взводым икомандирыгъ, етIанэ ротэм икомандирыгъ, ащ къыкIэлъыкIоу — отрядым иштаб ипащэу щытыгъ. ЛIыгъэшхо къызэрэхэфагъэм фэшI, Андрей Владимир ыкъом ЛIыхъужъныгъэм иорден къыфагъэшъошагъ.

 — Сэ IофыгъошIоу сэлъытэ ныбжьыкIэхэм сазэрэIукIагъэр, хэгъэгум фэлэжьэгъэнымкIэ опытэу сиIэр зэрадэсгощыгъэр. ЗэкIэми къагурыIонэу сыфай, Хэгъэгур къэуухъумэныр — ар пшъэдэкIыжь къодыеп, тинарод ыпашъхьэкIэ тхьырэ пшъэдэкIыжьышху. Тызэкъотхэмэ, тызэгъусэхэмэ, сыд фэдэрэ къиныгъуи тапэшIуекIон тлъэкIыщт. ТиIэпэIэсэныгъэрэ тищысэрэ ныбжьыкIэхэм къадеIэнхэу, япатриотизмагъэ хагъэхъонэу къысщэхъу, арэуи орэхъу. Джащыгъум тикъэралыгъо тыфэрэхьатыщт,— къыIотагъ Андрей Владимир ыкъом.

Акциеу «Хэгъэгум къулыкъу фэсэхьы» зыфиIорэм къыдыхэлъытагъэу обществэу «ШIэныгъэм» къыгъэхьазырыгъэ хэушъхьафыкIыгъэ мастер-лекциехэр рагъэкIокIыщтых, ащ хэтыщтых мыщ фэдэхэр: «Хэгъэгум къулыкъу фэпхьыныр: зы лIэужым лIэужыр къыкIэлъыкIоу» зыцIэр, лIыхъужъыгъэм ищысэхэр къыщахьыхэу, тарихъыр къыраIотыкIэу ыкIи нэмыкIхэр.