Москва и Лъэпкъ гупчэу «Урысыер» зыфиIорэм къэ къэс зэхащэрэ форумэу «ГукъэкI лъэшхэр непэрэ мафэм пае» зыфиIорэр щыкIуагъ. Форумым 2020-рэ илъэсым къыщыублагъэу Iоф ешIэ. А уахътэм къыкIоцI гукъэкI мини 120-м ехъу атыгъах. Хэгъэгум ишъолъыр зэфэшъхьафхэм ащыпсэурэ шIэныгъэлэжьмэ гукъэкI 35 000 къагъэлъэгъуагъ.

Адыгэ Республикэм ыцIэкIэ гукъэкI 68-рэ атыгъэмэ, ащ щыщэу 44-р Мыекъопэ къэралыгъо технологическэ университетым ыкIи ащ икъутамэу Яблоновскэм дэтым якIэлэегъаджэхэмрэ ястудентхэмрэ агъэхьазырыгъэх.

— Секциеу «Лъэпкъ социальнэ инициативэм» пае лъэныкъо 15 къагъэлъэгъуагъ. Республикэм и 35-м щыщэу  МКъТУ-м заявкэ 23-рэ  ытыгъэр.

— Секциеу «Лъэпкъ предпринимательскэ инициативэм» — республикэмкIэ 7, ащ щыщэу заявки 5-р университетым ыцIэкIэ атIупщыгъ.

— «Лъэпкъ технологическэ инициативэхэм» къадыхэлъытагъэу — 13-м щыщэу 9-р МКъТУ-м къыгъэлъэгъуагъэх.

— «Лъэпкъ кадровэ инициативэхэмкIэ» — 4-м щыщэу 2-р университетым ытыгъэх.

— Лъэныкъоу «Лъэпкъ экологическэ ыкIи климатическэ инициативэхэр» зыфиIорэмкIэ — республикэм ытыгъэ заявки 7-м щыщэу 5-р университетым ыгъэхьазырыгъэх.

Форумэу «ГукъэкI лъэшхэр непэрэ мафэм пае» зыфиIорэм изыфэгъэхьазырын МКъТУ-м зыщырагъэжьагъэр 2025-рэ илъэсым имэлылъфэгъу маз. Форумым иоператорэу университетым щыфэхъугъэр МКъТУ-м и «Точка кипение» икоманд ары. Ащ IофшIэнышхо ыгъэцэкIагъ гукъэкIхэр къэугупшысыгъэнхэмкIэ,  адэлэжьэжьыгъэнымкIэ.

Университетыр  форумым къыщызгъэлъэгъуагъэхэрр МКъТУ-м хэхьэрэ Дзэ егъэджэн гупчэм ипащэу Нурлан Самадьяновымрэ тарихъ шIэныгъэхэмкIэ кандидатэу ыкIи Яблоновскэ щыIэ къутамэм икафедрэ идоцентэу Жанэ Саниет.

— Урысые Федерацием и Президентэу Владимир Путиныр пленарнэ зэхэсыгъом зэрэхэлэжьагъэр анахь хъугъэ-шIэгъэ шъхьаIэ хъугъэ. Ащ къыкIигъэтхъыгъ, форумым ипшъэрылъышхор — Урысыем щыпсэурэ цIыфхэм ясэнаущыгъэ икъыхэгъэщын ары, — къыддэгощагъ Нурлан Мураткан ыкъор.

Саниет Рамазанэ ыпхъум проектэу «Лъэпкъ-культурнэ рестораннэ комплексэу «ХьакIэщ щагу» зыфиIорэр МО «Афипскэ къоджэ псэупIэр» Адыгэ Республикэр» зыфиIорэр къыгъэлъэгъуагъ, ар секциеу «Сохранение, актуализация и продвижение гастрономических традиций народов России» зыфиIорэм къыдыхэлъытэгъагъ, лъэныкъор: «Лъэпкъ социальнэ инициативэр».

— Форумым тызэрэхэлэжьагъэр — ар тигукъэкIхэмкIи, тэ тшъэхьэкIи зыкъыщыдгъэлъэгъонымкIэ Iофыгъошхоу щыт, джащ фэдэу инновационнэ гукъэкIэу тиIэхэми ашъхьэ къащитхышъугъ.  Адыгэ Республикэр анахь дэгъу лъэныкъохэмкIэ ядгъэшIэным, шъолъырым ис лъэпкъмэ якультурэ икъэухъумэнымкIэ шIуагъэ къэзытырэ Iофэу зэрэщытым тегъэгушхо. IэпэIэсэныгъэ зыхэлъхэу, IофыгъуакIэхэм афэщэгъэ цIыфхэмэ мы форумым зыщаушэтын алъэкIыщт, ащ фэдэ шIыкIэмэ тикъэралыгъо зэхъокIныгъошIухэр фашIы,  — къыхигъэщыгъ ащ.

Университетыр анахьэу зэрыпагэрэмэ ащыщ МКъТУ-м икIэлэегъаджэу Андрей Собкаловым ипроект — «Регенеративная симбиотическая биоэкономика и природоподобное фермерство для развития сельских территорий, роста демографии и здоровьесбережения» зыфиIорэр, ар ТОП-1000 зыфиIорэ анахь дэгъухэм ахэхьагъ.

Форумэу «ГукъэкI лъэшхэр непэрэ мафэм пае» зыфиIорэр гъэ къэс рагъэкIокIы УФ-м и Президент иунашъоу «№ 899-у  тыгъэгъазэм и 8-м 2022-рэ илъэсым къыдэкIыгъэм елъытыгъэу. А хъугъэ-шIэгъэ иныр зыфытегъэпсыхьагъэр урысые гражданхэу гукъэкI гъэшIэгъонхэр зиIэхэр къыхэгъэщыгъэнхэр ыкIи ахэр щыIэныгъэм щыпхырыщыгъэнхэр ары ыпэ рапшIэу, ащ къыкIэлъэкIо хэгъэгум исуверенитет гъэпытэгъэныр, лъэпкъ пшъэрылъхэр пхырыщыгъэнхэр.

Мы Iофтхьабзэм экономикэм, гъэсэныгъэм, къэлэ Iофхэм ыкIи экологием, технологическэ ыкIи социальнэ хэхъоныгъэм фэбанэхэрэ цIыф пэрытхэмрэ экспертхэмрэ зэрепхых, гукъэкIхэмрэ проектхэмрэ ядэгъугъэ зэхефы. Мыгъэ Iофтхьабзэм нэбгырэ 1500 хэлэжьагъ, ахэр зэфэшъхьаф хэгъэгухэм къарыкIыгъэх: Германием, Индием, Казахстан, ОАЭ, Республикэу Кипр, Урысыем, США, Тыркуем, Узбекистан, Швейцарием. Организацие 600 къэзгъэлъэгъорэ нэбгырэ 800-р урысые ыкIи IэкIыб бизнесым ялIыкIох, губернаторых ыкIи республикэ пащэх. Къыхэгъэщыгъэн фае, онлайн-трансляцием нэбгырэ млн. 2,5-рэ еплъыгъэх.