Мыекъопэ къэралыгъо технологическэ университетым истудентхэр проектэу «ТекIоныгъэм и Быракъ итарихъ» зыфиIоу ТекIоныгъэм ия 80-рэ илъэс фэгъэхьыгъэм игъэцэкIэн къыдыхэлъытагъэу зекIо гъогу гъэшIэгъон техьагъэх. А гъогум щызэхэкIуакIэх тарихъым ижьыкъащэрэ непэрэ щыIакIэмрэ.

Партизанскэ лъагъом фэгъэхьыгъэ экскурсиер зэхэзыщагъэр МКъТУ-м ипрофессорэу, социальнэ технологиехэм ыкIи шъолъыр (муниципальнэ) гъэIорышIэкIо практикэхэм я Академие итхьаматэу Азащыкъ Геннадий ары. Мыекъуапэ нэмыц техакIомэ заубытым илъэхъан, ар тидзэкIолIмэ шъхьафит ашIыжьызэ лIыхъужъыныгъэу зэрахьагъэм, тарихъым щыщ нэкIубгъо пчъагъэхэм студентхэр ащ щигъэгъозагъэх.

Студентмэ язекIо гъогу Мыекъуапэ къыщырагъэжьагъ — Хэгъэгу зэошхом илъэхъан Мыекъопэ истребительнэ батальоныр зычIэтыгъэ унэм. Ащ ыуж ДзэкIолIхэм япсынэкIэчъ зэрагъэлъэгъугъ, ар поселкэу Удобнэм дэт, Хэгъэгур къэзыухъумагъэхэм яштаб зычIэтыгъэ чIыунэм нэужым чIэхьагъэх. Лъагъом ыбгъукIэ щытых информационнэ стендхэр, Темыр Кавказым щыкIогъэ заомэ якъэбархэр ахэм арытых, пстэуми нэIуасэ афэхъугъэх.

Мы экскурсием ишIуагъэкIэ блэкIыгъэ уахътэм ихъугъэ-шIагъэхэр зэрагъэшIагъэхэ къодыеп, патриотизмэм имэхьанэ икъоу зэкIэхэми зэхашIагъ. «Партизанскэ лъагъу» — ар шIэжь чIыпIэ закъоп, ар тамыгъэу тилIыхъужъхэр тыгу къэзыгъэкIыжьэу, къыкIэлъыкIорэ лIэужмэ къязытыжьэу щыт.