Мы мафэхэм МГУ-м чIыгугъэпсынымкIэ ифакультет я II-рэ Дунэе ныбжьыкIэ форумэу «Structural and Functional Unity of Soils and Adjacent Environments» зыфиIорэр щыкIуагъ Ащ къыугъоигъэх ушэтэкIо ныбжьыкIэхэр — аспирантхэу, магистрантхэу ыкIи студентхэу Султан Кабус университетым (Султанат Оман), Мыекъопэ къэралыгъо технологическэ университетым ыкIи Московскэ къэралыгъо университетым ащеджэхэрэр.

Форумым къыдыхэлъытагъэу анахьэу анаIэ зытырадзагъэр Университетэу Султан Кабусым (Оман) илIыкIо куп ары: зэдэгущыIэгъухэр зэдэлэжьэныгъэмкIэ дунэе научнэ-гъэсэныгъэм ылъэныкъокIэ зэдашIыгъэх; МКъТУ-м иректорэу Къуижъ Саидэ ыцIэкIэ шIухьафтынхэр  Оман къэкIыгъэхэм аратыгъэх.

МКъТУ-м ыцIэкIэ форумым хэлэжьагъэхэр: гъомлэпхъэ технологиехэм ыкIи шхыныгъохэм ягъэхьазырын икафедрэ ипащэу Хъоткъо Зурет; конституционнэ гъэпсынымкIэ ыкIи къэралыгъо, муниципальнэ гъэIорышIэнымкIэ икафедрэ ипащэу Болэкъо Мариэтта; шIэныгъэлэжь IофышIэу Кудайнет Саида; ТОП-31-рэ купым хэхьэгъэ студентэу ЖакIэмыкъо Темыркъан.

Научнэ программэм ылъапсэр дисциплинэ зэхэпхъагъэхэр ары, непэрэ мафэм агъэфедэрэ лъэныкъохэм афэгъэхьыгъ, чIыгугъэпсыным, ащ дэлэжьэгъэным пае шIэгъэн фае Iофыгъохэм. Iофтхьабзэм игукъэкI шъхьаIэр: «ЧIыгум ипсауныгъэ — къэкIыхэрэм ыкIи былымхэм — шхыныгъохэр — псауныгъэм икъэухъумэн».

Форумым хэлэжьагъэхэр лекциемэ ядэIугъэх, шъоф дэкIыгъохэм, мастер-классхэм ахэлэжьагъэх, ахэр зезыщагъэхэр МГУ-м, МКъТУ-м, ВГЛТУ-м ыкIи Университетэу Султан Кабусым (Оман) яспециалистхэр ары.

Анахьэу анаIэ зытырагъэтыгъэр къэлэ шъолъырхэм яэкологическэ гумэкIыгъохэр, биозэмылIэужыгъохэм алъыплъэгъэнхэр, биополимерхэр (пектинхэр) гъомлэпхъэ промышленностым, медицинэм ыкIи косметологием ащыгъэфедэгъэнхэр ары. 

— Непэрэ мафэм, сыд фэдэрэ уахъти фэмыдэу, анахь мэхьанэ зиIэр шIэныгъэхэмкIэ узэхъожьыныр, пшIэрэр нэмыкIым ептышъуныр ары, ащ дакIоу зэпхыныгъакIэхэр бгъэпсынхэ, лъэныкъо зэфэшъхьафхэмкIэ специалистхэр зэдэгъэлэжьэгъэнхэм къыфэщэгъэнхэ фае. Дунэе научнэ зэпхыныгъэхэр гъэпсыгъэнхэмкIэ форумыр платформэ дэгъу дэдэ хъугъэ,  — форумым иIофшIэн зыфэдагъэр къытфиIотагъ профессорэу, биологическэ шIэныгъэхэмкIэ доцентэу, физикэмкIэ ыкIи чIыгум имелиорациемкIэ кафедрэм ипащэу Аминат Умаровам.

Рэзэныгъэ гущыIэхэр тыгу къыддеIэу апэтэгъохых профессору Аминат Умаровам, джащ фэдэу физикэмкIэ ыкIи чIыгум имелиорациемкIэ кафедрэм иIофышIэ куп дэгъу дэдэу форумыр зэрэзэхащагъэм пае! ТапэкIэ джыри гъэхъагъэхэр ашIынхэу тафэлъаIо!