Мыекъопэ къэралыгъо технологическэ университетым апэрэ сменэр щатIупщыгъ, ар Урысые программэу «Университетскэ сменэхэр» зыфиIорэм къыдыхэлъытагъ — проект ин, УФ-м и Президентэу В.В. Путиным иунашъо елъытыгъэу зэхащэ.

Апшъэрэ гъэсэныгъэмрэ наукэмрэкIэ УФ-м и Министерствэрэ кIэлэцIыкIухэм ыкIи ныбжьыкIэхэм я Урысые движениеу «Апэрэхэм я Движение» зыфиIорэмрэ Iофтхьабзэм изэхэщакIох.

Мыекъопэ къэралыгъо технологическэ университетыр сменитIур зыщыкIощтымкIэ апэрэ площадкэ хъугъэ:

— апэрэр бэдзэогъу мазэм и 17-м къыщыублагъэу и 26-м нэс кIощт;

— ятIонэрэр бэдзэогъум и 27-м къыщегъэжьагъэу шышъхьэIум и 5-м нэс.

Университетым кIэлэеджэкIо 48-рэ ригъэблэгъагъ, илъэс I4-17 зыныбжьыхэр. Ахэр Урысыем исубъектыкIэхэм ащыпсэурэ сабыих: Белгородскэ, Курскэ ыкIи Брянскэ хэкум ащыщых, хэушъхьафыкIыгъэ дзэ операцием хэлажьэрэмэ якIалэх, зэнэкъокъум пхырыкIыгъэ закIэх. МКъТУ-м иапэрэ сменэ къеблэгъагъэхэр Донецкэ Народнэ Республикэм къикIыгъэх — къ. Горловкэм ыкIи къ. Иловайскэм.

Торжественнэ зэхахьэр Iахьищэу гощыгъэ, ары пэпчъ амалыкIэхэр къызэIуехых, университетыр зыфэдэр зэхыуагъашIэ.

«Апэрэ нэплъэгъур» — экскурсионнэ Iахьэу МКъТУ-р къарагъэплъыхьагъ, ар апшъэрэ еджапIэм икIэлэегъаджэхэмрэ иIофышIэхэмрэ зэшIуахыгъ. КIэлакIэхэр университетым итарихъ щагъэгъозагъэх, ащ инепэрэ практикэхэм, студенческэ инфраструктурэм. Экскурсионнэ гъогоу агъэнэфагъэр: МКъТУ-м и Президентэу ТхьакIущынэ Аслъан имузей; процессхэм я Фабрик; «Мавританскэ щагу»; Аккредитационнэ-симуляционнэ гупчэу Медицинскэ институтым иIэр; МКъТУ-м и Студенческэ хъоу.

«Университетскэ сменэхэм» ахэлажьэхэрэм торжественнэ зэхахьэр къяжэщтыгъэ. ГущыIэ фабэхэр кIэлакIэмэ апэзгъохыгъэхэр:

— Евгений Лебедевыр, гъэсэныгъэмрэ шIэныгъэмрэкIэ АР-м иминистр;

— Къуижъ Саид, МКъТУ-м иректор, обществэу «ШIэныгъэм» и Адыгэ шъолъыр къутамэ итхьамат;

— Анзэрэкъо Аслъан, Апэрэхэм я Движение ишъолъыр къутамэ итхьаматэ игуадз;

— Людмила Красновар, сменэм икIэлэегъэджэ-психолог, МКъТУ-м ипсихологическэ къулыкъу ипащ.

Проектым игъэцэкIэн зыпшъэ дэкIырэр МКъТУ-м чIэхьащтхэм ягъэхьазырынкIэ ыкIи сэнэхьатхэм якъыхэхынкIэ Гупчэм ипащэу Олег Франко. Ащ игущыIэхэм программэм ипшъэрылъхэр ащ къыщиIотэгъэх, сменэм ихъугъэ-шIэгъэ шъхьаIэу щытыщтхэр къыIопщыгъэх, авторскэ буклетэу «Пицца профессий: ингредиенты успеха» зыфиIорэм лъэтегъэуцо къыфишIыгъ, ар сменэм хэлажьэрэмэ мафэ къэс хагъэхъощт.

Зэхахьэм фэбагъэ хэлъэу зы Iахь щырекIокIыгъ, ныбжьыкIэхэу къызыхъугъэ мэфэкIхэр хэзгъэунэфыкIыхэрэмэ шIухьафтынхэр араратыгъэх , ахэмэ афэгушIуагъ МКъТУ-м иректорэу Къуижъ Саидэ.

ЗэIукIэм икIэухым зэгъусэхэу орэдэу «Изгиб гитары желтой» зыфиIорэр къызэдаIуагъ, ащ зэкIэхэри зэрипхыгъэх.

Торжественнэ Iахьым ыуж ныбжьыкIэхэр факультетмэ ядеканхэм аIукIагъэх. Студенческэ щыIакIэр зыфэдэр, лъэныкъоу зэрэрагъаджэхэрэр деканмэ къафаIотагъ.

Программэм дырагъаштэ — гъэсэныгъэмрэ шIэныгъэмрэкIэ АР-м и Министерствэ, обществэу «ШIэныгъэм» и Адыгэ шъолъыр къутамэ, Урысые движениеу «ГуфакIохэр-медикхэр», ГБУК РА «Адыгэ Республикэм и Лъэпкъ музей», КъокIыпIэ лъэпкъхэм я Къэралыгъо музей Темыр-КавказымкIэ икъутам, шъолъырым ифэшъхьаф организациехэр ыкIи предприятиехэр.

НыбжьыкIэмэ шIэныгъакIэхэр агъотынхэу, тиреспубликэ дэгъоу зыщагъэпсэфынэу тафэлъаIо! Мыекъопэ къэралыгъо технологическэ университетыр мы проектышхом иIахь зэрэхилъхьэрэм ыкIи зэрэхэлажьэрэм, иопыткIэ зарэдэгуащэрэм мэхьанэшхо иIэу щыт.