Москва торжественнэ шIыкIэм тетэу апэрэ Лъэпкъ премиеу «Хэгъэгур цIыфхэр ары зэзыхъокIырэр» зыфиIорэм илауреатхэр къыщыхагъэщыгъэх. ТекIоныгъэ къыдэзыхыгъэмэ ащыщ МКъТУ-м маркетингымкIэ, сервисымкIэ ыкIи туризмэмкIэ икафедрэ идоцентэу, «Точка кипением» ипрограммнэ пащэу Светлана Новиковар.

Къэралыгъом илIышъхьэ иунашъокIэ стратегическэ инициативэхэм IэпыIэгъу афэхъугъэнхэм я Агенствэрэ Фондэу «Росконгрессымрэ», ахэмэ ягъусэхэу ВЭБ.РФ-р, ухъумэнымкIэ Урысыем и Министерствэ, Фондэу «Хэгъэгум иухъумакIохэр», АНО «Урысыер — амалыбэхэм яхэгъэгу» зыфиIохэрэр премиер агъэнэфагъ. ХэушъхьафыкIыгъэ гъусэгъур — УФ-м культурэмкIэ и Министерств.

Урысые Федерацием и Президентэу Владимир Путиныр лауреатхэм къазщыфэгушIорэ псалъэмкIэ торжественнэ зэхахьэр аублагъ. Ащ къеджагъ Президентым и Администрацие ипащэ игуадзэу Максим Орешкиныр. Джэпсалъэр рэзэныгъэ гущыIэхэмкIэ баигъэ: «Сыгу къыздеIэу сызэрэшъуфэразэр къышъосэIо шъуигуетныгъэ, шъуигукъэкI лъэшхэм апае, Хэгъэгум хэхъоныгъэхэр ышIынхэм шъуиIахь зэрэхашъулъхьэрэм пае. Премием ыцIэ къыгъэшъыпкъэжьэу сэлъытэ — «Хэгъэгур цIыфхэр ары зэзыхъокIырэр».  Ары зэрэщыт шъыпкъэри, сыда пIомэ нэбгырэ пэпчъ гухэлъым зэрэфакIорэм, Хэгъэгум шIуагъэу къыфихьырэм ялъытыгъ щыIакIэр нахьышIу хъущтмэ».

Iофтхьабзэм хэбзэ къулыкъушIэхэр ыкIи пащэхэр хэлэжьагъэх, ахэмэ ащыщыгъэх: Фондэу НТИ-м исовет итхьаматэу, УФ-м и Президент  ихэушъхьафыкIыгъэ лIыкIоу, АНО «Платформа НТИ» зыфиIорэм игенеральнэ пащэу Дмитрий Песковыр; Университет 2035-рэ зыфиIорэм иректорэу, Фондэу НТИ-м ипащэу Вадим Медведевыр; АНО «Платформа НТИ» зыфиIорэм игъэцэкIэкIо пащэу Андрей Силингыр; федеральнэ министерствэхэм, хэхъоныгъэ институтхэм ыкIи бизнес-сообществэм ялIыкIохэр.

Торжественнэ зэхахьэм хэлажьэрэмэ шIуфэс къарихыгъ стратегическэ инициативэхэм IэпыIэгъу афэхъугъэнхэм я Агенствэ игенеральнэ пащэу  Светлана Чупшевам: «Типчыхьэзэхахьэ — ар мэфэкI зэхахьэм нахь ин: ар сэнаущыгъэм, IофшIэным, Урысыем шIошъхъуныгъэу фытиIэм ямэфэкI. ЗэкIэмэ анахь тын лъапIэр — тиIофшIагъэмэ шIуагъэ къызэратырэр, щыIакIэр нахьышIу зэрэхъурэр тлъэгъужьыныр ары!»

Премием илауреатхэр — проектхэм яавторхэу щыIэкIэ-псэукIэр нахьышIу зышIыхэрэр, экономикэм, технологиехэм неущрэ мафэм фэгумэкIырэ цIыфых.

Iофтхьабзэм хэлэжьагъэмэ зэкIэмэ мэфэкI бгъэхалъхьэхэр аратыгъэх, ахэр АСИ ыкIи «Таврида.Арт» къагъэхьазырыгъэх. Медальрэ тамыгъэрэ бгъэхалъхьэм хэхьэх, текIоныгъэ къыдэзыхыгъэмэ ацIэхэр АСИ-м имедиафасадхэм къарыхьащтых.

МКъТУ-м икомандэ ащ фэдэ цIыфхэр зэрахэтхэм тэ тырэпагэ — гукъыдэчъ зиIэхэр, пэрыт шъыпкъэхэр.

Светланэ Константин ыпхъум тыфэгушIо текIоныгъэм фэшIкIэ! Джыри гукъыдэчъыбэ иIэнэу, гъэхъагъэхэр бэрэ ышIынхэу тыфэлъаIо!