Мыекъопэ къэралыгъо технологическэ университетым къалэу Шытхьалэ (Белореченскэ) иадминистрацие илIыкIохэм ащыIукIагъэх.

ЗэIукIэгъум ипшъэрылъыгъэр кадрэхэм ягъэхьазырынкIэ гугъапIэу щыIэхэм атегущыIэнхэр ыкIи апшъэрэ еджапIэм къычIитIупщырэмэ муниципалитетым IофшIэпIэ чIыпIэ къащыратынымкIэ яамалхэр ары.

Iофтхьабзэм къалэу Шытхьалэ и Iэшъхьэтетэу Александр Абрамовыр ыкIи администрацием илъэныкъо зэфэшъхьафхэм япащэхэр хэлэжьагъэх. МКъТУ-р къэзгъэлъэгъуагъэхэр — ректорэу Къуижъ Саид, егъэджэн IофшIэнымкIэ проректорэу Людмила Задорожнаяр, профильнэ факультетхэм ядеканхэр, структурнэ подразделениехэм япащэхэр.

Къалэу Шытхьалэ иадминистрацие илIыкIохэм къаIуагъ МКъТУ-м къычIитIупщыхэрэмэ IофшIэпIэ чIыпIэ арагъэгъотыным зэрэфэхьазырхэр, тапэкIэ мы IофымкIэ къадэлэжьэнхэ мурад зэряIэр.

ЗэIукIэгъум щызэзэгъыгъэх къэлэ администрациер целевой егъэджэнымкIэ заказчикэу зэрэхъущтымкIэ, а шапхъэм тетэу студентхэр МКъТУ-м щырагъэджэнхэр зэралъэкIыщтымкIэ. Ащ амал къеты гъэсэныгъэ процессым нахь пэблагъэу, къычIитIупщыхэрэр IофшIэм аштэнхэмкIэ нахь Iэрыфэгъу зэрэхъущтыр.

Мы мэфэ благъэхэм сэнэхьат зэфэшъхьафхэм афеджэрэ студентхэм зэIукIэ афызэхащэнэу агъэнафэ, ащ хэлэжьэщтых Шытхьалэ иадминистрацие ыкIи бизнесым ялIыкIохэр. ЗэIукIэм ашъхьэ къыщырахыщт IофшIэпIэ чIыпIэу щыIэхэр зыфэдэхэр, муниципалитетым ихъызмэтшIапIэхэр зыщыкIэхэрэ специалистхэр.

Шытхьалэ илIыкIохэм къаIуагъ акселерационнэ программэу МКъТУ «ИнноВектор» зыфиIорэм хэлэжьэнхэу зэрэхьазырхэр, ащ къыдыхэлъытагъэу студенческэ командэхэр прикладной пшъэрылъхэу къэлэ инфраструктурэм хэхъоныгъэ езыгъэшIыхэрэмэ, джащ фэдэу къалэм иэкологическэ проектхэмэ адэлэжьэщтых.

Ащ фэшъхьафэу, лъэныкъо шъхьаIэхэр агъэнэфагъэх — къалэу Шытхьалэ икIэлэеджакIохэм зэпхыныгъэ адашIыныр. ТапэкIэ зэгъусэхэу профильнэ классхэм япрограммэхэм ягъэцэкIэн пылъыщтых, шъолъырыр зыщыкIэрэ кадрэхэр гъэхьазырыгъэнхэмкIэ ар лъэубэкъушIу хъунэу щыт.