Федеральнэ мэшIогъэкIосэ къулыкъум иа 1-рэ мэшIо-ухъумэкIо отряд и Егъэджэн пунктэу станицэу Ханскэм дэтым Урысыем и МЧС и ГъэIорышIэкIо шъхьаIэу Адыгэ Республикэм щыIэм и Общественнэ совет изичэзыу зэхэсыгъо ригъэкIокIыгъ. Зэхэсыгъор зэращагъ Общественнэ советым итхьаматэу Мыекъопэ къэралыгъо технологическэ университетым иректорэу Къуижъ Саидэрэ Урысыем и МЧС и ГъэIорышIэкIо шъхьаIэу Адыгэ Республикэм щыIэм ипащэу Станислав Илющенкэмрэ.

Iофтхьабзэм хэлэжьагъэх общественнэ организациехэм, гъэсэныгъэ учреждениехэм, ветеранскэ сообществэм ыкIи ныбжьыкIэ парламентым ялIыкIохэр, джащ фэдэу Урысыем и МЧС и ГъэIорышIэкIо шъхьаIэу АР-м щыIэм икъулыкъушIэхэр.

Саидэ Казбек ыпхъум игущыIэхэм къащыхигъэщыгъ ГъэIорышIэкIо шъхьаIэм цIыфхэр къаухъумэнхэмкIэ Iофыгъошхо зэригъэцакIэрэр, машIохэр ыкIи нэмыкI тхьамыкIагъохэр къэмыхъунхэм икъу фэдизэу зэралъыплъэхэрэр, ащ пае тхьаегъэпсэу ариIуагъ. Зэхэсыгъом ипэублэм советым хэтхэм зы нэбгырэ къазэрэхэхъуагъэм игугъу къышIыгъ, фондэу «Хэгъэгум иухъумакIохэм» ишъолъыр къутамэ ипащэу ПIатIэкъо Аслъан ары советым къыхэхьагъэр.

Зэхэсыгъом Iофыгъоу зыщытегущыIагъэхэр:

— 2025-рэ илъэсым иапэрэ илъэсныкъо Iофэу ашIагъэм изэфэхьысыжьхэр;

— кампаниеу «Щынэгъончъэ каникулхэр Адыгэ Республикэм ишъолъыр 2025-рэ илъэсым» зыфиIорэм къыдыхэлъытагъэ пэшIорыгъэшъ Iофтхьабзэхэр зэхэщэгъэнхэр;

— Общественнэ советым апэрэ мэзихым Iофэу ышIагъэм уасэ фэшIыгъэныр ыкIи илъэсым иятIонэрэ кIэлъэныкъомкIэ пшъэрылъхэр гъэнэфэгъэнхэр.

ШIоигъоныгъэ зиIэ ведомствэмэ зэрадэлэжьэщтхэр, лъэныкъоу ащкIэ къыхахыщтхэр агъэнэфагъэх, нахьыбэрэмкIэ зыфэгъэхьыгъэхэр гъэмэфэ уахътэм сабыйхэм афэсакъыгъэнхэр ары. Анахьэу анаIэ зытырадзагъэр псыхэм, псыIыгъыпIэхэм ащысакъынхэр ыкIи машIохэр къэмыхъунхэм пае ашIэщтхэр.

Зэхэсыгъор экскурсиекIэ аухыгъ, Егъэджэн пунктыр къакIуахьыгъ, ухъумакIохэр зэрагъэхьазырхэрэм зыщагъэгъозагъ. МашIом ебэнхэрэмэ яамалхэр къагъэлъэгъуагъэх, ащ пае хэушъхьафыкIыгъэ чIыпIэ хахыгъагъ.