Непэ къызыхъугъэ мэфэкI мафэр хегъэунэфыкIы Мыекъопэ къэралыгъо технологическэ университетым и Президентэу, ар зыгъэпсыгъэу ыкIи иапэрэ ректорэу иIагъэу, социологие шIэныгъэхэмкIэ докторэу, профессорэу, Адыгэ Республикэм и Къэралыгъо упчIэжьэгъоу, АР-м и ЛIышъхьэу щытыгъэ ТхьакIущынэ Аслъан Кытэ ыкъом.

МКъТУ-м итарихъ ыкIи иуцун гопчын умылъэкIынэу Аслъан Кытэ ыкъор епхыгъ. Ащ лъэкIэу ыкIи шIэныгъэ-амалэу рихьылIагъэхэм яшIуагъэкIэ 1993-рэ илъэсым тиуниверситет дунаим къытехъуагъ. ТхьакIущынэ Аслъан иIэшъхьэтетэу апшъэрэ еджапIэу щытыгъэ институтыр осэшхо зыфашIырэ университетэу ыкIи федеральнэ мэхьанэ зиIэ гъэсэныгъэ-научнэ площадкэу  хъугъэ.  
Гъэсэныгъэм игъогоу ар зэрыкIуагъэр джыри университетым ыпэкIэ къыщежьэ. 1971-рэ илъэсым къыщыублагъэу 1983-м нэс
физическэ культурэмрэ  спортымрэкIэ Адыгеим иучреждение зэфэшъхьафхэм IэнатIэхэм ащыIутыгъ, къалэу Мыекъуапэ ипрофессиональнэ-техническэ училищэу №3-м ипащагъ, ащ ыуж  профессиональнэ-техническэ ыкIи гурыт-хэушъхьафыкIыгъэ еджапIэхэу Адыгэ автоном хэкум итхэу зэхэтыгъэхэм ягенеральнэ пащэу щытыгъ. ШIэныгъэлэжьэу, кIэлэегъаджэу ыкIи гъэIорышIакIоу Аслъан Кытэ ыкъор хъуным а  илъэсхэр лъапсэ фэхъугъэх.  
ТхьакIущынэ Аслъан ушэтэкIо-шIэныгъэлэжь Iофым, лъэпкъ педагогикэм ыкIи социологием иIахьышхо ахилъхьагъ.
Ащ ежь ышъхьэкIэ гъэсэныгъэм епхыгъэ научнэ екIолIакIэхэр лъэпкъ-педагогическэ Iофым къыфигъотыгъэх. Анахьэу ишIэныгъэ IофшIэнхэм къахэщырэр шэн-хабзэу «Адыгагъэр» ары, адыгэмэ якъэгъэнэжьын и зы Iахьэу зэрэщытыр ыгъэунэфыгъ. ТхьакIущынэ Аслъан игукъэкIхэр Къыблэ Урысыем иапшъэрэ еджапIэхэм ягъэсэныгъэ процесс хагъэхьагъэх, иавторскэ курсхэмрэ иегъэджэн пособиехэмрэ ащагъэфедагъэх.
Студентхэм, аспирантхэм ыкIи иIофшIэгъухэм ар зэрашIэрэр акъылышхо зиIэ гъэсакIоу, цIыф Iушэу ыкIи хьарыф инкIэ тхыгъэ ЦIыфэу ары.  
Лъытэныгъэ зыфэтшIырэ Аслъан Кытэ ыкъор!  
МКъТУ-м щылажьэхэрэм ыкIи щеджэхэрэм ацIэкIэ укъызыхъугъэ мэфэкI мафэмкIэ тыпфэгушIо! УиIофрэ университетымрэ уазэрэфэшъыпкъэм осэшхо фэтэшIы. Апшъэрэ еджапIэу бгъэпсыгъэм  угу хэтIагъ, урикIэгъэкъон. МэфакIэу къакIорэ пэпчъ насып, псауныгъэ, рэхьатныгъэ ыкIи гукъыдэчъ къыпфихьынэу тыпфэлъаIо!