Мы мафэхэм Мыекъопэ къэралыгъо технологическэ университетым мэхьанэшхо зиIэ хъугъэ-шIагъэ щыкIуагъ — чIэтIупщыгъо IэпэIэсэныгъэ IофшIэнхэр общественнэ проект шапхъэм илъхэу къаухъумагъэх, ахэр екIолIакIэу «Къулыкъу ахьызэ егъэджэгъэнхэр» зыфиIорэм къыдыхэлъытэгъагъэх.

2024-2025-рэ еджэгъу илъэсым къыкIоцI студентхэмрэ кIэлэегъэджэ-гъэсакIохэмрэ университетым исоциальнэ гъусэгъухэм аготхэу мэхьанэшхо зиIэ проектхэу дисциплинэхэу «Общественнэ проектыр» ыкIи «Проектнэ практикумыр» зыфиIохэрэмэ адэлэжьагъэх. Проектхэр ащауплъэкIугъэх Адыгэ Республикэм исоциальнэ объектхэм. КIэлакIэмэ яIофшIагъэхэр къащагъэлъэгъуагъэх социальнэ проектхэм я Урысые студенческэ зэнэкъокъоу «Инносоциум» зыфиIорэм ия VII-рэ зэхэщэгъум, джащ фэдэу социальнэ проектхэу «Къулыкъу ахьызэ егъэджэгъэнхэр» зыфиIорэм иа I-рэ ыкIи ия II-рэ ЗэIухыгъэ апшъэрэ еджэпIэ зэнэкъокъум. Экспертнэ советым IофшIэнэу ашIагъэхэр апашъхьэ ралъхьаныр зэфэхьысыжь дэгъу а Iофтхьабзэхэм афэхъугъ, тапэкIэ хэхъоныгъэхэр ашIышъунхэм ягугъапIэ яIэ хъугъэ.

Факультет зэфэшъхьафхэм ащеджэрэ студентмэ экспертнэ советым чIэтIупщыгъо IэпэIэсэныгъэ IофшIэних арагъэлъэгъугъ, екIолIакIэу «Къулыкъу ахьызэ егъэджэгъэнхэр» зыфиIорэм ахэр къыдыхэлъытэгъагъэх.

IофшIэнхэр лъэныкъуищкIэ къагъэлъэгъуагъэх: «Псауныгъэ шхыныгъохэр», «Гъэсэныгъэ хъоум къыхиубытэрэ технологиехэу псауныгъэр къэзыухъумэхэрэр», «Зэтегъэпсыхьэгъэныр».

ВКР-м ратыгъэхэр:

I. Анастасия Земцевар — IофшIагъэм ыцIэр: «Нэкулъэу «Выселковские» зыфиIорэр зэрэбгъэхьазырыщтымрэ ащ итехнологиерэ амарантыкIэхэр хэбгъахъохэзэ псауныгъэ шхыныгъэу пшIыныр» (научнэ пащэр — техническэ шIэныгъэхэмкIэ кандидатэу, доцентэу Татьяна Колотий);

2. Ульяна Митрофановар — IофшIагъэм ыцIэр: «Пчэныщэм хэшIыкIыгъэ алкоголь зыхэмылъ шъоным игъэхьазырын ыкIи ащ епхыгъэ технологиехэр пчэныщэм, ыкIи мыIэрысэ пектиновэ экстрактым ахэшIыкIыгъэу» (научнэ пащэр — техническэ шIэныгъэхэмкIэ докторэу, доцентэу Хьаткъо Зурет);

3. Дара Ираник — IофшIагъэм ыцIэр: «МэшIогъэкIосэ-ухъумэн спортыр къызфэбгъэфедэзэ кIэлэеджакIохэр машIо щынэгъончъэным фэгъэсэгъэнхэр» (научнэ пащэр — социологие шIэныгъэхэмкIэ кандидатэу, доцентэу Къыздырмыш Сулиет);

4. Дарья Гончаровар — IофшIагъэм ыцIэр: «МашIом пэшIуекIорэ къэбархэм зягъэушъомбгъугъэныр ыкIи икъоу зэхэзымыхыхэрэр мэшIо щынэгъончъэным зэрэфэбгъэсэщтхэр» (научнэ пащэр — социологие шIэныгъэхэмкIэ кандидатэу, доцентэу Къыздырмыш Сулиет);

5. Вадим Гульникыр — IофшIагъэм ыцIэр: «Разработка рецептуры и технологии кефира с лактулозой как фактора здорового питания» (научнэ пащэр — техническэ шIэныгъэхэмкIэ кандидатэу, доцентэу Едыдж Саид);

6. Константин Поповыр — IофшIагъэм ыцIэр: «Благоустройство и озеленение МБДОУ №6 «Маленькая страна» в городе Майкопе» (научнэ пащэр — мэкъу-мэщ шIэныгъэхэмкIэ кандидатэу, доцентэу Наталья Трушевар).

Проектхэм язэхэгъэуцон ыкIи ягъэцэкIэн Iоф дашIагъ университетым ясоциальнэ гъусэгъухэм аготхэу — Урысыем и МЧС игъэIорышIэпIэ ШъхьаIэу АР-м щыIэр, Адыгэ республикэ еджэпIэ-интернатэу макIэу зылъэгъухэрэр ыкIи зэхэзыхыхэрэр зыщырагъаджэхэрэр, Муниципальнэ бюджетнэ гъэсэныгъэ учреждениеу «КIэлэцIыкIу IыгъыпIэу № 6 «Хэгъэгу цIыкIу» ыкIи нэмыкIхэр. Зэхэт IофшIэным ишIуагъэкIэ обществэм федэ къыфэзыхьыщт проектхэм адэлэжьагъэх.

Егъэджэн IофшIэнымкIэ проректорэу, экономикэ шIэныгъэхэмкIэ докторэу Людмила Задорожнаям къыхигъэщыгъ мыщ фэдэ шапхъэмкIэ студентхэр гъэхьазырыгъэнхэм мэхьанэшхо зэриIэр, практическэ лъэныкъомкIи, пшъэдэкIыжьыр зэхашIэнымкIи зэрэIофыгъошIур.

Экспертнэ советым проектэу къагъэхьазрыгъэхэм осэшхо къафишIыгъ, ахэмэ социальнэ мэхьанэу яIэхэр, зэрэзэхэгъэуцогъэ шIыкIэхэр къыхагъэщыгъэх.

Мыекъопэ къэралыгъо технологическэ университетым чIэтIупщыгъо IэпэIэсэныгъэ IофшIэнхэр общественнэ проект шапхъэм илъхэу къызэращаухъумагъэхэр кIэлэегъэджэ екIолIакIэу «Къулыкъу ахьызэ егъэджэгъэнхэр» зыфиIорэр лъыгъэкIотэгъэным и зы Iахьэу щыт.