Мыекъопэ къэралыгъо технологическэ университетым зегъэхьазыры хэхъоныгъэ языгъэшIырэ программэу «Университетскэ сменэхэр» зыфиIорэр ытIупщынэу, ар Урысые Федерацием и Президент иунашъокIэ наукэмрэ апшъэрэ гъэсэныгъэмрэкIэ УФ-м и Министерствэрэ кIэлэцIыкIухэмрэ ныбжьыкIэхэмрэ ядвижениеу «Апэрэхэм я Движение» зыфиIорэмрэ агъэцакIэ.

Гъэсэныгъэ ыкIи туристическэ тедзэ программэу «Университетскэ сменэхэр: гъэхъагъэм ишъэфхэр («Пицца профессий»)» зыфиIорэр зыфытегъэпсыхьагъэр илъэс 14-16 зыныбжь кIэлэ атахъомэ сэнэхьатэу къыхахыщтымкIэ унашъо ягъэшIыгъэныр ары, ахэр сэнэхьатхэм ядунае хэщэгъэнхэр, ягражданскэ чаныгъэ ыкIи культурнэ лъэныкъохэр афэгъэлъэшыгъэныри къыделъытэх. Программэр джащ фэдэу афэгъэзагъ ныбжьыкIэхэр общественнэ мэхьанэ зиIэ IофшIэнхэм ахэщэгъэнхэм, сэнэхьат къыхэхыными анаIэ атырарагъадзэзэ, патриотическэ ыкIи культурнэ гъэсэныгъэм хэгъэлэжьэгъэнхэр, социальнэ зэфыщытыкIэхэмкIэ хэхъоныгъэхэр ягъэшIыгъэнхэр Iофыгъо шъхьаIэу иIэхэм ащыщых.

Программэм къыдыхэлъытагъэу мэфи 10 сменэхэр рахъухьагъэх, ахэмэ сыхьат 80-у гъэсэныгъэ, культурнэ-зыгъэпсэфыгъо ыкIи туристическэ лъэныкъохэм афытегъэпсыхьагъэхэр ахэтыщтых. Апэрэ сменэр бэдзэогъум и 17-м рагъажьэ.

МКъТУ-м «Университетскэ сменэхэр» ащызэхэщэгъэнхэр Адыгэ РеспубликэмкIэ мэхьанэшхо зиIэ Iофыгъу. Урысыем ишъолъыр ээфэшъхьафхэм къарыкIыщт ныбжьыкIэхэр мыщ щызэIукIэщтых, ахэр Белгородскэ, Курскэ ыкIи Брянскэ хэкухэм ащыщых, джащ фэдэу хэушъхьафыкIыгъэ дзэ операцием хэлажьэрэмэ якIалэхэр ыкIи Апэрэхэм я Движение зэнэкъокъу шIыкIэмкIэ къыхихыгъэхэр.
 Херсон хэкум икIэлэцIыкIухэм апае Адыгэ Республикэм зыгъэпсэфыгъо уахътэр апэрэп зэрэщызэхащэрэр. Программэм ишIуагъэкIэ лъэпкъ ыкIи дин зэфэшъхьафхэр зэпхыгъэ мэхъух, социальнэ зыкIныгъэр мэпытэ.

МКъТУ-м чIэхьащтхэр зыщагъэхьазырхэрэ ыкIи сэнэхьатым икъыхэхын зыщыдэлажьэхэрэ Гупчэм ипащэу Олег Франко къызэриIуагъэмкIэ, программэу «Университетскэ сменэхэр: гъэхъагъэм ишъэфхэр» зыфиIорэм ыцIэ къегъэлъагъо проектым мэхьанэу иIэр. ПIэлъэ кIэкIым къыкIоцI зэхащэрэ гъэсэныгъэ тедзэхэм тапэкIэ яшIуагъэ къэкIожьынэу щыт.  Концепциеу ащ иIэм къегъэлъагъо шIэныгъэу ящыкIэгъэщтыр профессиональнэ хэхъоныгъэ ягъэшIыгъэным фэшI. Образэу «Пицца профессий» зыфииорэм къыкIегъэтхъы сэнэхьатхэр ыкIи IэнатIэхэр зэфэшъхьафыбэ зэрэхъухэрэр, зэрэзэтекIыхэрэр. Программэм хэт элементхэр зэкIэ МКъТУ-м идевиз пэджэжьых: «МКъТУ-р — гъэхъагъэу пшIырэмэ ялъэныкъо пчъагъ».

Мыекъопэ къэралыгъо технологическэ университетым опытышхо IэкIэлъ федеральнэ ыкIи шъолъыр мэхьанэ зиIэ ныбжьыкIэ Iофтхьабзэхэр зэхищэнхэмкIэ, гущыIэм пае, Урысые лъэпкъ форумэу «ЗэгурыIоныгъэмрэ зыкIныгъэмрэ — джары тикIуачIэр», Форумэу «Сигупсэхэр-шIу слъэгъухэрэр», Урысые форумэу «Пилот зэрымыс авиационнэ системэхэр», студенческэ форумэу «УикIогъу» зыфиIохэрэр ыкIи нэмыкIхэр.