Адыгэ Республикэм и ЛIышъхьэу КъумпIыл Мурат иунашъо елъытыгъэу Республикэу Беларусь дытиIэ научнэ-гъэсэныгъэ зэпхыныгъэхэр гъэпытэгъэнхэмкIэ IофшIэнхэр лъытэгъэкIуатэх.

А лъэныкъомкIэ зичэзыу лъэубэкъоу хъугъэ зэзэгъыныгъэу Мыекъопэ къэралыгъо технологическэ университетымрэ лъэпкъхэм я Зэкъошныгъэ иорден зыхьырэ Витябскэ къэралыгъо медицинскэ университетымрэ зэдашIыгъэр.
Документым кIэтхагъэх МКъТУ-м иректорэу Къуижъ Саидэрэ ВКъМУ-м иректорэу Алексей Чукановымрэ. Адыгэ Республикэм и Министрэхэм я Кабинетрэ (Урысые Федерациер) Республикэу Беларусьрэ я Зэзэгъыныгъэ игъэцэкIэн къыдыхэлъытагъэу рабочэ купхэм язэхэт зэхэсыгъо щашIыгъэ унашъоу сатыу-экономическэ, научнэ-техническэ ыкIи социальнэ-культурнэ зэдэлэжьэныгъэм фэгъэхьыгъэм а Iофтхьабзэр къапкъырыкIыгъ.
Зэдэлэжьэныгъэм къыделъытэ студентхэмкIэ, аспирантхэмкIэ, кIэлэегъаджэхэмкIэ ыкIи научнэ IофышIэхэмкIэ зэхъожьынхэр, зэхэт гъэсэныгъэ программэхэр зэхагъэуцонхэр, научнэ ушэтынхэр ашIынхэр, стажировкэхэр, конференциехэр зэхащэнхэр, джащ фэдэу непэрэ мафэм диштэрэ гъэIорышIэкIо практикэхэр гъэсэныгъэ процессым хагъэхьанхэр. 
Апшъэрэ еджапIэмэ яректорхэу Къуижъ Саидэрэ
Алексей Чукановымрэ къызэраIотагъэмкIэ, университетхэр шIуагъэ къэзытырэ зэдэлэжьэныгъэм зытырагъэпсыхьэ, гъэсэныгъэм ыкIи псауныгъэм икъэухъумэн алъэныкъокIэ хэхъоныгъэхэр зэдашIынхэм щэгугъух.
Урысые-белорусскэ научнэ-гъэсэныгъэ зэдэлэжьэныгъэм зегъэушъомбгъугъэным фэгъэхьыгъэу гъэтхапэм, 2024-рэ илъэсым апэрэ лъэубэкъур ашIыгъ, Адыгэ Республикэм илIыкIо куп Республикэу Беларусь кIогъагъэх. Мэкъуогъу мазэм, 2025-рэ илъэсым Беларусым къыкIигъэхэр Мыекъуапэ щыIагъэх, АР-м и ЛIышъхьэу КъумпIыл Муратэ зыIуагъэкIэгъагъ. Зэхэсыгъоу зэхащэгъагъэм лъэныкъо шъхьаIэхэу зыщызэдэлэжьэщтхэр щагъэнэфэгъагъэх.
2024-2025-рэ илъэсхэм Мыекъопэ къэралыгъо технологическэ университетымрэ белорусскэ тиныбджэгъухэмрэ зэхэт проектыбэ зэдагъэцэкIагъ:
— жъоныгъуакIэм и 15-м 2024-рэ илъэсым — Дунэе научнэ конференциеу «Хэгъэгу гупсэр: цивилизационнэ хэхъоныгъэм епхыгъэ упчIэхэр ыкIи культурнэ кIэныр къэухъумэгъэныр» зыфиIорэр (культурэм ыкIи искусствэм я Белорусскэ къэралыгъо университетым ыкIи Барановичскэ къэралыгъо университетым ягъусэхэу).
— чъэпыогъум и 11-м 2024-рэ илъэсым — Дунэе Iэнэ хъураеу «Тхыпхъэ искусствэр культурнэ кодыр къэгъэнэжьыгъэнымкIэ ыкIи къэухъумэгъэнымкIэ», Союзнэ къэралыгъор зыщыIэр илъэс 25-рэ зэрэхъурэм ихэгъэунэфыкIын къыдыхэлъытагъэу зэхащагъ.
— жъоныгъуакIэм и 12-17-м 2025-рэ илъэсым — МКъТУ-м илIыкIо куп я IV-рэ Дунэе ныбжьыкIэ экологическэ гъэсэныгъэ форумэу союзнэ къэралыгъом зэхищагъэм хэлэжьагъ. Экологическэ факультетым истудентмэ агъэхьазырыгъэ научнэ проектхэр Белорусскэ къэралыгъо технологическэ университетым иплощадкэ къыщагъэлъэгъуагъ.
 Нэужым рабочэ шIыкIэм тетэу зэзэгъыныгъэмэ дыкIэтхагъэх
Гродненскэ къэралыгъо мэкъу-мэщ университетым ыкIи Белорусскэ къэралыгъо технологическэ университетым. Зэзэгъыныгъэ проектитIу зэдэлэжьэгъэным фэгъэхьыгъэу чIыгулэжьынымкIэ Беларусым и Лъэпкъ академие и Научнэ-практическэ гупчэ ыкIи Республикэ унитарнэ предприятиеу «ГъомлапхъэмкIэ Беларусым и Лъэпкъ академие и Научнэ-практическэ гупчэ» адашIыгъэх, ахэр дунэе зэдэлэжьэныгъэмкIэ гъэсэныгъэмрэ шIэныгъэмрэкIэ УФ-м и Министерствэ и Департамент ишIэ хэлъэу агъэцэкIагъэх. Гъомлэпхъэ технологиехэмрэ шхыныгъохэм ягъэхьазырынрэкIэ МКъТУ-м икафедрэ иIофышIэхэм Къэралыгъо гъэцэкIэным елъытыгъэу стажировкэ щахьыщт Республикэ унитарнэ предприятиеу «ГъомлапхъэмкIэ Беларусым и Лъэпкъ академие и Научнэ-практическэ гупчэ», къалэу Минскэ.