Мы мафэхэм Пшызэ къэралыгъо университетым Къыблэ Урысыем щыпсэурэ ныбжьыкIэхэмкIэ мэхьанэ зиIэ хъугъэ-шIагъэ щыкIуагъ — шъолъыр площадкэу Студенческэ медиагупчэр гъэсэныгъэмрэ шIэныгъэмрэкIэ УФ-м и Министерствэ къыщызэIуихыгъ.

Мыекъопэ къэралыгъо технологическэ университетым илIыкIо куп хэтыгъэх — ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Мурат, информационнэ политикэмкIэ ректорым иупчIэжьэгъоу Анастасия Хажгериевар, пресс-къулыкъум ипащэ ипшъэрылъхэр зыгъэцэкIэрэ Аминат Абубакаровар, студентхэу Кирилл Емельяновыр ыкIи Виктория Чернобай. Iофтхьабзэм хэлэжьагъэх проректорхэр, пресс-къулыкъухэм япащэхэр, ахэр къарыкIыгъагъэх мыщ фэдэ апшъэрэ еджапIэхэм: КубГТУ, СочГУ, ИМСИТ, КГУФКСТ, КубГМУ, КубГАУ, АГПУ, АГУ.

Гъэсэныгъэмрэ шIэныгъэмрэкIэ УФ-м и Министерствэ и Студенческэ медиагупчэ иплощадкэ — ар креативым ишъолъыр, гукъэкIхэм ыкIи зэдэлэжьэныгъэм. Мыщ апшъэрэ еджапIэмэ ястудентхэр яопытхэмкIэ щызэхъожьых, зэгъусэхэу проектыкIэхэр атIупщых, медийнэ лэныкъомкIэ загъэчаны. МКъТУ-р зэхэт редакциемкIэ студенческэ каналищэу зыкъегъэлъагъо: МКъТУ-м и ГуфэкIо гупчэ; МКъТУ-м и  СтудПространствэ; Облако ММ. 

Мы проектым тызэрэхэлажьэрэм ихьатыркIэ тистудентхэр хъугъэ-шIагъэу зыщыгъуазэхэм заушъомбгъущт, шъолъырым имедиа гупчэ итыщтых, ащ ихэхъоныгъэ епхыгъэ Iофыгъохэм ахэлэжьэшъущтых.

Iофтхьабзэм къыдыхэлъытагъэу зэхэгущыIэжь рагъэкIокIыгъ, темэр: «Студенческэ къэбар жъугъэм иамалхэр непэрэ медиа шъолъырым ыкIи ныбжьыкIэ политикэм зэрэхэтхэр». Ащ хэлэжьагъэх гъэсэныгъэмрэ шIэныгъэмрэкIэ УФ-м и Министерствэ и Студенческэ медиагупчэ ипащэу, Минобрнауки России, агрегаторэу НОС-м иредактор шъхьаIэу Яна Щуцкоир, Пшызэ къэралыгъо университетым иректорэу Михаил Астаповыр, Краснодар краим информационнэ политикэмкIэ и Департамент ипащэу Галина Навазовар, «Пшызэ 24-рэ» зыфиIорэм ипащэу Александр Руденко ыкIи Пшызэ къэралыгъо университетым журналистикэмкIэ ифакультет идеканэу Валерия Касьяновар.

Программэм мэхьанэ зиIэ Iахьэу хэтыгъ Iэнэ хъураеу информационнэ политикэмкIэ проректорхэр ыкIи пресс-къулыкъумэ япащэхэр зыхэлэжьагъэхэр, ащ темэу иIагъэр: «Студенческэ медиахэм практикэ анахь дэгъоу яIэхэр». Студентмэ амал яIагъ занкIэу адэгущыIэнхэу телеканалэу «Пшызэ 24-рэ» зыфиIорэр зезыщэхэрэмэ, джащ фэдэу КВН-м и Апшъэрэ лигэ хэтыгъэ Павел Моисеенкэм. Нэужым мастер-класс заулэ рагъэкIокIыгъ.

Iофтхьабзэм икIэухым гъэсэныгъэмрэ шIэныгъэмрэкIэ УФ-м и Министерствэ и Студенческэ медиагупчэ ибгъэхалъхьэ-тамыгъэхэр аратыгъэх. Гупчэм ипащэ ащ фэдэ бгъэхалъхьэ-тамыгъэ къыритыгъ МКъТУ-м истудентэу Кирилл Емельяновым — университетым иIофхэм чанэу зэрахэлажьэрэм фэшI.

Пшызэ къэралыгъо университетым иIофышIэхэм тафэраз Iофтхьабзэр дэгъу дэдэу зэрэзэхащагъэм пае. Къыблэ Урысыем имедиа шъолъыр щыIэ зэрэхъурэм анахьэу тигъэгушIуагъ, ныбжьыкIэ политикэм ыкIи информационнэ культурэм хэхъоныгъэхэр егъэшIыгъэнхэмкIэ зэкIэхэми тиIахь ащ хэтлъхьан тлъэкIыщт.