Мыекъопэ къэралыгъо технологическэ университетым федеральнэ проектэу «Производительность труда» зыфиIорэм елъытыгъэу сакъыныгъэ гъэIорышIэным фэгъэхьыгъэ IофшIэныр лъегъэкIуатэ.

Ащ ыпэкIэ мыщ фэдэ проектхэр зыщагъэцакIэхэрэ апшъэрэ еджэпIитфэу Урысыем къыщыхахыгъэхэм тиуниверситет ахэфагъ. ШIэныгъэмрэ гъэсэныгъэмрэкIэ УФ-м и Министерствэ ыкIи ФГАНУ «Социоцентр» зыфиIорэм ялIыкIохэр МКъТУ-м къызэрэкIогъагъэхэм къегъэлъагъо мэхьанэ зиIэ площадкэу ар зэрэхъугъэр, апшъэрэ еджапIэм иIофшакIэ нахьышIум ылъэныкъокIэ хэхъоныгъэхэр зэришIыхэрэр.

Университетым егъэджэн гупчэу «Фабрика процессов» зыфиIорэр щэлажьэ, ащ ухьазырыныгъэр Урысыем ишъолъыр 25-мэ къарыкIыгъэ нэбгырэ мини 4-мэ щакIугъ, проектэу «Сакъыныгъэ апшъэрэ еджапIэр — МКъТУ» зыфиIорэм лъэныкъуабэ къызэлъеубыты: еджэнымрэ научнэ IофшIэнымрэ къащыублагъэу административнэ процессхэм анэсыжьэу. Университетыр 2018-рэ илъэсым къыщегъэжьагъэу апэрэ сакъыныгъэ апшъэрэ еджапIэу алъытэгъагъ, 2021-рэ илъэсым къыщыублагъэу МКъТУ-м Федеральнэ инновационнэ площадкэу «LeanSkills.lab» зыфиIорэр щэлажьэ.

Мы мафэхэм компетенциехэм я Федеральнэ гупчэ илIыкIохэр зыхэлэжьагъэхэ зэхэсыгъор рагъэкIокIыгъ, ар IофшIэным хэхъоныгъэхэр егъэшIыгъэнхэм афэгъэхьыгъагъ.

Зэхэсыгъом хэлэжьагъэх МКъТУ-м иректорэу Къуижъ Саидэрэ университетым ипащэхэмрэ проектнэ командэхэмрэ. ФЦК-м ылъэныкъокIэ хэлэжьагъэхэр: отраслевой IофшIэнымкIэ ыкIи методологиемкIэ отделым ипащэу Екатерина Николенко, социальнэ сферэм ылъэныкъокIэ проектхэм ягъэцэкIэн дэлэжьэрэ отделым иупчIэжьэгъухэу Алексей Хлюстовыр ыкIи Дмитрий Ивановыр.

ШIуфэс псалъэкIэ зэхэсыгъом хэлажьэрэмэ закъыфигъэзагъ МКъТУ-м иректорэу Къуижъ Саидэ. ФЦК-м илIыкIохэмкIэ — Екатерина Николенко, Алексей Хлюстовыр ыкIи Дмитрий Ивановыр — ахэмэ апшъэрэ еджапIэм икомандэ зэрэфэразэхэр къыхагъэщыгъ, сакъыныгъэ технологиехэм чанэу зэрадэлажьэхэрэмэ афэшI.

Зэхэсыгъом къыдыхэлъытагъэу ректорэу Къуижъ Саидэ Казбек ыпхъум докладэу «Формирование системы бережливого управления в МГТУ» зыфиIорэм лъэтегъэуцо фишIыгъ, ащ пшъэрылъхэмрэ системэм инеущрэ мафэрэ зыфэдэщтхэр къыщыкIигъэтхъыгъэх.

Сакъыныгъэ проектхэм язэфэхьысыжь-докладхэр зэхэсыгъом къыщызышIыгъэ доцентхэр: Ирина Селивановар, Елена Кучинскаяр, Мария Галичевар, Галина Кадакоевар. Предложениеу къахьыгъэхэм ащыщхэр — документхэм ягъэхьазырын уахътэу пагъэкIуадэрэр нахь макIэ шIыгъэныр, кIэзышIыкIыжьырэ операциехэр щыгъэзыегъэнхэр ыкIи зэкIэхэмкIи нафэу хъурэ Iофтхьабзэхэм зягъэушъомбгъугъэныр.

Зэхэсыгъом хэлажьэрэмэ егъэджэн семинарэу «Фабрика процессов» зыфиIорэр зэрагъэлъэгъугъ, ащ имитационнэ егъэджэным иметодикэу щагъэфедэрэм нэIуасэ щыфэхъугъэх, проектнэ офисэу «Сакъыныгъэ зиIэ апшъэрэ еджапIэр — МКъТУ» зыфиIорэм рабочэ сессиер щырагъэкIокIыгъ.

IэпэIэсэныгъэу агъотыгъэм ыкIи методологическэ IофшIэным яшIуагъэкIэ, МКъТУ-р непэ —федеральнэ площадкэ пэрытэу апшъэрэ гъэсэныгъэ зыщарагъэгъотырэхэмкIэ сакъыныгъэ практикэр зыщагъэцакIэрэмэ ащыщэу хъугъэ. ФЦК-м илIыкIомэ зэраIукIагъэхэр ащ къыкIэлъыкIуагъ, джыри мы лъэныкъомкIэ IофшIэнхэр гъэлъэшыгъэнхэм афэIорышIэщт.